ಚಿಕಿತ್ಸೆಗೂ ಬೇಕು ಐಡಿ ಕಾರ್ಡ್‌!

Team Udayavani, Oct 29, 2017, 6:15 AM IST

ಪಣಜಿ: ಇನ್ನು ಮುಂದೆ ಗೋವಾದ ಆಸ್ಪತ್ರೆಗಳಲ್ಲಿ ಚಿಕಿತ್ಸೆ ಪಡೆಯುವವರು ಗಮನಿಸಿ. ಕಡ್ಡಾಯವಾಗಿ ಗುರುತಿನ ಚೀಟಿ ತೋರಿಸಲೇ ಬೇಕು. ಇಲ್ಲದಿದ್ದರೆ ಚಿಕಿತ್ಸೆಯೇ ಸಿಗದು. ಹೀಗೆಂದು ಆರೋಗ್ಯ ಸಚಿವ ವಿಶ್ವಜಿತ್‌ ರಾಣೆ ಖಡಕ್‌ ಆಗಿ ಹೇಳಿದ್ದಾರೆ. ಇದಕ್ಕೆ ಎಷ್ಟು ಟೀಕೆಗಳು ವ್ಯಕ್ತವಾದರೂ, ನಾನು ಈ ನೀತಿಯನ್ನು ಜಾರಿ ಮಾಡಿಯೇ ತೀರುತ್ತೇನೆ ಎಂದಿದ್ದಾರೆ ರಾಣೆ.

ಕಠಿಣ ನಿರ್ಧಾರದ ಬಗ್ಗೆ ವಿವರಣೆ ನೀಡಿದ ಅವರು ಮುಂಬೈನಲ್ಲಿ ರಾಜ್ಯದ ರೋಗಿಗಳಿಗೆ ಶುಲ್ಕ ವಿಧಿಸಲಾಗುತ್ತದೆ. ಅದೇ ಮಾದರಿ ಇಲ್ಲಿಯೂ ಅನುಸರಿಸಲಾಗುತ್ತದೆ. ನಮ್ಮ ಗೋವಾದ ಜನತೆಯ ಒಳಿತಿಗಾಗಿ ರೂಪಿಸಲಾಗುತ್ತಿದೆ. ನಾವು ಯಾರಿಗೂ ಚಿಕಿತ್ಸೆ ನಿರಾಕರಿಸುವುದಿಲ್ಲ. ಆದರೆ ಹೊರಗಿನವರು ಚಿಕಿತ್ಸೆಗೆ ಬಂದರೆ, ಶುಲ್ಕ ತೆರಬೇಕಾಗುತ್ತದೆ. ಗೋವಾದ ಜನ ಮುಂಬೈನ ಕೆಇಎಂ ಆಸ್ಪತ್ರೆಗೆ ತೆರಳಿದರೆ ಕನಿಷ್ಠ ಶುಲ್ಕ ವಿಧಿಸಲಾಗುತ್ತದೆ. ಅದೇ ಮಾದರಿಯನ್ನು ಗೋವಾದ ಆಸ್ಪತ್ರೆಗಳಲ್ಲೂ ಅನುಸರಿಸುತ್ತೇವೆ ಎಂದು ರಾಣೆ ತಿಳಿಸಿದ್ದಾರೆ.