ಆಯುಷ್ಮಾನ್‌ ಭಾರತ: 111 ಆಸ್ಪತ್ರೆಗಳ ಮಾನ ಹರಾಜು

Team Udayavani, Oct 1, 2019, 8:00 PM IST

ಹೊಸದಿಲ್ಲಿ: “ಪ್ರಧಾನ ಮಂತ್ರಿಯವರ ಜನ ಆರೋಗ್ಯ ಯೋಜನೆ’ ಅಥವಾ “ಆಯುಷ್ಮಾನ್‌ ಭಾರತ್‌’ (ಎಬಿ-ಪಿಎಂಜೆಎವೈ) ಯೋಜನೆಯನ್ನು ದುರುಪಯೋಗ ಪಡಿಸಿಕೊಳ್ಳುತ್ತಿರುವ ಆಸ್ಪತ್ರೆಗಳ ಬಗ್ಗೆ ಬಹಿರಂಗವಾಗಿ ವಾಗ್ಧಂಡನೆ ವಿಧಿಸುವ ಕಾರ್ಯಕ್ಕೆ ಕೇಂದ್ರ ಸರಕಾರ ಚಾಲನೆ ನೀಡಿದೆ. ಮೊದಲ ಹಂತದಲ್ಲಿ 111 ಆಸ್ಪತ್ರೆಗಳನ್ನು ಗುರುತಿಸಿ ಅವುಗಳ ಹೆಸರುಗಳನ್ನು ಆರೋಗ್ಯ ಇಲಾಖೆಯ ವೆಬ್‌ಸೈಟ್‌ನಲ್ಲಿ ಹಾಕಲಾಗಿದೆ.

“ಎಬಿ-ಪಿಎಂಜೆಎವೈ’ ಜಾರಿಗೆ ಬಂದು ಒಂದು ವರ್ಷ ತುಂಬಿದ ಹಿನ್ನೆಲೆಯಲ್ಲಿ ರಾಷ್ಟ್ರೀಯ ಆರೋಗ್ಯ ಆಯೋಗ (ಎನ್‌ಎಚ್‌ಎ) ಆಯೋಜಿಸಿದ್ದ ಸಮಾರಂಭದಲ್ಲಿ ಮಾತನಾಡಿದ ಸಚಿವ ಡಾ. ಹರ್ಷವರ್ಧನ್ ಅವರು, ಎಬಿ-ಪಿಎಂಜೆಎವೈ ಯೋಜನೆಯನ್ನು ದುರುಪಯೋಗ ಮಾಡುವ ಅಥವಾ ಆ ಯೋಜನೆಯ ವಿಚಾರವಾಗಿ ಸಾರ್ವಜನಿಕರಿಗೆ, ಸರಕಾರಕ್ಕೆ ವಂಚನೆ ಮಾಡುವ ಆಸ್ಪತ್ರೆಗಳನ್ನು ಕ್ಷಮಿಸುವ ಮಾತೇ ಇಲ್ಲ ಎಂದು ಎಚ್ಚರಿಸಿದರು.

“ಎಬಿ-ಪಿಎಂಜೆಎವೈ ಯೋಜನೆಯನ್ನು ಹೊಸ ಆವೃತ್ತಿಯ ಸಾಫ್ಟ್ವೇರ್‌ ವ್ಯಾಪ್ತಿಯಲ್ಲಿ ತರಲಾಗುತ್ತಿದ್ದು, ಅದು ಸಾರ್ವಜನಿಕರಿಗೆ ಮತ್ತಷ್ಟು ಉಪಯೋಗಗಳನ್ನು ಕಲ್ಪಿಸಲಿದೆ”ಎಂದು ಸಚಿವರು ತಿಳಿಸಿದ್ದಾರೆ.