ವೃದ್ಧ ಮೋದಿ ನಿವೃತ್ತಿಯಾಗಲಿ: ಮೆವಾನಿ

Team Udayavani, Dec 21, 2017, 7:00 AM IST

ಪ್ರಧಾನಿ ನರೇಂದ್ರ ಮೋದಿ ವೃದ್ಧರಾಗಿದ್ದು, ಶೀಘ್ರವೇ ರಾಜಕೀಯದಿಂದ ನಿವೃತ್ತಿಯಾಗಿ ಹಿಮಾಲಯಕ್ಕೆ ಹೋಗಲಿ ಎಂದು ಗುಜರಾತ್‌ನ ನೂತನ ಶಾಸಕ ಜಿಗ್ನೇಶ್‌ ಮೇವಾನಿ ಮತ್ತೆ ನಾಲಿಗೆ ಹರಿಬಿಟ್ಟಿದ್ದಾರೆ. ಅದಕ್ಕೆ ಪಟೇಲ್‌ ಮೀಸಲು ಹೋರಾಟಗಾರ ಹಾರ್ದಿಕ್‌ ಪಟೇಲ್‌, ನೂತನ ಶಾಸಕ ಅಲ್ಪೇಶ್‌ ಠಾಕೂರ್‌ ದನಿಗೂಡಿಸಿದ್ದಾರೆ. “ಇಂಡಿಯಾ ಟುಡೇ’ ಚಾನೆಲ್‌ ಜತೆ ಮಾತನಾಡಿದ ಅವರು, ಮೋದಿಯವರಿಗೆ ವಯಸ್ಸಾಗಿದೆ. ಹಾಗಾಗಿ, ತಮ್ಮ ಪ್ರತಿ ಭಾಷಣದಲ್ಲೂ ಹೇಳಿದ್ದನ್ನೇ ಹೇಳುತ್ತಿದ್ದಾರೆ. ಅವರ ಭಾಷಣಗಳಲ್ಲಿ ಹೊಸತೇನೂ ಇರುವುದಿಲ್ಲ. ಇವರಿಗೆ ಈಗ ವಿಶ್ರಾಂತಿಯ ಅಗತ್ಯವಿದೆ. ಹಾಗಾಗಿ, ಅವರು ರಾಜಕೀಯದಿಂದ ನಿವೃತ್ತಿಯಾಗಬೇಕು’ ಎಂದರು. 

ಗುಜರಾತ್‌ನ ಮೂವರು (ಜಿಗ್ನೇಶ್‌, ಅಲ್ಪೇಶ್‌, ಹಾರ್ದಿಕ್‌) ಧರ್ಮ, ಸಮುದಾಯಗಳ ಹೆಸರಿನಲ್ಲಿ ಸಮಾಜ ಒಡೆಯಲು ನಿರ್ಧರಿಸಿದ್ದರು ಎಂದು ಮೋದಿ ಇತ್ತೀಚೆಗೆ ನೀಡಿದ್ದ ಹೇಳಿಕೆಗೆ ಪ್ರತಿಕ್ರಿಯಿಸಿದ ಅವರು, “ನಾವು ಮೂವರು ಎಲ್ಲೇ ಭಾಷಣ ಮಾಡಲಿ, ಗುಜರಾತ್‌ ಅಭಿವೃದ್ಧಿಯ ಬಗ್ಗೆ ಮಾತನಾಡಿದ್ದೇವೆ. ಜಾತಿ ಬಗ್ಗೆ ಸೊಲ್ಲೆತ್ತಿಲ್ಲ. ಹಾಗೆಯೇ, ರಾಜ್ಯದಲ್ಲಿ 2 ಕೋಟಿ ನಿರುದ್ಯೋಗಿ ಗಳು ಇರುವ ಬಗ್ಗೆ ದನಿಯೆತ್ತಿದ್ದೇವೆ. ಆದರೆ, ಅವರಲ್ಲಿ ದಲಿತರೆಷ್ಟು, ಪಟೇಲರೆಷ್ಟು?ಎಂದು ಲೆಕ್ಕ ಹಾಕಿಲ್ಲ” ಎಂದರು.