ನೇಪಾಳ, ಭೂತಾನಕ್ಕೆ ಹೋಗುತ್ತಿದ್ದೀರಾ.. ಈ ಸುದ್ದಿಯನ್ನೊಮ್ಮೆ ಓದಿ !

Team Udayavani, Jan 20, 2019, 9:55 AM IST

ನವದೆಹಲಿ: ನೀವು 15 ವರ್ಷಕ್ಕಿಂತ ಕೆಳಗೆ ಅಥವಾ 65 ವರ್ಷ ಮೇಲ್ಪಟ್ಟವರಾಗಿದ್ದರೆ ನಿಮಗೊಂದು ಸಿಹಿ ಸುದ್ದಿ ಇಲ್ಲಿದೆ. ಇನ್ನು ನೀವು ನೇಪಾಳ ಮತ್ತು ಭೂತಾನ್ ದೇಶಕ್ಕೆ ಭೇಟಿ ನೀಡಲು ಬಯಸುವುದಾದರೆ ವೀಸಾ ಅಗತ್ಯವಿಲ್ಲ, ನಿಮ್ಮಲ್ಲಿರುವ ಆಧಾರ್ ಕಾರ್ಡ್ ದಾಖಲೆಯ ಮೂಲಕವೇ ನೀವು ಈ ಎರಡು ದೇಶಗಳಿಗೆ ಪ್ರವಾಸ ಕೈಗೊಳ್ಳಬಹುದಾಗಿದೆ. ಈ ವಿಚಾರವನ್ನು ಕೇಂದ್ರ ಗೃಹ ಇಲಾಖೆಯು ತನ್ನ ಇತ್ತೀಚಿನ ಅಧಿಕೃತ ಪ್ರಕಟನೆಯಲ್ಲಿ ದೃಢಪಡಿಸಿದೆ. ಈ ಮೂಲಕ ಭೂತಾನ್ ಮತ್ತು ನೇಪಾಳ ದೇಶಗಳ ಪ್ರವಾಸಕ್ಕೆ ಆಧಾರ್ ಕಾರ್ಡ್ ಅಧಿಕೃತ ಸಂಚಾರಿ ದಾಖಲೆಯಾದಂತಾಗಿದೆ.

ಗೃಹ ಇಲಾಖೆಯು ನಿಗದಿಪಡಿಸಿರುವ ಈ ವಯೋಮಾನಕ್ಕೆ ಒಳಪಡುವ ಭಾರತೀಯ ನಾಗರಿಕರು ತಮ್ಮಲ್ಲಿ ಅರ್ಹ ಪಾಸ್ ಪೋರ್ಟ್ ಹೊಂದಿದ್ದು ಸರಕಾರೀ ಮಾನ್ಯತೆಯ ಒಂದು ಭಾವಚಿತ್ರ ಸಹಿತವಾಗಿರುವ ಗುರುತಿನ ಚೀಟಿ ಅಥವಾ ಚುನಾವಣಾ ಆಯೋಗದ ಗುರುತಿನ ಚೀಟಿಯನ್ನು ಹೊಂದಿದ್ದಲ್ಲಿ ಅಂತಹ ವ್ಯಕ್ತಿಗಳು ನಿರಾತಂಕವಾಗಿ ನೇಪಾಳ ಅಥವಾ ಭೂತಾನ್ ದೇಶಗಳಿಗೆ ಹೋಗಬಹುದಾಗಿರುತ್ತದೆ.

ಈ ಹಿಂದೆ 65 ವರ್ಷ ದಾಟಿದ ಮತ್ತು 15 ವರ್ಷದೊಳಗಿನ ವ್ಯಕ್ತಿಗಳು ಈ ಎರಡು ದೇಶಗಳಿಗೆ ಪ್ರವಾಸ ಕೈಗೊಳ್ಳಲು ಪಾನ್ ಕಾರ್ಡ್, ವಾಹನ ಚಾಲನಾ ಪ್ರಮಾಣ ಪತ್ರ, ಕೇಂದ್ರ ಸರಕಾರದ ಆರೋಗ್ಯ ಸೇವಾ ಕಾರ್ಡ್ ಅಥವಾ ರೇಷನ್ ಕಾರ್ಡ್ ಗಳಲ್ಲಿ ಯಾವುದಾದರೊಂದನ್ನು ಗುರುತಿಗಾಗಿ ತೋರಿಸಬೇಕಿತ್ತು. ಆದರೆ ಆಧಾರ್ ಕಾರ್ಡ್ ತೋರಿಸುವಂತಿರಲಿಲ್ಲ. ಇದೀಗ ಇವೆಲ್ಲವುಗಳ ಸ್ಥಾನವನ್ನು ಆಧಾರ್ ಕಾರ್ಡ್ ಆಕ್ರಮಿಸಿಕೊಂಡಂತಾಗಿದೆ.