ಇಂಡಸ್‌ ವಾಟರ್‌ ಟ್ರೀಟಿ ವಿರುದ್ಧ ಪಾಕ್‌ ಅತ್ಯುಗ್ರ ಅಭಿಯಾನ

Team Udayavani, Oct 23, 2018, 4:21 PM IST

ಇಸ್ಲಾಮಾಬಾದ್‌ : ಜಮ್ಮು ಮತ್ತು ಕಾಶ್ಮೀರದಲ್ಲಿನ ಎರಡು ಜಲ ವಿದ್ಯುತ್‌ ಯೋಜನೆಗಳಿಗೆ ಭೇಟಿ ಕೊಡಲು ಹೊಸದಿಲ್ಲಿ ಪಾಕಿಸ್ಥಾನಿ ಅಧಿಕಾರಿಗಳಿಗೆ ಅವಕಾಶ ನಿರಾಕರಿಸಿರುವ ಹಿನ್ನೆಲೆಯಲ್ಲಿ ಪಾಕಿಸ್ಥಾನ 1960ರಲ್ಲಿ  ಭಾರತದೊಂದಿಗೆ ಸಹಿ ಹಾಕಿರುವ ಮತು ವಿಶ್ವ ಬ್ಯಾಂಕ್‌ ಕೂಡ ಒಬ್ಬ ಕಕ್ಷಿದಾರನಾಗಿರುವ, ಇಂಡಸ್‌ ವಾಟರ್‌ ಟ್ರೀಟಿ (ಐಡಬ್ಲ್ಯುಟಿ) ವಿರುದ್ಧ ಅತ್ಯುಗ್ರ ಅಭಿಯಾನವನ್ನು ಆರಂಭಿಸಲಿದೆ ಎಂದು ಮಾಧ್ಯಮ ವರದಿ ಇಂದು ಮಂಗಳವಾರ ತಿಳಿಸಿದೆ.

ಸೆಪ್ಟಂಬರ್‌ ಕೊನೇ ವಾರದಲ್ಲಿ ಜಮ್ಮು ತಮು¤ ಕಾಶ್ಮೀರದಲ್ಲಿನ 1,000 ಮೆಗಾ ವ್ಯಾಟ್‌ ಪಕಾಲ್‌ ದುಲ್‌ ವಿದ್ಯುತ್‌ ಘಟಕ ಮತ್ತು 48 ಮೆಗಾ ವ್ಯಾಟ್‌ ಲೋವರ್‌ ಕಲ್‌ನಾಯ್‌ ವಿದ್ಯುತ್‌ ಘಟಕಕ್ಕೆ ಭೇಟಿ ನೀಡುವ ಅವಕಾಶವನ್ನು ಕಲ್ಪಿಸಲಾಗುವುದು ಎಂದ ಭಾರತೀಯ ಜಲ ಆಯುಕ್ತರು ಕಳೆದ ಆಗಸ್ಟ್‌ 29-30ರಂದು ನಡೆದಿದ್ದ ವಾರ್ಷಿಕ ಸಭೆಯಲ್ಲಿ ಆಶ್ವಾಸನೆ ನೀಡಿದ್ದರು. ಆದರೆ ಜಮ್ಮು ಕಾಶ್ಮೀರದಲ್ಲಿನ ಸ್ಥಳೀಯಾಡಳಿತೆಯ ಚುನಾವಣೆಗಳ ಕಾರಣ ಆ ಭೇಟಿಯನ್ನು ಅ.7-12ಕ್ಕೆ ಮುಂದೂಡಲಾಗಿತ್ತು ಎಂದು ಪಾಕಿಸ್ಥಾನದ ಕಾಯಂ ಇಂಡಸ್‌ ವಾಟರ್‌ ಆಯೋಗದ ಆಯುಕ್ತ ಸೈಯದ್‌ ಮೆಹರ್‌ ಅಲಿ ಶಾ ಹೇಳಿದ್ದಾರೆ. 

ಹಾಗಿದ್ದರೂ ಭಾರತ ತಾನು ಪುನರ್‌ ನಿಗದಿಸಿದ ಸಂದರ್ಶನ ವೇಳಾ ಪಟ್ಟಿಯನ್ನು ಕಾಯ್ದುಕೊಳ್ಳುವ ಬದ್ದತೆಯನ್ನು ಉಳಿಸಿಕೊಂಡಿಲ್ಲ; ಜಮ್ಮು ಕಾಶ್ಮೀರದಲ್ಲಿ ಸ್ಥಳೀಯಾಡಳಿತೆ ಚುನಾವಣೆಗಳು 20 ವರ್ಷಗಳ ಬಳಿಕ ನಡೆದಿವೆ ಎಂದು ಶಾ ಹೇಳಿದರು. 

“ನಮಗಾದ ನಿರಾಶೆಯ ಬಗ್ಗೆ ನಾನು ಕೆಲ ದಿನಗಳ ಹಿಂದೆ ಭಾರತದ ಆಯುಕ್ತರಿಗೆ ಪತ್ರ ಬರೆದಿದ್ದೇನೆ ಮಾತ್ರವಲ್ಲ ಫೋನಿನಲ್ಲೂ ಮಾತನಾಡಿದ್ದೇನೆ; ಆದರೂ ಅವರು ಕೊಟ್ಟಿರುವ ಭರವಸೆಯ ಪ್ರಕಾರದ ಭೇಟಿಗೆ ಸದ್ಯಕ್ಕಂತೂ ಅವಕಾಶ ದೊರಕುವ ಸಾಧ್ಯತೆ ಕಾಣುತ್ತಿಲ್ಲ ಎಂದು ಶಾ ಹೇಳಿರುವುದನ್ನು ಉಲ್ಲೇಖೀಸಿ ಡಾನ್‌ ದೈನಿಕ ವರದಿ ಮಾಡಿದೆ.