ಬ್ರಿಟಿಷರು ಮಾಡಿದ್ದಕ್ಕಿಂತ ಹೆಚ್ಚು ಲೂಟಿ ಮೋದಿ ಸರ್ಕಾರ ಮಾಡಿದೆ: ಕೇಜ್ರಿವಾಲ್

Team Udayavani, Jul 2, 2023, 8:09 PM IST

ಬಿಲಾಸ್‌ಪುರ್: ಕಳೆದ ಒಂಬತ್ತು ವರ್ಷಗಳಲ್ಲಿ ನರೇಂದ್ರ ಮೋದಿ ಸರ್ಕಾರದ “ಲೂಟಿ” ಪ್ರಮಾಣವು ಬ್ರಿಟಿಷರು ತಮ್ಮ ಆಡಳಿತದ 250 ವರ್ಷಗಳಲ್ಲಿ ಮಾಡಿದ ಭಾರತದ ಲೂಟಿಯನ್ನು ಮೀರಿಸಿದೆ ಎಂದು ದೆಹಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಭಾನುವಾರ ಆರೋಪಿಸಿದ್ದಾರೆ.

ಈ ವರ್ಷಾಂತ್ಯದೊಳಗೆ ವಿಧಾನಸಭೆ ಚುನಾವಣೆ ನಡೆಯಲಿರುವ ಛತ್ತೀಸ್‌ಗಢದ ಬಿಲಾಸ್‌ಪುರದಲ್ಲಿ ಸಾರ್ವಜನಿಕ ರ‍್ಯಾಲಿಯನ್ನು ಉದ್ದೇಶಿಸಿ ಮಾತನಾಡಿದ ಕೇಜ್ರಿವಾಲ್, 75 ವರ್ಷಗಳಿಂದ ದೇಶವನ್ನು ಲೂಟಿ ಮಾಡಿದ್ದಕ್ಕಾಗಿ ಕಾಂಗ್ರೆಸ್ ವಿರುದ್ದವೂ ಆಕ್ರೋಶ ಹೊರ ಹಾಕಿ ಛತ್ತೀಸ್‌ಗಢವನ್ನು ಭ್ರಷ್ಟಾಚಾರದಿಂದ ಮುಕ್ತಗೊಳಿಸಲು ಆಮ್ ಆದ್ಮಿ ಪಕ್ಷಕ್ಕೆ ಮತ ನೀಡಿ ಅಧಿಕಾರಕ್ಕೆ ತರುವಂತೆ ಮನವಿ ಮಾಡಿದರು.

“ನಾನು ದೆಹಲಿಯಲ್ಲಿ ಉಚಿತವಾಗಿ ನೀಡುತ್ತಿದ್ದೇನೆ ಎಂದು ಮೋದಿ ಜಿ ನನ್ನ ಮೇಲೆ ಕೋಪಗೊಂಡರು. ಹೌದು, ಮೋದಿಜಿ ನಾನು ವಿತರಿಸುತ್ತಿದ್ದೇನೆ. ಅಗತ್ಯ ವಸ್ತುಗಳ ಬೆಲೆ ಗಗನ ಮುಟ್ಟುತ್ತಿದೆ.ತರಕಾರಿ, ಹಾಲು, ಹಿಟ್ಟು ಎಲ್ಲವೂ ದುಬಾರಿಯಾಯಿತು. ಬೆಲೆಗಳು ಏಕೆ ಏರುತ್ತಿವೆ ಎಂದು ನೀವು ಎಂದಾದರೂ ಯೋಚಿಸಿದ್ದೀರಾ? ಮೋದಿಜಿಯವರು ಸ್ವಾತಂತ್ರ್ಯದ ನಂತರ ಹಿಂದೆಂದೂ ಕಂಡರಿಯದಷ್ಟು ತೆರಿಗೆಯನ್ನು ಹಾಕಿದ್ದಾರೆ. ಮೋದಿಯವರು ಚಹಾ, ಕಾಫಿ, ಹಾಲು, ಎಣ್ಣೆ ಇತ್ಯಾದಿಗಳನ್ನು ಸಹ ಬಿಟ್ಟಿಲ್ಲ. ಆದರೆ ನಿಮ್ಮವರು ಲೂಟಿ ಮಾಡುತ್ತಿದ್ದಾರೆ ಮತ್ತು ಅದನ್ನು ಅವರ ಮನೆಗೆ ತೆಗೆದುಕೊಂಡು ಹೋಗುತ್ತಿದ್ದಾರೆ… ನಾನು ಬಡವರ ಕೈಗೆ ಹಾಕುತ್ತಿರುವಾಗ ನಿಮಗೇಕೆ ಚಿಂತೆ?” ಎಂದು ಕೇಜ್ರಿವಾಲ್ ಪ್ರಶ್ನಿಸಿದ್ದಾರೆ.