ಅಣಕು ಪ್ರದರ್ಶನ; ಬಲವಂತದಿಂದ ತಳ್ಳಿ ವಿದ್ಯಾರ್ಥಿನಿಯ ಜೀವ ತೆಗೆದ

Team Udayavani, Jul 13, 2018, 4:02 PM IST

ಕೊಯಂಬತ್ತೂರು: ರಾಷ್ಟ್ರೀಯ ವಿಪತ್ತು ನಿರ್ವಹಣಾ ಪ್ರಾಧಿಕಾರ(ಎನ್ ಡಿಎಂಎ) ಆಯೋಜಿಸಿದ್ದ ವಿಪತ್ತು ನಿರ್ವಹಣೆಯ ಅಣಕು ಪ್ರದರ್ಶನದ ವೇಳೆ ತರಬೇತುದಾರ 2ನೇ ಮಹಡಿಯಿಂದ ವಿದ್ಯಾರ್ಥಿನಿಯೊಬ್ಬಳನ್ನು ಬಲವಂತದಿಂದ ತಳ್ಳಿದ ಪರಿಣಾಮ ಸಾವನ್ನಪ್ಪಿರುವ ಘಟನೆ ಕೊಯಂಬತ್ತೂರಿನಲ್ಲಿ ಸಂಭವಿಸಿದೆ.

2ನೇ ಮಹಡಿಯಲ್ಲಿ ನಿಂತಿದ್ದ ದ್ವಿತೀಯ ಪಿಯುಸಿ ವಿದ್ಯಾರ್ಥಿನಿ ಎನ್.ಲೋಕೇಶ್ವರಿಯನ್ನು ಎನ್ ಡಿಎಂಎನ ತರಬೇತುದಾರ ಟಿಆರ್ ಅರ್ಮುಗಂ ಬಲವಂತದಿಂದ ತಳ್ಳಿಬಿಟ್ಟಿದ್ದ! ಪ್ರತ್ಯಕ್ಷದರ್ಶಿಗಳ ಪ್ರಕಾರ, ವಿದ್ಯಾರ್ಥಿನಿ ಕೆಳಕ್ಕೆ ಹಾರಲು ನಿರಾಕರಿಸಿದ್ದಳು. ಆದರೆ ತರಬೇತುದಾರ ತಳ್ಳಿದ್ದರಿಂದ ತಲೆ ಕೆಳಗಾಗಿ ಬಿದ್ದು, ತಲೆ ನೆಲಕ್ಕೆ ಹೊಡೆದ ಪರಿಣಾಮ ಆಸ್ಪತ್ರೆಗೆ ಸಾಗಿಸುವ ವೇಳೆ ಮಾರ್ಗದ ಮಧ್ಯೆಯೇ ಪ್ರಾಣಬಿಟ್ಟಿರುವುದಾಗಿ ಮಾಧ್ಯಮಕ್ಕೆ ತಿಳಿಸಿದ್ದಾರೆ.

ಕೋವೈ ಕಲಾಮಗಳ್ ಆರ್ಟ್ಸ್ ಮತ್ತು ಸೈನ್ಸ್ ಕಾಲೇಜಿನಲ್ಲಿ ವಿಪತ್ತು ನಿರ್ವಹಣೆಯ ಅಣಕು ಪ್ರದರ್ಶನ ಗುರುವಾರ ಆಯೋಜಿಸಲಾಗಿತ್ತು. ಲೋಕೇಶ್ವರಿ ಬಿಬಿಎ ವಿಭಾಗದ ಎರಡನೇ ವರ್ಷದ ವಿದ್ಯಾರ್ಥಿನಿ.

ವಿಪತ್ತಿನ ಸಂದರ್ಭದಲ್ಲಿ ಹೇಗೆ ಪಾರಾಗಬೇಕೆಂಬುದರ ಬಗ್ಗೆ ಅಣಕು ಪ್ರದರ್ಶನ ನಡೆಸಲು ವಿಪತ್ತು ನಿರ್ವಹಣಾ ಮಂಡಳಿ ಸಿದ್ಧತೆ ನಡೆಸಿತ್ತು. ಅರ್ಮುಗಂ ಎಂಬ ಸ್ವಘೋಷಿತ ತರಬೇತುದಾರನ ಆತುರದಿಂದ ಯುವತಿಯ ಜೀವ ಹೋದಂತಾಗಿದ್ದು, ಈ ಬಗ್ಗೆ ವಿದ್ಯಾರ್ಥಿಗಳು ಆಕ್ರೋಶ ವ್ಯಕ್ತಪಡಿಸಿದ್ದರು. ಟಿಆರ್ ಅರ್ಮುಗಂ ವಿರುದ್ಧ ಪ್ರಕರಣ ದಾಖಲಿಸಿಕೊಂಡಿರುವುದಾಗಿ ಪೊಲೀಸರು ತಿಳಿಸಿದ್ದಾರೆ.