ರೈಲು ನಿಲ್ದಾಣದಲ್ಲಿ ಭೂತ ಇಲ್ಲ,ಪಿಶಾಚಿಯೂ ಇಲ್ಲ!

Team Udayavani, Dec 31, 2017, 2:37 PM IST

ಬೆಗುಂಕೊದೊರ್‌ (ಪಶ್ಚಿಮ ಬಂಗಾಲ): ದೆವ್ವ, ಭೂತಗಳ ನಿಲ್ದಾಣವೆಂದು ಕುಖ್ಯಾತಿ ಪಡೆದಿರುವ ಪುರೂಲಿಯಾ ಜಿಲ್ಲೆಯ ಬೆಗುಂಕೊದೊರ್‌ ರೈಲ್ವೇ ನಿಲ್ದಾಣ ದಲ್ಲಿ ಉತ್ಸಾಹಿ ಯುವಕರ ತಂಡವೊಂದು ರಾತ್ರಿಯನ್ನು ಕಳೆದು ಸ್ಥಳೀಯ ಜನರ ಮೌಡ್ಯವನ್ನು ಸಾಬೀತುಪಡಿಸಿದೆ.

ವಿಚಾರವಾದಿಗಳ ವೇದಿಕೆಯಾದ ಪಶ್ಚಿಮ್‌ ಬಾಂಗ್ಲಾ ಬಿಗ್ಯಾನ್‌ ಮಂಚ್‌ಗೆ ಸೇರಿದ ಒಂಬತ್ತು ಯುವಕರು ಈ ರೈಲು ನಿಲ್ದಾಣದಲ್ಲಿ ಗುರುವಾರ ರಾತ್ರಿ ಯಾವುದೇ ಆತಂಕವಿಲ್ಲದೆ ಕಳೆದಿದ್ದಾರೆ. ಇವರಿಗೆ ಕೆಲ ಪೊಲೀಸ್‌ ಸಿಬಂ ದಿಯೂ ಸಾಥ್‌ ನೀಡಿದ್ದು ವಿಶೇಷ. ಸಂಶೋಧನೆಯ ದೃಷ್ಟಿಯಲ್ಲಿ ಇವರೆಲ್ಲರೂ ಕೆಮರಾ, ಕಂಪಾಸ್‌ ಮುಂತಾದ ಪರಿಕರಗಳನ್ನಿಟ್ಟುಕೊಂಡೇ ನಿಲ್ದಾಣದಲ್ಲಿ ರಾತ್ರಿ ಕಳೆದಿದ್ದಾರೆ.

ಕುಖ್ಯಾತಿಗೆ ಕಾರಣ: ಅಯೋಧ್ಯಾ ಹಿಲ್ಸ್‌ ಬಳಿಯಿರುವ ಈ ಬೆಗುಂಕೊದೊರ್‌ ರೈಲು ನಿಲ್ದಾಣ, ಪುರೂಲಿಯಾ ಜಿಲ್ಲಾ ಕೇಂದ್ರದಿಂದ ಸುಮಾರು 50 ಕಿ.ಮೀ. ದೂರದಲ್ಲಿದೆ. 1960ರಲ್ಲಿ ನಿರ್ಮಾಣವಾಗಿದ್ದ ಈ ರೈಲು ನಿಲ್ದಾಣಕ್ಕೆ 1967ರಿಂದ ದೆವ್ವಗಳ ನಿಲ್ದಾಣ ವೆಂಬ ಹಣೆಪಟ್ಟಿ ಅಂಟಿಕೊಂಡಿತು. ಇದಕ್ಕೆ ಕಾರಣ, ಆ ವರ್ಷದ ಒಂದು ರಾತ್ರಿ ನಿಲ್ದಾ ಣದ ಸ್ಟೇಷನ್‌ ಮಾಸ್ಟರ್‌, ಬಿಳಿ ಸೀರೆಯುಟ್ಟಿದ್ದ ಹೆಣ್ಣೊಬ್ಬಳು ನಿಲ್ದಾಣದ ಬಳಿಯ ರೈಲ್ವೆ ಹಳಿಗಳ ಮೇಲೆ ನಡೆದುಕೊಂಡಿದ್ದನ್ನು ನೋಡಿ ಎದೆಯೊಡೆದು ಸತ್ತೇ ಹೋಗಿದ್ದು.

ಹೀಗಾಗಿ, ಇಲ್ಲಿಗೆ ಯಾವ ಪ್ರಯಾಣಿಕರೂ ಬರುತ್ತಿರಲಿಲ್ಲ. ಈ ನಿಲ್ದಾಣವನ್ನು ಮುಚ್ಚಲಾಗಿತ್ತು. ಆದರೆ, ಮಮತಾ ಬ್ಯಾನರ್ಜಿ ಅವರು ಪಶ್ಚಿಮ ಬಂಗಾಲದ ಸಿಎಂ ಆದ ಅನಂತರ, ಈ ನಿಲ್ದಾಣ 2009ರಲ್ಲಿ ಪುನರಾರಂಭವಾಯಿತು. ಆಗಿನಿಂದ ಇಲ್ಲಿ ರೈಲು, ಜನರು ಓಡಾಡುತ್ತಾರಾದರೂ ಸಂಜೆ 5ರ ಅನಂತರ ಯಾರೂ ಇತ್ತ ಸುಳಿಯುತ್ತಲೇ ಇರಲಿಲ್ಲ.