ಚುನಾವಣೆಗೂ ಮುನ್ನವೇ ಎನ್‌ಸಿಪಿಗೆ ಆಘಾತ

Team Udayavani, Jul 26, 2019, 5:10 AM IST

ಮುಂಬೈ: ಮಹಾರಾಷ್ಟ್ರ ವಿಧಾನಸಭೆ ಚುನಾವಣೆ ಸಮೀಪಿಸುತ್ತಿರುವಂತೆಯೇ ಎನ್‌ಸಿಪಿಗೆ ಬಹುದೊಡ್ಡ ಆಘಾತ ಎಂಬಂತೆ, ಮುಂಬೈ ಎನ್‌ಸಿಪಿ ಅಧ್ಯಕ್ಷ ಸಚಿನ್‌ ಅಹಿರ್‌ ಗುರುವಾರ ಶಿವಸೇನೆಗೆ ಸೇರ್ಪಡೆಯಾಗಿದ್ದಾರೆ.

ಹಿಂದಿನ ಕಾಂಗ್ರೆಸ್‌-ಎನ್‌ಸಿಪಿ ಸಮ್ಮಿಶ್ರ ಸರ್ಕಾರದಲ್ಲಿ ಸಚಿವರಾಗಿದ್ದ ಅಹಿರ್‌ ಅವರು ಮುಂಬೈನಲ್ಲಿ ಶಿವಸೇನೆ ಅಧ್ಯಕ್ಷ ಉದ್ಧವ್‌ ಠಾಕ್ರೆ ಹಾಗೂ ಯುವ ಸೇನಾ ಮುಖ್ಯಸ್ಥ ಆದಿತ್ಯ ಠಾಕ್ರೆ ಸಮ್ಮುಖದಲ್ಲಿ ಪಕ್ಷಕ್ಕೆ ಸೇರ್ಪಡೆಯಾಗಿದ್ದಾರೆ. ಇದೇ ವೇಳೆ, ಮಿತ್ರಪಕ್ಷ ಬಿಜೆಪಿಗೆ ಟಾಂಗ್‌ ಕೊಟ್ಟ ಉದ್ಧವ್‌ ಠಾಕ್ರೆ, ‘ಬೇರೆ ಪಕ್ಷಗಳನ್ನು ಇಬ್ಭಾಗ ಮಾಡುವ ಅಭ್ಯಾಸ ಶಿವಸೇನೆಗಿಲ್ಲ. ನಮ್ಮ ಪಕ್ಷವೂ ಬೆಳೆಯಲು ಬಯಸುತ್ತದೆ. ಆದರೆ, ನೈತಿಕತೆ ಮತ್ತು ಮೌಲ್ಯಗಳೊಂದಿಗೆ ರಾಜಿ ಮಾಡಿಕೊಂಡು ಅಲ್ಲ’ ಎಂದಿದ್ದಾರೆ.

ಭುಜ್‌ಬಲ್ ಶಿವಸೇನೆಗೆ?: ಎನ್‌ಸಿಪಿ ಮತ್ತೂಬ್ಬ ಹಿರಿಯ ನಾಯಕ ಛಗನ್‌ ಭುಜ್‌ಬಲ್ ಅವರೂ ಶಿವಸೇನೆಗೆ ಸೇರುತ್ತಾರೆ ಎಂಬ ಸುದ್ದಿಗಳು ಹರಿದಾಡಿದ್ದು, ಈ ಸುದ್ದಿಯಲ್ಲಿ ಹುರುಳಿಲ್ಲ ಎಂದು ಭುಜ್‌ಬಲ್ ಹೇಳಿದ್ದಾರೆ.