Monsoon: ಶೇ.8 ಹೆಚ್ಚು ಮಳೆಯೊಂದಿಗೆ ಮುಂಗಾರು ಮುಕ್ತಾಯ: ಹವಾಮಾನ ಇಲಾಖೆ

Team Udayavani, Oct 2, 2024, 6:24 AM IST

ನವದೆಹಲಿ: ವಾಡಿಕೆಗಿಂತ ಶೇ.8ರಷ್ಟು ಹೆಚ್ಚುವರಿ ಮಳೆಯೊಂದಿಗೆ ಪ್ರಸಕ್ತ ವರ್ಷದ ಮುಂಗಾರು ಹಂಗಾಮು ಸೋಮವಾರ ಮುಕ್ತಾಯವಾಗಿದೆ. ಜೂನ್‌ ನಿಂದ ಸೆಪ್ಟೆಂಬರ್‌ ಅವಧಿಯಲ್ಲಿ ಶೇ.8ರಷ್ಟು ಹೆಚ್ಚು ಮಳೆಯಾಗಿದ್ದು, 2020ರ ಬಳಿಕ ಇದೇ ಮೊದಲ ಬಾರಿಗೆ ಅತ್ಯುತ್ತಮ ಮಳೆಯಾದಂತಾಗಿದೆ ಎಂದು ಭಾರತೀಯ ಹವಾಮಾನ ಇಲಾಖೆ ಹೇಳಿದೆ.

ಸಾಮಾನ್ಯವಾಗಿ ಮುಂಗಾರಿನಲ್ಲಿ ದೇಶಾದ್ಯಂತ 868.6 ಮಿ.ಮೀ. ಮಳೆಯಾಗುತ್ತದೆ. ಆದರೆ ಪ್ರಸಕ್ತ ವರ್ಷ 934.8 ಮಿ.ಮೀ. ಮಳೆಯಾಗಿದೆ. ಒಟ್ಟಾರೆಯಾಗಿ ಹೆಚ್ಚುವರಿ ಮಳೆಯಾದರೂ, ಪೂರ್ವ ಮತ್ತು ಈಶಾನ್ಯ ಭಾಗಗಳಲ್ಲಿ ಶೇ.14ರಷ್ಟು ಮಳೆ ಕೊರತೆ ಉಂಟಾಗಿದೆ. ಮಧ್ಯ ಭಾರತದಲ್ಲಿ ಸರಾಸರಿಗಿಂತ ಶೇ.19ರಷ್ಟು ಹೆಚ್ಚು, ವಾಯವ್ಯ ಭಾರತದಲ್ಲಿ ಶೇ.7ರಷ್ಟು ಹೆಚ್ಚು, ದಕ್ಷಿಣದಲ್ಲಿ ಶೇ.14ರಷ್ಟು ಹೆಚ್ಚು ಮಳೆಯಾಗಿದೆ ಎಂದೂ ಇಲಾಖೆ ಹೇಳಿದೆ.

ನೈರುತ್ಯ ಮುಂಗಾರು ಸಂಪೂರ್ಣವಾಗಿ ನಿರ್ಗಮನವಾಗಿಲ್ಲ. ಪೂರ್ವ ಮತ್ತು ಈಶಾನ್ಯ ರಾಜ್ಯಗಳಲ್ಲಿ ಇನ್ನೂ 2 ವಾರ ಉತ್ತಮ ಮಳೆಯಾಗಲಿದ್ದು, ಅ.10ರ ವೇಳೆಗೆ ಪೂರ್ಣ ಪ್ರಮಾಣದಲ್ಲಿ ಮುಂಗಾರು ವಾಪಸಾತಿ ಪ್ರಕ್ರಿಯೆ ಮುಗಿಯಲಿದೆ ಎಂದೂ ಇಲಾಖೆ ತಿಳಿಸಿದೆ.