MP; ಅಶ್ಲೀಲ ವೀಡಿಯೋ ಚಟವಿದ್ದಾತ ತಂಗಿಯನ್ನೇ ರೇಪ್‌ ಮಾಡಿ ಕೊಂದ!

Team Udayavani, Jul 28, 2024, 6:52 AM IST

ರೇವಾ: ಎಪ್ರಿಲ್‌ 24ರಂದು ಮಧ್ಯಪ್ರದೇಶದ ರೇವಾದಲ್ಲಿ ನಡೆದಿದ್ದ 9 ವರ್ಷದ ಬಾಲಕಿಯ ಅತ್ಯಾಚಾರ ಮತ್ತು ಕೊಲೆ ಪ್ರಕರಣವನ್ನು ಪೊಲೀಸರು ಭೇದಿಸಿದ್ದಾರೆ. ಅಶ್ಲೀಲ ವೀಡಿಯೋ ವೀಕ್ಷಿಸುವ ಚಟವಿದ್ದ 13 ವರ್ಷದ ಸಹೋದರನೇ ಈ ಹೇಯ ಕೃತ್ಯ ನಡೆಸಿದ್ದು, ಪ್ರಕರಣದಿಂದ ಮಗನನ್ನು ಪಾರು ಮಾಡಲು ಸ್ವತಃ ಬಾಲಕಿಯ ತಾಯಿ ಹಾಗೂ 17 ಮತ್ತು 18 ವಯಸ್ಸಿನ ಇಬ್ಬರು ಸಹೋದರಿಯರು ಸಾಕ್ಷ್ಯ ನಾಶಕ್ಕೆ ಯತ್ನಿಸಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.

ವಿಚಾರಣೆಯ ಪ್ರಾರಂಭದಲ್ಲಿ ಬಾಲಕಿ ವಿಷಜಂತು ಕಡಿತದಿಂದ ಸಾವನ್ನಪ್ಪಿದ್ದಾಳೆ ಎಂದು ಹೇಳುವ ಮೂಲಕ ಪೋಷಕರು ಪ್ರಕರಣದ ದಿಕ್ಕು ತಪ್ಪಿಸಲು ಪ್ರಯತ್ನಿಸಿದ್ದರು. ಆದರೆ ಮರಣೋತ್ತರ ಪರೀಕ್ಷೆಯ ವೇಳೆ ಬಾಲಕಿ ಮೇಲೆ ಅತ್ಯಾಚಾರ ನಡೆಸಿ ಕತ್ತು ಹಿಸುಕಿ ಕೊಲೆಗೈದಿರುವುದು ದೃಢಪಟ್ಟಿತ್ತು. ಹೀಗಾಗಿ ತನಿಖೆಗೆ ಚುರುಕು ನೀಡಿದ್ದ ಎಸ್‌ಐಟಿ ಅಧಿಕಾರಿಗಳು ತಾಂತ್ರಿಕ ಪುರಾವೆಗಳ ಸಹಿತ ಸುಮಾರು 50 ಜನರನ್ನು ವಿಚಾರಣೆಗೊಳಪಡಿಸಿ, ಆರೋಪಿಗಳನ್ನು ಪತ್ತೆ ಹಚ್ಚಿದ್ದಾರೆ.