ರೈಲಲ್ಲೇ ಮ್ಯೂಸಿಯಂ!

Team Udayavani, Dec 17, 2018, 6:25 AM IST

ಹೊಸದಿಲ್ಲಿ: ಇನ್ನು ಪ್ರಯಾಣಿಕರು ರಾಷ್ಟ್ರೀಯ ರೈಲ್ವೆ ಮ್ಯೂಸಿಯಂ ನೋಡಲು ಅಲ್ಲಿಗೇ ತೆರಳಬೇಕಿಲ್ಲ. ರೈಲಿನಲ್ಲಿ ಕುಳಿತೇ ಮ್ಯೂಸಿಯಂ ಅನ್ನು ಕಣ್ತುಂಬಿಕೊಳ್ಳಬಹುದು. ದೇಶದ ರೈಲ್ವೆ ಇತಿಹಾಸ ಹಾಗೂ ಪರಂಪರೆಯನ್ನು ತಿಳಿಸಲು ಡಿಜಿಟಲ್‌ ವೇದಿಕೆಯನ್ನು ರೈಲ್ವೆ ಇಲಾಖೆ ಬಳಸಿಕೊಳ್ಳುತ್ತಿದ್ದು, 3ಡಿ ಇಮೇಜಿಂಗ್‌ ಬಳಸಿ ವರ್ಚುವಲ್‌ ವ್ಯವಸ್ಥೆ ರೂಪಿಸಿದೆ. ಇದಕ್ಕಾಗಿ ಇಲಾಖೆ ಗೂಗಲ್‌ ಜತೆ ಒಪ್ಪಂದ ಮಾಡಿಕೊಂಡಿದೆ. ಅದರಂತೆ, ಪ್ರಯಾಣಿಕರಿಗೆ ವರ್ಚುವಲ್‌ ರಿಯಾಲಿಟಿ ಕನ್ನಡಕಗಳನ್ನು ಬಾಡಿಗೆಗೆ ಒದಗಿಸಲಿದೆ. ಈ ಕನ್ನಡಕ ಬಳಸಿ ಪ್ರಯಾಣಿಕರು ಕುಳಿತಲ್ಲೇ ರೈಲ್ವೆ ಪಾರಂಪರಿಕ ತಾಣ ವೀಕ್ಷಿಸ ಬಹುದು. ಅಷ್ಟೇ ಅಲ್ಲ, ಈ ವರ್ಚುವಲ್‌ ರಿಯಾಲಿಟಿ ಹೆಡ್‌ಸೆಟ್‌ಗಳನ್ನು ಶಾಲೆಗಳಿಗೆ ತೆಗೆದುಕೊಂಡು ಹೋಗಿ, ಅಲ್ಲಿನ ಮಕ್ಕಳಿಗೂ ಇದನ್ನು ತೋರಿಸುವ ಯೋಜನೆಯೂ ಇದೆ.