ಶ್ರಮಿಕ ರೈಲಿಗೆ ಯಾರ ಅಪ್ಪಣೆಯೂ ಬೇಕಿಲ್ಲ: ರೈಲ್ವೇ ಸಚಿವಾಲಯದ ಹೊಸ ಆದೇಶ

Team Udayavani, May 20, 2020, 11:49 AM IST

ವಿಜಯವಾಡದಲ್ಲಿ ವಲಸೆ ಕಾರ್ಮಿಕರು ತಮ್ಮ ಊರು ಸೇರಲು ಲಾರಿಯನ್ನೇರುತ್ತಿರುವುದು.

ಹೊಸದಿಲ್ಲಿ: ವಲಸೆ ಕಾರ್ಮಿಕರ ಪ್ರಯಾಣಕ್ಕೆ ಶ್ರಮಿಕ ವಿಶೇಷ ರೈಲುಗಳ ಸಂಚಾರಕ್ಕೆ ರಾಜ್ಯಗಳ ಅನುಮತಿ ಪಡೆಯಬೇಕಾಗಿಲ್ಲ. ಹೀಗೆಂದು ರೈಲ್ವೇ ಸಚಿವಾಲಯ ಮಂಗಳವಾರ ಸ್ಪಷ್ಟನೆ ನೀಡಿದೆ. ವಿಶೇಷ ರೈಲುಗಳ ಸಂಚಾರಕ್ಕೆ ಪಶ್ಚಿಮ ಬಂಗಾಲ, ಝಾರ್ಖಂಡ್‌, ಛತ್ತೀಸ್‌ಘಡ ಸರ್ಕಾರಗಳು ಒಪ್ಪಿಗೆ ಸೂಚಿಸುವಲ್ಲಿ ವಿಳಂಬ ಮಾಡುತ್ತಿವೆ ಎಂದು ರೈಲ್ವೇ ಸಚಿವ ಪಿಯೂಷ್‌ ಗೋಯಲ್‌ ಹೇಳಿಕೆಯಿಂದ ವಿವಾದ ಉಂಟಾಗಿದ್ದ ಹಿನ್ನೆಲೆಯಲ್ಲಿ ಈ ಸ್ಪಷ್ಟನೆ ಹೊರಬಿದ್ದಿದೆ. ಇದಕ್ಕಿಂತ ಮೊದಲು ಕೇಂದ್ರ ಗೃಹ ಸಚಿವಾಲಯ ವಲಸೆ ಕಾರ್ಮಿಕರು ಸಂಚರಿಸುವ ಶ್ರಮಿಕ್‌ ವಿಶೇಷ ರೈಲುಗಳ ಸಂಚಾರದ ಬಗ್ಗೆ ನೂತನ ಸಾಮಾನ್ಯ ಕಾರ್ಯಾಚರಣೆ ಶಿಷ್ಟಾಚಾರ (ಎಸ್‌ಒಪಿ)ವನ್ನು ಬಿಡುಗಡೆ ಮಾಡಲಾಯಿತು. ಅದರ ಪ್ರಕಾರ ರಾಜ್ಯ ಮತ್ತು ಕೇಂದ್ರಾಡಳಿತ ಪ್ರದೇಶಗಳು ತಮ್ಮಲ್ಲಿಂದ ವಲಸೆ ಕಾರ್ಮಿಕರನ್ನು ಕಳುಹಿಸುವ ಮತ್ತು ಆಗಮಿಸುವವರಿಗೆ ವೈದ್ಯಕೀಯ ಪರೀಕ್ಷೆ, ಪ್ರಯಾಣ, ಕ್ವಾರಂಟೈನ್‌ ಬಗ್ಗೆ ಸೂಕ್ತ ವ್ಯವಸ್ಥೆ ಮಾಡಬೇಕು. ಈ ನಿಟ್ಟಿನಲ್ಲಿ ಅಧಿಕಾರಿಗಳನ್ನು ಮತ್ತು ಸಂಸ್ಥೆಗಳನ್ನು ನಿಯುಕ್ತಿ ಗೊಳಿಸಬೇಕು ಎಂದು ಎಸ್‌ಒಪಿಯಲ್ಲಿ ಸೂಚಿಸಲಾಗಿದೆ.

ಮನವಿ ಸಲ್ಲಿಸಿ: ಪರಿಷ್ಕೃತ ಎಸ್‌ಒಪಿ ಜಾರಿಗೊಳಿಸುವ ಮೊದಲು (ಮೇ 18) ರಾಜ್ಯಗಳು ಅಗತ್ಯ ಬಿದ್ದರೆ ಹೆಚ್ಚುವರಿ ವಿಶೇಷ ರೈಲುಗಳ ಸಂಚಾರಕ್ಕೆ ಮನವಿ ಸಲ್ಲಿಸ ಬಹುದು ಎಂದು ಸೂಚಿಸಲಾಗಿತ್ತು. ಆಯಾ ಜಿಲ್ಲಾಡಳಿತಗಳ ಮೂಲಕವೇ ಹೆಚ್ಚುವರಿ ರೈಲಿನ ಬಗ್ಗೆ ಕೋರಿಕೆ ಸಲ್ಲಿಸಲು ಅವಕಾಶ ಇದೆ ಎಂದು ಗೃಹ ಕಾರ್ಯದರ್ಶಿ ಅಜಯ ಭಲ್ಲಾ ಪತ್ರ ಬರೆದಿದ್ದರು.

ಜೂ.1ರಿಂದ 200 ವಿಶೇಷ ರೈಲು
ಇದೇ ವೇಳೆ ಹಾಲಿ ಇರುವ ರೈಲುಗಳಲ್ಲದೆ ಜೂನ್‌ನಿಂದ 200 ವಿಶೇಷ ರೈಲುಗಳನ್ನು ಪ್ರತಿ ದಿನ ಓಡಿಸಲಾಗುತ್ತದೆ. ಇದು ಹವಾನಿಯಂತ್ರಿತವಲ್ಲದ ರೈಲುಗಳಾಗಿದ್ದು, ಶೀಘ್ರವೇ ಅವುಗಳಿಗಾಗಿ ಆನ್‌ಲೈನ್‌ನಲ್ಲಿ ಬುಕಿಂಗ್‌ ಶುರು ಮಾಡಲು ಅವಕಾಶ ಕಲ್ಪಿಸಲಾಗುತ್ತದೆ.

ವಿವಿಧೆಡೆ 15 ಕಾರ್ಮಿಕರ ಸಾವು
ಮಂಗಳವಾರ ದೇಶದ ಮೂರು ಕಡೆ ನಡೆದ ಪ್ರತ್ಯೇಕ ಅಪಘಾತ ಪ್ರಕರಣಗಳಲ್ಲಿ 15 ಕಾರ್ಮಿಕರು ಮೃತ ಪಟ್ಟು, ಹಲವರು ಗಾಯಗೊಂಡಿದ್ದಾರೆ. ಬಿಹಾರದ ಭಾಗಲ್ಪುರ ಜಿಲ್ಲೆಯಲ್ಲಿ ವಲಸೆ ಕಾರ್ಮಿಕರನ್ನು ಹೊತ್ತಿದ್ದ ಟ್ರಕ್‌ ಮತ್ತು ಬಸ್ಸೊಂದರ ನಡುವೆ ಮುಖಾಮುಖೀ ಢಿಕ್ಕಿ ಸಂಭವಿಸಿ, 9 ಕಾರ್ಮಿಕರು ಸ್ಥಳದಲ್ಲೇ ಅಸುನೀಗಿದ್ದಾರೆ. ಇವರು 6 ದಿನಗಳ ಹಿಂದೆ ಕೋಲ್ಕತಾದಿಂದ ಬಿಹಾರಕ್ಕೆ ಸೈಕಲ್‌ ಮೂಲಕ ಪ್ರಯಾಣ ಆರಂಭಿಸಿದ್ದರು.

ಉತ್ತರಪ್ರದೇಶದ ಬಂದಾದಲ್ಲಿ ವಲಸೆ ಕಾರ್ಮಿಕ ರನ್ನು ಹೊತ್ತೂಯ್ಯುತ್ತಿದ್ದ ಟ್ರಕ್‌ವೊಂದು ಜಾನ್ಸಿ- ಮಿರ್ಜಾಪುರ ಹೆದ್ದಾರಿಯಲ್ಲಿ ಉರುಳಿಬಿದ್ದ ಕಾರಣ, ಟ್ರಕ್‌ ನಲ್ಲಿದ್ದ ಮೂವರು ಮಹಿಳೆಯರು ಮೃತಪಟ್ಟು, ಇತರೆ 17 ಮಂದಿ ಗಾಯಗೊಂಡಿದ್ದಾರೆ. ಮಹಾರಾಷ್ಟ್ರದ ಯಾವತ್ಮಾಲ್‌ ಜಿಲ್ಲೆಯಲ್ಲಿ ಮಂಗಳವಾರ ಕಾರ್ಮಿಕರನ್ನು ಹೊತ್ತೂಯ್ಯುತ್ತಿದ್ದ ಬಸ್‌, ಚಾಲಕನ ನಿಯಂತ್ರಣ ತಪ್ಪಿ ನಿಂತಿದ್ದ ಟ್ರಕ್‌ ವೊಂದಕ್ಕೆ ಢಿಕ್ಕಿ ಹೊಡೆದ ಪರಿಣಾಮ, ಮೂವರು ಕಾರ್ಮಿಕರು ಹಾಗೂ ಬಸ್‌ ಚಾಲಕ ಸ್ಥಳದಲ್ಲೇ ಸಾವಿಗೀಡಾಗಿದ್ದಾರೆ. ಬಸ್‌ನಲ್ಲಿದ್ದ 22 ಮಂದಿ ಗಾಯಗೊಂಡಿದ್ದಾರೆ. ಕಾರ್ಮಿಕರೆಲ್ಲರೂ ಶ್ರಮಿಕ ರೈಲು ಮೂಲಕ ಝಾರ್ಖಂಡ್‌ ಗೆ ತೆರಳುವವರಿದ್ದರು.

ಹೊಸ ಶಿಷ್ಟಾಚಾರಗಳೇನು?
ರಾಜ್ಯ ಹಾಗೂ ರೈಲ್ವೇ ಇಲಾಖೆ ಪರಸ್ಪರ ಸಮನ್ವಯ ಸಾಧಿಸಿ ಹೆಚ್ಚುವರಿ ರೈಲುಗಳನ್ನು ನಿಯೋಜಿಸಬೇಕು.
ಆಹಾರ ಮತ್ತು ಆರೋಗ್ಯದ ಬಗ್ಗೆ ಕಾಳಜಿ ವಹಿಸಬೇಕು.
ಸ್ಯಾನಿಟೈಸೇಷನ್‌ ಅಗತ್ಯಗಳು ಮತ್ತು ವಿಶ್ರಾಂತಿ ಸ್ಥಳಗಳ ವ್ಯವಸ್ಥೆ ಮಾಡಬೇಕು.
ರೈಲುಗಳು ಮತ್ತು ಬಸ್ಸುಗಳು ಹೊರಡುವ ಸಮಯದ ಬಗ್ಗೆ ಸ್ಪಷ್ಟತೆ ಇರಬೇಕು.
ಪ್ರಯಾಣಿಕರು ಹೋಗಲಿರುವ ಸ್ಥಳ ಮತ್ತು ವಿಳಾಸದ ವಿವರ ಸಂಗ್ರಹಿಸಬೇಕು.
ಕಾಲ್ನಡಿಗೆಯಲ್ಲಿ ಹೊರಟ ವಲಸಿಗರು ಹತ್ತಿರದ ವಿಶ್ರಾಂತಿ ಸ್ಥಳ, ರೈಲು ಅಥವಾ ಬಸ್‌ ನಿಲ್ದಾಣಕ್ಕೆ ಹೋಗುವಂತೆ ಜಿಲ್ಲಾಡಳಿತ ಮಾರ್ಗದರ್ಶನ ನೀಡಬೇಕು.
ವಲಸಿಗರ ಬಸ್ಸುಗಳು ಗಡಿ ಮೂಲಕ ರಾಜ್ಯ ಪ್ರವೇಶಿಸಲು ಅಲ್ಲಿನ ಆಡಳಿತ ಅನುಮತಿ ನೀಡಬೇಕು.
ಕಾರ್ಮಿಕರು ಉಳಿದುಕೊಳ್ಳುವ ಸ್ಥಳಗಳಲ್ಲಿ ಅಗತ್ಯ ಆಹಾರ ಮತ್ತು ಆರೋಗ್ಯ ಕಾಳಜಿ ವ್ಯವಸ್ಥೆ ಮಾಡಬೇಕು.