“ಬಿಎಸ್‌ 6’ನಿಂದ ತೈಲ ಬೆಲೆ ಏರಿಕೆ?

Team Udayavani, Dec 23, 2019, 8:46 PM IST

ನವದೆಹಲಿ: ಬಿಎಸ್‌ 6 ಮಾದರಿಯ ಇಂಜಿನ್‌ಗಳುಳ್ಳ ವಾಹನಗಳು 2020ರ ಏ.1ರಿಂದ ಕಡ್ಡಾಯವಾಗಿ ಜಾರಿಗೆ ಬರಲಿದ್ದು, ಅದರ ಬೆನ್ನಿಗೇ ತೈಲ ದರಗಳೂ ಏರಿಕೆಯಾಗುವ ಸಾಧ್ಯತೆಗಳಿವೆ ಎಂದು ಮೂಲಗಳು ತಿಳಿಸಿವೆ.

ತೈಲ ಪೂರೈಕೆ ಕಂಪನಿಗಳ ಒಕ್ಕೂಟ(ಒಎಂಸಿ), ಪೆಟ್ರೋಲಿಯಂ ಸಚಿವಾಲಯಕ್ಕೆ ಮನವಿಯೊಂದನ್ನು ಸಲ್ಲಿಸಿದ್ದು, ಬಿಎಸ್‌ 6 ಇಂಜಿನ್‌ಗಳಿಗೆ ಪೂರಕವಾಗಿ ಸದ್ಯಕ್ಕೆ ಲಭ್ಯವಿರುವ ಪೆಟ್ರೋಲ್‌, ಡೀಸೆಲ್‌ನ ಗುಣಮಟ್ಟವನ್ನು ಉನ್ನತೀಕರಿಸಬೇಕಿದೆ. ಈಗಾಗಲೇ ಈ ನಿಟ್ಟಿನಲ್ಲಿ ಅಪಾರ ಪ್ರಮಾಣದ ಬಂಡವಾಳ ಹೂಡಿಕೆ ಮಾಡಲಾಗಿದ್ದು, ಇದನ್ನು ಹಿಂಪಡೆಯಲು ಗ್ರಾಹಕರು ಖರೀದಿಸುವ ತೈಲದ ಬೆಲೆಗಳನ್ನು ಸತತ ಐದು ವರ್ಷ ಏರಿಸಬೇಕು ಎಂದು ಕೋರಲಾಗಿದೆ.

ಒಂದು ವೇಳೆ, ಈ ಮನವಿಗೆ ಸಚಿವಾಲಯ ಒಪ್ಪಿದರೆ, ಪೆಟ್ರೋಲ್‌ ಬೆಲೆ ಪ್ರತಿ ಲೀಟರಿಗೆ 80 ಪೈಸೆ ಹಾಗೂ ಡೀಸೆಲ್‌ ದರ 1.50 ರೂ. ಏರಿಕೆಯಾಗುವ ಸಾಧ್ಯತೆಗಳಿವೆ ಎಂದು ಹೇಳಲಾಗಿದೆ.

ಮೂಲಗಳ ಪ್ರಕಾರ, ಸರ್ಕಾರಿ ಸ್ವಾಮ್ಯದ ತೈಲ ಕಂಪನಿಗಳಾದ ಇಂಡಿಯನ್‌ ಆಯಿಲ್‌, ಹಿಂದೂಸ್ತಾನ್‌ ಪೆಟ್ರೋಲಿಯಂ ಹಾಗೂ ಭಾರತ್‌ ಪೆಟ್ರೋಲಿಯಂ ಸಂಸ್ಥೆಗಳು ತೈಲಗಳ ಗುಣಮಟ್ಟ ಉನ್ನತೀಕರಣಕ್ಕಾಗಿ 80,000 ಕೋಟಿ ರೂ.ಗಳನ್ನು ವ್ಯಯಿಸಿವೆ.