Seema Haider: ಸಚಿನ್‌-ಸೀಮಾ ಹೈದರ್ ವಿವಾಹವಾಗಲು ನೆರವಾಗಿದ್ದ ಇಬ್ಬರನ್ನು ಬಂಧಿಸಿದ ಪೊಲೀಸರು

Team Udayavani, Jul 27, 2023, 10:44 AM IST

ನೋಯ್ಡಾ: ನಕಲಿ ದಾಖಲೆಗಳನ್ನು ಸೃಷ್ಟಿಸಿ ಸಚಿನ್‌ – ಸೀಮಾ ಹೈದರ್‌ ವಿವಾಹವಾಗಲು ನೆರವಾಗಿದ್ದ ಇಬ್ಬರನ್ನು ನೋಯ್ಡಾ ಪೊಲೀಸರು ಬಂಧಿಸಿದ್ದಾರೆ.

ಪಬ್‌ ಜೀ ಆಡಿ ಪ್ರಿಯಕರನನ್ನು  ಭೇಟಿ ಆಗಲು ಅಕ್ರಮವಾಗಿ ಭಾರತಕ್ಕೆ ಬಂದ ಪಾಕ್‌ ಮೂಲದ ಸೀಮಾ ಹೈದರ್‌ ಅವರ ವಿಚಾರಣೆ ನಡೆಯುತ್ತಿದೆ. ಅವರ ಹಿನ್ನೆಲೆ ಹಾಗೂ ಮೂಲವನ್ನು ತನಿಖಾ ಸಂಸ್ಥೆಗಳು ವಿಚಾರಣೆ ನಡೆಸುತ್ತಿದ್ದಾರೆ.

ಸೀಮಾ ಹೈದರ್‌ ಭಾರತಕ್ಕೆ ಬಂದು ಸಚಿನ್‌ ಅವರೊಂದಿಗೆ ವಿವಾಹವಾಗಿದ್ದಾರೆ. ಅವರ ಮದುವೆಗೆ ನಕಲಿ ಗುರುತಿನ ದಾಖಲೆಗಳನ್ನು ಸೃಷ್ಟಿಸಿದ ಇಬ್ಬರು ವ್ಯಕ್ತಿಗಳನ್ನು ನೋಯ್ಡಾ ಪೊಲೀಸರು ಬಂಧಿಸಿದ್ದಾರೆ.

ಉತ್ತರ ಪ್ರದೇಶದ ಬುಲಂದ್‌ಶಹರ್‌ ಮೂಲದ ಪುಷ್ಪೇಂದ್ರ ಮತ್ತು ಪವನ್‌ ಬಂಧಿತರು. ಬಂಧಿತರಿಂದ 15 ನಕಲಿ ಆಧಾರ್ ಕಾರ್ಡ್‌ ಹಾಗೂ ಉಪಕರಣವನ್ನು ವಶಪಡಿಸಿಕೊಳ್ಳಲಾಗಿದೆ.

ಕಳೆದ ಮೂರು ದಿನಗಳಿಂದ ಇಬ್ಬರನ್ನು ಪೊಲೀಸರು ವಿಚಾರಣೆ ನಡೆಸುತ್ತಿದ್ದಾರೆ. ಈ ವೇಳೆ ಅವರು ನಕಲಿ ದಾಖಲೆಗಳನ್ನು ಸೃಷ್ಟಿಸುವ ದಂಧೆಯ ಬಗ್ಗೆ ಬಾಯಿ ಬಿಟ್ಟಿದ್ದಾರೆ.

ಸೀಮಾ ಹೈದರ್ ಗ್ರೇಟರ್ ನೋಯ್ಡಾಗೆ ಬಂದು, ಆ ಬಳಿಕ ಮದುವೆಯಾಗುವ ನಿಟ್ಟಿನಲ್ಲಿ ಸಚಿನ್‌ ಅವರೊಂದಿಗೆ ಬುಲಂದ್‌ಶಹರ್‌ಗೆ ಪ್ರಯಾಣ ಬೆಳೆಸಿದ್ದರು. ಪುಷ್ಪೇಂದ್ರ ಮತ್ತು ಪವನ್ ಉತ್ತರ ಪ್ರದೇಶದ ಬುಲಂದ್‌ಶಹರ್‌ನ ಅಹ್ಮದ್‌ಗಢದಲ್ಲಿ ಜನ ಸೇವಾ ಕೇಂದ್ರವನ್ನು (ಸಾರ್ವಜನಿಕ ಸೇವಾ ಕೇಂದ್ರ) ನಡೆಸುತ್ತಿದ್ದರು. ಇಲ್ಲಿ ನಕಲಿ ಗುರುತಿನ ದಾಖಲೆ ಹಾಗೂ ನಕಲಿ ದಾಖಲೆಗಳನ್ನು ಸೃಷ್ಟಿಸಲಾಗುತ್ತಿತ್ತು. ಈ ಕೇಂದ್ರದಲ್ಲಿಯೇ ಸಚಿನ್  ಮತ್ತು ಸೀಮಾ ಹೈದರ್ ತಮ್ಮ ಮದುವೆಗೆ ಅಗತ್ಯ ದಾಖಲೆಗಳನ್ನು ಪಡೆಯಲು ನೆರವು ಕೋರಿದ್ದಾರೆ. ಈ ವೇಳೆ ಪುಷ್ಪೇಂದ್ರ ಮತ್ತು ಪವನ್ ಅಗತ್ಯ ದಾಖಲೆಗಳ ನಕಲಿ ಪ್ರತಿಯನ್ನು ಮಾಡಿಕೊಟ್ಟಿದ್ದಾರೆ ಎಂದು ವರದಿ ತಿಳಿಸಿದೆ.