ಮುಂಬೈ ಪಾಲಿಕೆ ಚುನಾವಣೆ: ಶೇ.55 ಮತದಾನ

Team Udayavani, Feb 22, 2017, 3:45 AM IST

ಮುಂಬೈ: ಬೃಹನ್ಮುಂಬೈ ಮಹಾನಗರ ಪಾಲಿಕೆ (ಬಿಎಂಸಿ) ಸೇರಿದಂತೆ 9 ಸ್ಥಳೀಯ ಸಂಸ್ಥೆಗಳಿಗೆ ಮಂಗಳವಾರ ಶಾಂತಿಯುತವಾಗಿ ಚುನಾವಣೆ ನಡೆದಿದ್ದು, ಶೇ.52.7ರಷ್ಟು ಮತ ಚಲಾವಣೆ ಆಗಿದೆ. 2012ಕ್ಕೆ ಹೋಲಿಸಿದರೆ ಈ ಬಾರಿ ಶೇ.8ರಷ್ಟು ಹೆಚ್ಚು ಮತದಾನ ಏರಿಕೆ ಕಂಡಿದೆ. ಥಾಣೆ ವಲಯದಲ್ಲಿ ಅತ್ಯಧಿಕ, 53.11ರಷ್ಟು ಮತ ಚಲಾವಣೆ ಆಗಿದೆ. ಎನ್‌ಡಿಎ ಮಿತ್ರಪಕ್ಷ ಶಿವಸೇನೆ ಬಿಜೆಪಿ ಮೈತ್ರಿಯಿಂದ ದೂರವುಳಿದು ಚುನಾವಣೆಯಲ್ಲಿ ಸ್ಪರ್ಧಿಸಿದ್ದು, ಫೆ.23ರಂದು ಫ‌ಲಿತಾಂಶ ಹೊರಬೀಳಲಿದೆ. ಪಾಲಿಕೆಯ ಒಟ್ಟು 227 ವಾರ್ಡ್‌ಗಳಿಗೆ ನಡೆದ ಚುನಾವಣೆಯಲ್ಲಿ 2,275 ಅಭ್ಯರ್ಥಿಗಳು ಕಣದಲ್ಲಿದ್ದರು.

12 ಲಕ್ಷ ಮಂದಿ ಹೆಸರೇ ನಾಪತ್ತೆ!: ಹೌದು, ಮುಂಬೈ ಪಾಲಿಕೆಯ ಒಟ್ಟು 91.8 ಲಕ್ಷ ಮತದಾರರಲ್ಲಿ ಶೇ.13 ಮಂದಿ ಅಂದರೆ 12 ಲಕ್ಷ ಮತದಾರರು ತಮ್ಮ ಹಕ್ಕು ಚಲಾಯಿಸದೆ ನಿರಾಶೆಯಿಂದ ಮನೆಗೆ ಮರಳಿದ್ದಾರೆ. ಮತದಾರರ ಪಟ್ಟಿಯಲ್ಲಿ ಹೆಸರಿಲ್ಲದ ಕಾರಣ, ಪ್ರತಿ ಬೂತ್‌ನಿಂದ 100ಕ್ಕೂ ಅಧಿಕ ಮಂದಿ ಹೀಗೆ ನಿರಾಶೆ ಅನುಭವಿಸಿದ್ದಾರೆ ಎಂದು ಶಿವಸೇನೆ ಚುನಾವಣಾ ಆಯೋಗಕ್ಕೆ ದೂರು ಸಲ್ಲಿಸಿದೆ. ಒಟ್ಟು 7,927 ಬೂತ್‌ಗಳಲ್ಲಿ ಮತದಾನ ನಡೆದಿತ್ತು.