100 ಕೋಟಿ ಲಂಚ: ಸಚಿವ ದೇಶ್‌ಮುಖ್‌ಗೆ ಸಂಕಷ್ಟ

Team Udayavani, Mar 21, 2021, 7:40 AM IST

ಮುಂಬಯಿ/ಹೊಸದಿಲ್ಲಿ: ಬಂಧಿತ ಪೊಲೀಸ್‌ ಅಧಿಕಾರಿ ಸಚಿನ್‌ ವಾಜೆ ಅವರಿಗೆ ಮಹಾರಾಷ್ಟ್ರ ಗೃಹ ಸಚಿವ ಅನಿಲ್‌ ದೇಶ್‌ಮುಖ್‌ ಪ್ರತೀ ತಿಂಗಳು 100 ಕೋಟಿ ರೂ. ಸಂಗ್ರಹಿಸುವ ಗುರಿ ನೀಡಿದ್ದರು. ಹೀಗೆಂದು ಎತ್ತಂಗಡಿಯಾಗಿರುವ ಮುಂಬಯಿ ಪೊಲೀಸ್‌ ಆಯುಕ್ತ ಪರಂಬೀರ್‌ ಸಿಂಗ್‌ ಶನಿವಾರ ಆರೋಪಿಸಿದ್ದಾರೆ.

ಈ ಬಗ್ಗೆ ಮುಖ್ಯಮಂತ್ರಿ ಉದ್ಧವ್‌ ಠಾಕ್ರೆಗೆ ಪತ್ರವನ್ನೂ ಬರೆದಿದ್ದಾರೆ. ಈ ಗುರಿ ಸಾಧಿಸಲು 1,750 ಬಾರ್‌ ಮತ್ತು ರೆಸ್ಟೋರೆಂಟ್‌ಗಳಿಂದ ತಲಾ 2-3 ಲಕ್ಷ ರೂ. ಪಡೆದುಕೊಂಡರೆ 100 ಕೋಟಿ ರೂ. ಸಂಗ್ರಹಿಸಬಹುದು ಎಂದು ತಿಳಿಸಿದ್ದರು.  ಈ ಮೂಲಕ 50 ಕೋಟಿ ರೂ.ಸಂಗ್ರಹಿಸಬಹುದು. ಉಳಿದ 50 ಕೋಟಿ ರೂ. ಮೊತ್ತವನ್ನು ಇತರ ಮೂಲಗಳಿಂದ ಪಡೆಯಬಹುದು ಸಚಿವರು ಸೂಚಿಸಿದ್ದರು ಎಂದು ದೂರಿದ್ದಾರೆ. ಈ ಬೆಳವಣಿಗೆ ಹಿನ್ನೆಲೆಯಲ್ಲಿ ಮಹಾರಾಷ್ಟ್ರ ಗೃಹ ಸಚಿವ ಅನಿಲ್‌ ದೇಶ್‌ಮುಖ್‌ರನ್ನು ವಜಾ ಮಾಡುವ ಸಾಧ್ಯತೆಗಳಿವೆ ಎಂದು ಹಲವು ಆಂಗ್ಲ ಸುದ್ದಿವಾಹಿನಿಗಳು ವರದಿ ಮಾಡಿವೆ.

ಉದ್ಯಮಿ ಮುಕೇಶ್‌ ಅಂಬಾನಿ ನಿವಾಸದ ಮುಂದೆ ಸ್ಫೋಟಕ ಇರಿಸಿದ ಪ್ರಕರಣದ ತನಿಖೆಯಲ್ಲಿ ನಿರೀಕ್ಷಿತ ಸಾಧನೆ ಮಾಡದ್ದಕ್ಕಾಗಿ ಸಿಂಗ್‌ ಅವರನ್ನು ಇತ್ತೀಚೆಗೆ ವರ್ಗಾಯಿಸಲಾಗಿತ್ತು.   ಈ ಪ್ರಕರಣದಿಂದಾಗಿ ಎಂವಿಎ ಸರಕಾರಕ್ಕೆ ಮತ್ತಷ್ಟು ಸಮಸ್ಯೆ ತಲೆದೋರಿದಂತಾಗಿದೆ. ಈ ಬಗ್ಗೆ ಟ್ವೀಟ್‌ ಮೂಲಕ ಪ್ರತಿಕ್ರಿಯೆ ನೀಡಿದ ಸಚಿವ ಅನಿಲ್‌ ದೇಶ್‌ಮುಖ್‌, ಪ್ರಕರಣದಲ್ಲಿ  ಸಿಂಗ್‌ ಶಾಮೀಲಾಗಿದ್ದಾರೆ. ಅದು ಅವರನ್ನು ಬಾಧಿಸಬಹುದು. ಕಾನೂನು ಕ್ರಮಗಳಿಂದ ರಕ್ಷಿಸಲು ಇಂಥ ಆರೋಪ ಮಾಡುತ್ತಿದ್ದಾರೆ ಎಂದರು. ಇದೇ ವೇಳೆ, ಥಾಣೆಯ ಉದ್ಯಮಿ ಮಾನ್ಸುಖ್‌ ಹಿರೆನ್‌ ಸಾವಿನ ತನಿಖೆಯ ಹೊಣೆಯನ್ನು  ಕೇಂದ್ರ ಸರಕಾರ ಎನ್‌ಐಎಗೆ ವಹಿಸಿದೆ.