ಜ.6ರೊಳಗೆ ನೀಟ್‌ ಕೌನ್ಸೆಲಿಂಗ್‌: ಕೇಂದ್ರ

Team Udayavani, Jan 1, 2022, 6:15 AM IST

ಹೊಸದಿಲ್ಲಿ: ನೀಟ್‌-ಪಿಜಿ ಕೌನ್ಸೆಲಿಂಗ್‌ ಅನ್ನು ಜ.6ರೊಳಗೆ ನಡೆಸುವುದಾಗಿ ಕೇಂದ್ರ ಆರೋಗ್ಯ ಸಚಿವ ಮನ್‌ಸುಖ್‌ ಮಾಂಡವಿಯಾ ಭರವಸೆ ಕೊಟ್ಟಿದ್ದಾರೆ.

ಈ ಬಗ್ಗೆ ಭಾರತೀಯ ವೈದ್ಯಕೀಯ ಸಂಘ(ಐಎಂಎ) ಶುಕ್ರವಾರ ಹೇಳಿಕೆಯಲ್ಲಿ ತಿಳಿಸಿದೆ. ಆ ಹಿನ್ನೆಲೆಯಲ್ಲಿ ಸತತ ಎರಡು ವಾರಗಳ ಕಾಲ ನಡೆದ ವಸತಿ ವೈದ್ಯರ ಹೋರಾಟವನ್ನು ಕೈಬಿಡಲಾಗಿದೆ. “ನೀಟ್‌-ಪಿಜಿ ಕೌನ್ಸೆಲಿಂಗ್‌ನ್ನು ಜ.6ರೊಳಗೆ ನಡೆಸಲಾಗುವುದು.

ಪ್ರತಿಭಟಿಸಿದ ವೈದ್ಯರ ಮೇಲೆ ಎಫ್ಐಆರ್‌ ಹಾಕಲಾಗುವುದಿಲ್ಲ ಎಂದು ಸಚಿವರು ಭರವಸೆ ನೀಡಿದ್ದಾರೆ ಎಂದು ಐಎಂಎ ಅಧ್ಯಕ್ಷ ಸಹಜಾನಂದ ಪ್ರಸಾದ್‌ ಸಿಂಗ್‌ ತಿಳಿಸಿದ್ದಾರೆ.

ಇದನ್ನೂ ಓದಿ:ಪ್ರವಾಹ ಪರಿಹಾರ ತಕ್ಷಣ ಬಿಡುಗಡೆ: ಕಾರಜೋಳ

ಇದಕ್ಕೂ ಮೊದಲು, ಫೆಡರೇಶನ್‌ ಆಫ್ ರೆಸಿಡೆಂಟ್‌ ಡಾಕ್ಟರ್ಸ್‌ ಅಸೋಸಿಯೇಶ‌ನ್‌ನ (ಎಫ್ಒಆರ್‌ಡಿಎ) ಸದಸ್ಯರು ದಿಲ್ಲಿ ಪೊಲೀಸ್‌ ಆಯುಕ್ತರನ್ನು ಭೇಟಿಯಾಗಿ, ಚರ್ಚಿಸಿದ್ದಾರೆ. ಹೋರಾಟನಿರತ ವೈದ್ಯರ ಮೇಲೆ ಎಫ್ಐಆರ್‌ ದಾಖಲಿಸಿದ್ದನ್ನು ಹಿಂಪಡೆಯುವ ವಿಚಾರದಲ್ಲಿ ಚರ್ಚೆ ನಡೆಸಲಾಯಿತು. ಬಳಿಕ ಹೋರಾಟ ಕೈಬಿಡುವ ನಿರ್ಧಾರ ಪ್ರಕಟಿಸಲಾಯಿತು.