ಜೆಇಇ ಮೈನ್ ಫ‌ಲಿತಾಂಶ ‌: ತೆಲಂಗಾಣ ಅಗ್ರ ಸ್ಥಾನ

Team Udayavani, Sep 13, 2020, 12:01 AM IST

ಸಾಂದರ್ಭಿಕ ಚಿತ್ರ

ಹೊಸದಿಲ್ಲಿ: ಇದೇ ತಿಂಗಳ 1ರಿಂದ 6ರ ವರೆಗೆ ರಾಷ್ಟ್ರಮಟ್ಟದಲ್ಲಿ ನಡೆದಿದ್ದ ಎಂಜಿನಿಯರಿಂಗ್‌ ಪ್ರವೇಶ ಪರೀಕ್ಷೆ (ಜೆಇಇ-ಮೈನ್‌)ಯ ಫ‌ಲಿತಾಂಶ ಶುಕ್ರವಾರ ರಾತ್ರಿ ಬಿಡುಗಡೆಯಾಗಿದೆ. ಒಟ್ಟು 8.53 ಲಕ್ಷ ವಿದ್ಯಾರ್ಥಿಗಳು ಪರೀಕ್ಷೆಗೆ ನೋಂದಾಯಿಸಿಕೊಂಡಿದ್ದರು. ಅವರಲ್ಲಿ ಶೇ. 74ರಷ್ಟು
ವಿದ್ಯಾರ್ಥಿಗಳು (6,30,480  ವಿದ್ಯಾರ್ಥಿಗಳು) ಹಾಜರಾಗಿದ್ದರು.

ಒಟ್ಟು 24 ವಿದ್ಯಾರ್ಥಿಗಳು ಶೇ. 100ರಷ್ಟು ಅಂಕಗಳನ್ನು ಗಳಿಸಿದ್ದಾರೆ. ಇವರಲ್ಲಿ ತೆಲಂಗಾಣದ ವಿದ್ಯಾರ್ಥಿಗಳೇ ಹೆಚ್ಚು. ಆ ರಾಜ್ಯದ ಒಟ್ಟು 9 ವಿದ್ಯಾರ್ಥಿಗಳು ಈ ಸಾಧನೆ ಮಾಡಿರುವುದರಿಂದ ಪಟ್ಟಿಯಲ್ಲಿ ನಂ. 1 ಸ್ಥಾನ ತೆಲಂಗಾಣಕ್ಕೇ ಸಂದಿದೆ. 2ನೇ ಸ್ಥಾನ ದಿಲ್ಲಿ (5 ವಿದ್ಯಾರ್ಥಿಗಳು)
ಪಾಲಾಗಿದೆ. ಬಳಿಕದ ಸ್ಥಾನಗಳಲ್ಲಿ ರಾಜಸ್ಥಾನ (4), ಆಂಧ್ರಪ್ರದೇಶ (3), ಹರಿಯಾಣ (2) ಇವೆ. ಗುಜರಾತ್‌, ಮಹಾರಾಷ್ಟ್ರದಿಂದ ತಲಾ ಒಬ್ಬರು ಶೇ. 100 ಅಂಕ ಗಳಿಸಿದ್ದಾರೆ.