ಅತ್ತೆ ಜೊತೆ ಜಗಳ;ಮಲಗಿದ್ದ 2 ವರ್ಷದ ಮಗುವನ್ನೇ ಮೆಟ್ಟಿಲಿಂದ ಎಸೆದ ತಾಯಿ

Team Udayavani, Jan 27, 2017, 4:05 PM IST

ನವದೆಹಲಿ:ಅತ್ತೆಯೊಂದಿಗೆ ಶರಂಪರ ಕಿತ್ತಾಟ ಮಾಡಿಕೊಳ್ಳುತ್ತ ತಾಳ್ಮೆ ಕಳೆದುಕೊಂಡ ಸೊಸೆ ಮಲಗಿದ್ದ ತನ್ನ ಎರಡು ವರ್ಷದ ಮಗುವನ್ನು ಮೆಟ್ಟಿಲಿನಿಂದ ಕೆಳಗೆ ಎಸೆದ ಘಟನೆ ದೆಹಲಿಯಲ್ಲಿ ನಡೆದಿದೆ. ಮಗುವನ್ನು ಎಸೆದ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ.

ಪತ್ನಿ ಸೋನು ಗುಪ್ತಾ(26ವರ್ಷ)ಳ ವಿರುದ್ಧ ಪತಿ ನಿತಿನ್ ಗುಪ್ತಾ ನೀಡಿದ ದೂರಿನ ಮೇರೆಗೆ ಪೊಲೀಸರು, ಸೋನು ವಿರುದ್ಧ ಕೊಲೆ ಯತ್ನ ಆರೋಪದ ಪ್ರಕರಣ ದಾಖಲಿಸಿಕೊಂಡಿರುವುದಾಗಿ ವರದಿ ತಿಳಿಸಿದ್ದು, ಘಟನೆ ನಡೆದ ಬಳಿಕ ಸೋನು ಗುಪ್ತಾ ನಾಪತ್ತೆಯಾಗಿದ್ದಾಳೆ.

ಸೋನು ಕೂಗಾಡುತ್ತಾ ಮಲಗಿದ್ದ ಮಗುವನ್ನು ತೆಗೆದುಕೊಂಡು ಮೆಟ್ಟಿಲಿನಿಂದ ಎಸೆಯುತ್ತಿರುವ ದೃಶ್ಯ ನಿಮ್ಮ ಮನಕಲಕುತ್ತದೆ. ಘಟನೆಯಲ್ಲಿ ಮಗು ಅಂಶು ತಲೆಗೆ ಗಂಭೀರವಾದ ಗಾಯವಾಗಿದ್ದು ಏಮ್ಸ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ತನ್ನ ಪತ್ನಿ ಜಗಳಗಂಟಿಯಾಗಿದ್ದು, ಆಕೆಯ ನಡವಳಿಕೆಗೆ ಸಾಕ್ಷಿ ಎಂಬಂತೆ ಎರಡು ಕ್ಯಾಮರಾಗಳಲ್ಲಿ ದೃಶ್ಯಗಳು ಸೆರೆಯಾಗಿರುವುದಾಗಿ ಪತಿ ಹೇಳಿದ್ದಾರೆ. ಈ ಘಟನೆ ನಡೆದಿರುವುದು ಶನಿವಾರ, ಆದರೆ ದೂರನ್ನು ಮಂಗಳವಾರ ನೀಡಲಾಗಿತ್ತು.

ನಿತಿನ್ ಗುಪ್ತಾ ಕಾಸ್ಮೆಟಿಕ್ ಅಂಗಡಿ ಮಾಲೀಕ, ಸೋನು ಅವರನ್ನು ಕಳೆದ 5 ವರ್ಷದ ಹಿಂದೆ ವಿವಾಹವಾಗಿದ್ದು, ಆಕೆ ಜಗಳಗಂಟಿ ಸ್ವಭಾವದವಳೆಂದು ನಿತಿನ್ ಮತ್ತು ಪೋಷಕರು ಆರೋಪಿಸಿದ್ದಾರೆ.