Sharad Pawar: ಚುನಾವಣಾ ರಾಜಕೀಯ ನಿವೃತ್ತಿ ಸುಳಿವು ನೀಡಿದ ಎನ್‌ಸಿಪಿ ವರಿಷ್ಠ ಶರದ್‌

Team Udayavani, Nov 6, 2024, 6:53 AM IST

ಬಾರಾಮತಿ: ಎನ್‌ಸಿಪಿ (ಎಸ್‌ಪಿ) ನೇತಾರ ಶರದ್‌ ಪವಾರ್‌ ಅವರು ಚುನಾವಣಾ ರಾಜಕೀಯದಿಂದ ನಿವೃತ್ತಿ ಹೊಂದುವ ಸುಳಿವು ನೀಡಿದ್ದಾರೆ.

ತಮ್ಮ ಕುಟುಂಬದ ಶಕ್ತಿ ಕೇಂದ್ರ ಬಾರಾಮತಿಯಲ್ಲಿ ಮೊಮ್ಮಗ ಯುಗೇಂದ್ರ ಪವಾರ್‌ ಪರ ಪ್ರಚಾರ ನಡೆಸಿದ 83 ವರ್ಷದ ಪವಾರ್‌, ನನ್ನ ರಾಜ್ಯಸಭಾ ಸದಸ್ಯತ್ವ ಅವಧಿ ಇನ್ನು 18 ತಿಂಗಳಿದ್ದು, ಮತ್ತೆ ರಾಜ್ಯಸಭೆಗೆ ಹೋಗಬೇಕೇ, ಬೇಡವೇ ಎಂದು ಯೋಚಿಸುತ್ತಿದ್ದೇನೆ. ಒಂದು ಹಂತದಲ್ಲಿ ಎಲ್ಲದಕ್ಕೂ ಪೂರ್ಣವಿರಾಮ ಹಾಕಬೇಕಾಗುತ್ತದೆ. ಇಲ್ಲಿನ ಜನ ನನ್ನನ್ನು 4 ಬಾರಿ ಮುಖ್ಯಮಂತ್ರಿಯಾಗಿ ಮಾಡಿದ್ದಾರೆ. ಮಹಾರಾಷ್ಟ್ರ ತೊರೆಯುವ ಮುಂಚೆ ನಾನು ಅಜಿತ್‌ ದಾದಾಗೆ ಎಲ್ಲವನ್ನು ವಹಿಸಿದ್ದೆ. ಕಳೆದ 25-30 ವರ್ಷದಲ್ಲಿ ಅಜಿತ್‌ ಪವಾರ್‌ ದುಡಿದಿದ್ದಾರೆ. ಇದರಲ್ಲಿ ನಮಗೆ ಯಾವುದೇ ಸಂಶಯವಿಲ್ಲ. ಆದರೆ ಈಗ ಭವಿಷ್ಯಕ್ಕೆ ಸಿದ್ಧಗೊಳ್ಳಬೇಕಿದೆ. ಮುಂದಿನ 30 ವರ್ಷಕ್ಕಾಗಿ ಕೆಲಸ ಮಾಡುವ ನಾಯಕತ್ವ ನಮಗೆ ಅಗತ್ಯವಿದ್ದು ಪ್ರತಿಯೊಬ್ಬರಿಗೂ ಅವಕಾಶ ಸಿಗಬೇಕಿದೆ ಎಂದಿದ್ದಾರೆ.