ಎಲ್ಲ ಅಂತರ್‌ ಧರ್ಮೀಯ ವಿವಾಹ ಲವ್‌ ಜೆಹಾದ್‌ ಅಲ್ಲ

Team Udayavani, Oct 20, 2017, 12:45 PM IST

ಕೊಚ್ಚಿ: ಎಲ್ಲ ಅಂತರ್‌ ಧರ್ಮೀಯ ವಿವಾಹಗಳು “ಲವ್‌ ಜೆಹಾದ್‌’ ಪ್ರಕರಣಗಳಿಗೆ ಸೇರಿದ್ದಲ್ಲ ಎಂದು ಎರ್ನಾಕುಳಂನಲ್ಲಿರುವ ಕೇರಳ ಹೈಕೋರ್ಟ್‌ ಗುರುವಾರ ಅಭಿಪ್ರಾಯಪಟ್ಟಿದೆ. 

ಕೇರಳದಲ್ಲಿ ಹಿಂದೂ ಯುವತಿಯರನ್ನು “ಲವ್‌ ಜೆಹಾದ್‌’ಗೆ ಬಳಕೆ ಮಾಡಿಕೊಳ್ಳಲಾಗುತ್ತದೆ ಎಂಬ ಆರೋಪಗಳ ನಡುವೆಯೇ ಈ ಮಹತ್ವದ ಅಭಿಪ್ರಾಯವನ್ನು ಹೈಕೋರ್ಟ್‌ ವ್ಯಕ್ತಪಡಿಸಿದೆ. ಹಿಂದೂ ಯುವತಿ ಮತ್ತು ಮುಸ್ಲಿಂ ಸಮು ದಾಯಕ್ಕೆ ಸೇರಿದ ಯುವಕನ ವಿವಾಹ ಸಿಂಧು ಎಂದು ವಿಭಾಗೀಯ ನ್ಯಾಯಪೀಠ ಮಾನ್ಯ ಮಾಡಿದ ಸಂದರ್ಭದಲ್ಲಿ ಈ ರೀತಿ ಹೇಳಿದೆ.

“ಕೇರಳದಲ್ಲಿ ನಡೆಯುತ್ತಿರುವ ಯಾವುದೇ ಅಂತರ್‌ ಧರ್ಮೀಯ ವಿವಾಹಗಳನ್ನು ಲವ್‌ ಜೆಹಾದ್‌ ಎಂದೇ ಪರಿಗಣಿಸಲಾಗುತ್ತದೆ. ಇದು ನ್ಯಾಯಪೀಠಕ್ಕೆ ಆತಂಕ ತಂದಿದೆ. ಪತಿ-ಪತ್ನಿಯರ ನಡುವೆ ನೈಜ ಪ್ರೇಮವಿದ್ದರೂ ಇಂಥ ಘಟನೆಗಳನ್ನು ವೈಭವೀಕರಿಸಲಾಗುತ್ತಿದೆ. ಇದು ಸರಿಯಲ್ಲ. ಇದರಿಂದ ಸಮುದಾಯಗಳ ನಡುವೆ ಕಂದಕ ಹೆಚ್ಚಾಗುತ್ತದೆ. ಕೇರಳದಲ್ಲಿ ಅಂಥವುಗಳು ನಡೆಯಬೇಕೇ’ ಎಂದು ನ್ಯಾಯಪೀಠ ಪ್ರಶ್ನಿಸಿದೆ.