Lok Sabha 700ಕ್ಕೂ ಹೆಚ್ಚು ಖಾಸಗಿ ಮಸೂದೆಗಳು ಬಾಕಿ ಉಳಿದಿವೆ

Team Udayavani, Nov 18, 2023, 5:42 PM IST

ನವದೆಹಲಿ: ಲೋಕಸಭೆಯಲ್ಲಿ 700 ಕ್ಕೂ ಹೆಚ್ಚು ಖಾಸಗಿ ಮಸೂದೆಗಳು ಬಾಕಿ ಉಳಿದಿದ್ದು,ಅವುಗಳಲ್ಲಿ ಹಲವು ದಂಡದ ನಿಬಂಧನೆಗಳು ಮತ್ತು ಚುನಾವಣಾ ಕಾನೂನುಗಳನ್ನು ತಿದ್ದುಪಡಿ ಮಾಡುವಂತೆ ಕೋರಿವೆ.

ಈ ವಿಧೇಯಕಗಳಲ್ಲಿ ಹಲವು ವಿಧೇಯಕಗಳನ್ನು ಜೂನ್ 2019 ರಲ್ಲಿ ಮಂಡಿಸಲಾಗಿದ್ದರೆ, ಕೆಲವನ್ನು ಈ ವರ್ಷದ ಆಗಸ್ಟ್‌ನಲ್ಲಿ ಸಂಸತ್ತಿನ ಮುಂಗಾರು ಅಧಿವೇಶನದಲ್ಲಿ ಮಂಡಿಸಲಾಯಿತು.

ಖಾಸಗಿ ಮಸೂದೆಗಳು ಸಂಸದರು ತಮ್ಮ ವೈಯಕ್ತಿಕ ಸಾಮರ್ಥ್ಯದಲ್ಲಿ ಮಂಡಿಸುವ ಮಸೂದೆಗಳಾಗಿವೆ. ಖಾಸಗಿ ಮಸೂದೆಯನ್ನು ತರುವ ಉದ್ದೇಶವು ಹೊಸ ಕಾನೂನುಗಳನ್ನು ಪರಿಚಯಿಸುವುದು ಅಥವಾ ಅಸ್ತಿತ್ವದಲ್ಲಿರುವ ಕಾನೂನುಗಳಲ್ಲಿ ಅಗತ್ಯವಿರುವ ಬದಲಾವಣೆಗಳನ್ನು ಎತ್ತಿ ತೋರಿಸುವುದಾಗಿದೆ.

ಶುಕ್ರವಾರ ಹೊರಡಿಸಲಾದ ಲೋಕಸಭೆಯ ಬುಲೆಟಿನ್ ಪ್ರಕಾರ, ಅಂತಹ 713 ಖಾಸಗಿ ಮಸೂದೆಗಳು ಕೆಳಮನೆಯಲ್ಲಿ ಬಾಕಿ ಉಳಿದಿವೆ.

ಈ ಮಸೂದೆಗಳು ಏಕರೂಪ ನಾಗರಿಕ ಸಂಹಿತೆ, ಲಿಂಗ ಸಮಾನತೆ, ಹವಾಮಾನ ಬದಲಾವಣೆ, ಕೃಷಿ, ಅಸ್ತಿತ್ವದಲ್ಲಿರುವ ಕ್ರಿಮಿನಲ್ ಮತ್ತು ಚುನಾವಣಾ ಕಾನೂನುಗಳಿಗೆ ತಿದ್ದುಪಡಿ ಮತ್ತು ಸಾಂವಿಧಾನಿಕ ನಿಬಂಧನೆಗಳನ್ನು ಟ್ವೀಕ್ ಮಾಡುವಂತಹ ವಿಷಯಗಳನ್ನು ಒಳಗೊಂಡಿವೆ.

ಸಂಸತ್ತು ಅಧಿವೇಶನ ನಡೆಯುತ್ತಿರುವಾಗ ಶುಕ್ರವಾರದ ದ್ವಿತೀಯಾರ್ಧದಲ್ಲಿ ಸದಸ್ಯರು ಖಾಸಗಿ ಮಸೂದೆಗಳು ಅಥವಾ ನಿರ್ಣಯಗಳನ್ನು ಲೋಕಸಭೆ ಮತ್ತು ರಾಜ್ಯಸಭೆಯಲ್ಲಿ ಮಂಡಿಸಲು ಅಥವಾ ಚರ್ಚಿಸಲು ಮೀಸಲಿಡಲಾಗಿದೆ.