ಪಟಾಕಿ ಸಿಡಿಸಲು 3 ಗಂಟೆ ಮಾತ್ರ ಅವಕಾಶ

Team Udayavani, Oct 14, 2017, 11:08 AM IST

ನವದೆಹಲಿ/ಚಂಡೀಗಢ: ನವದೆಹಲಿ  ಪ್ರದೇಶದಲ್ಲಿ ಪಟಾಕಿಗೆ ನಿಷೇಧ ಬೆನ್ನಲ್ಲೇ ಅದಕ್ಕೆ ಪೂರಕವಾಗಿ ಪಂಜಾಬ್‌ ಮತ್ತು ಹರ್ಯಾಣ ಹೈಕೋರ್ಟ್‌  ಪಂಜಾಬ್‌, ಹರ್ಯಾಣ ಹಾಗೂ ಚಂಡೀಗಢದಲ್ಲಿ ಕೇವಲ 3 ಗಂಟೆಗಳ ಕಾಲ ಮಾತ್ರ ಪಟಾಕಿ ಸಿಡಿಸಲು ಅವಕಾಶ ಮಾಡಿಕೊಟ್ಟಿದೆ. ಸಂಜೆ  6.30ರಿಂದ ರಾತ್ರಿ 9.30ರ ವರೆಗೆ ಪಟಾಕಿ ಸಿಡಿಸಲು ಅವಕಾಶ ನೀಡಲಾಗಿದೆ. 

ಎರಡೂ ರಾಜ್ಯಗಳ ಜಿಲ್ಲಾಧಿಕಾರಿಗಳು, ನಗರ ಪೊಲೀಸ್‌  ಆಯುಕ್ತರು ಈ ನಿಟ್ಟಿನಲ್ಲಿ ಗಮನ ಹರಿಸಬೇಕು ಎಂದು ನ್ಯಾ.ಎ.ಕೆ.ಮಿತ್ತಲ್‌ ಮತ್ತು ನ್ಯಾ.ಅಮಿತ್‌ ರಾವತ್‌ ನೇತೃತ್ವದ ನ್ಯಾಯಪೀಠ ಆದೇಶ ನೀಡಿದೆ. ಪಟಾಕಿ ಸಿಡಿಸುವುದರಿಂದ  ಪರಿಸರ ಮಾಲಿನ್ಯ ಹೆಚ್ಚಾಗುತ್ತದೆ ಎಂಬ ಅಂಶದ ಬಗ್ಗೆ ವ್ಯಾಪಾರಸ್ಥರ ವತಿಯಿಂದ ಪ್ರತಿಕ್ರಿಯೆಯನ್ನೂ  ಕೋರ್ಟ್‌ ಬಯಸಿದೆ. 

ಧ್ವನಿವರ್ಧಕ ನಿಷೇಧಕ್ಕೆ ಅರ್ಜಿ: ಮತ್ತೂಂದು ಬೆಳವಣಿಗೆಯಲ್ಲಿ ದೆಹಲಿ ಹೈಕೋರ್ಟ್‌ ನವದೆಹಲಿ ವ್ಯಾಪ್ತಿಯಲ್ಲಿ ಬರುವ ಎಲ್ಲ ಧಾರ್ಮಿಕ ಕೇಂದ್ರಗಳ ವ್ಯಾಪ್ತಿಯಲ್ಲಿ ಧ್ವನಿವರ್ಧಕ ಬಳಕೆಗೆ ನಿಷೇಧ ಹೇರುವ ಕುರಿತು ಪ್ರತಿಕ್ರಿಯೆ ಕೋರಿ ಕೇಂದ್ರ, ದೆಹಲಿ ಸರ್ಕಾರಗಳಿಗೆ ನೋಟಿಸ್‌ ಜಾರಿ  ಮಾಡಿದೆ. ಜ.29ಕ್ಕೆ ಮುಂದಿನ ವಿಚಾರಣೆ ನಡೆಯಲಿದೆ.