Mumbai; ಕಳ್ಳನ ಬಗ್ಗೆ ಬೆಕ್ಕು ಎಚ್ಚರಿಸಿದರೂ 6 ಸಾವಿರ ಕದ್ದು ಪರಾರಿ!

Team Udayavani, Aug 28, 2024, 6:20 AM IST

ಮುಂಬಯಿ: ಸಾಮಾನ್ಯವಾಗಿ ಮನೆಯನ್ನು ಶ್ವಾನಗಳು ಕಾವಲು ಕಾಯುವುದನ್ನು ನೋಡಿದ್ದೇವೆ. ಆದರೆ ಮಹಾರಾಷ್ಟ್ರದ ಅಂಧೇರಿಯಲ್ಲಿ ಸಿನೆಮಾ ನಿರ್ದೇಶಕಿಯೊಬ್ಬರ ಮನೆಗೆ ಕನ್ನ ಹಾಕಲು ಬಂದಿದ್ದ ಕಳ್ಳನ ಬಗ್ಗೆ ಬೆಕ್ಕೊಂದು ಸುಳಿವು ನೀಡಿ ಎಚ್ಚರಿಸಿರುವ ಘಟನೆ ನಡೆದಿದೆ.

ಮುಂಬಯಿಯ ಅಂಧೇರಿಯ ಅಪಾರ್ಟ್‌ ಮೆಂಟ್‌ ಒಂದರಲ್ಲಿ ನಿರ್ದೇಶಕಿ ಸ್ವಪ್ನಾ ಜೋಶಿ ವಾಸವಿದ್ದಾರೆ. 6ನೇ ಅಂತಸ್ತಿನಲ್ಲಿರುವ ಅವರ ಮನೆಗೆ ಪೈಪ್‌ ಹಿಡಿದು ಹತ್ತಿಬಂದ ಕಳ್ಳ ಸ್ಪೈಡಿಂಗ್‌ ಕಿಟಕಿ ಮೂಲಕ ಪ್ರವೇಶಿಸಿದ್ದಾನೆ. ಸ್ವಪ್ನಾರ ಮಗಳು ಮತ್ತು ಅಳಿಯ ದೇವನ್‌ ಅವರ ಕೊಠಡಿಗೆ ಇಣುಕಿ ಪರ್ಸ್‌ನಿಂದ 6 ಸಾವಿರ ರೂ.ಗಳನ್ನು ಕದ್ದಿದ್ದಾನೆ. ಇದನ್ನೆಲ್ಲ ಗಮನಿಸುತ್ತಿದ್ದ ಆ ಮನೆಯ ಸಾಕು ಬೆಕ್ಕು, ದೇವನ್‌ ಅವರು ನಿದ್ರಿಸುತ್ತಿದ್ದ ಕೊಠಡಿಗೆ ತೆರಳಿ, ಅವರ ಕಾಲ ಮೇಲೆ ಜಿಗಿದಿದೆ. ಇದರಿಂದ ಎಚ್ಚರಗೊಂಡ ದೇವನ್‌ ಕಳ್ಳ ಎಂದು ಕೂಗಿದ್ದಾರೆ. ಕಳ್ಳನನ್ನು ಹಿಡಿಯುವ ಪ್ರಯತ್ನದ ನಡುವೆಯೇ ಆತ ಪರಾರಿಯಾಗಿದ್ದಾನೆ.

ಈ ಬಗ್ಗೆ ಪ್ರತಿಕ್ರಿಯೆ ನೀಡಿದ ನಿರ್ದೇಶಕಿ ಸ್ವಪ್ನಾ ಅವರು ಕಳ್ಳನ ಮನೆ ಪ್ರವೇಶದಿಂದ ಆಘಾತಕ್ಕೆ ಒಳಗಾಗಿರುವುದಾಗಿ ಹೇಳಿದ್ದಾರೆ.