Panaji: ವಾಹನ ಕಳ್ಳತನ: ಇಬ್ಬರ ಬಂಧನ

Team Udayavani, Nov 18, 2023, 1:28 PM IST

ಪಣಜಿ: ಮನೆ ಬೀಗ ಒಡೆದು ವಾಹನ ಕಳ್ಳತನ ಮಾಡಿದ ಪ್ರಕರಣದಲ್ಲಿ ಗೋವಾ ಪೊಲೀಸರು ಇಬ್ಬರನ್ನು ಬಂಧಿಸಿದ್ದಾರೆ.

ಬಂಧಿತ ಶಂಕಿತ ಆರೋಪಿಗಳಲ್ಲಿ ರಾಷ್ಟ್ರೀಯ ಮಟ್ಟದ ಸ್ನೂಕರ್ ಆಟಗಾರನೂ ಸೇರಿದ್ದಾನೆ. ಇವರಿಬ್ಬರೂ ಕಳ್ಳತನ ಹಾಗೂ ದ್ವಿಚಕ್ರ ವಾಹನಗಳ ಕಳ್ಳತನದಲ್ಲಿ ತೊಡಗಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.

ಉತ್ತರ ಗೋವಾ ಪೊಲೀಸ್ ವರಿಷ್ಠಾಧಿಕಾರಿ ನಿಧಿನ್ ವಲ್ಸನ್ ನೀಡಿರುವ ಮಾಹಿತಿಯ ಪ್ರಕಾರ, ಸ್ನೂಕರ್ ಆಟಗಾರ ಇತ್ತೀಚೆಗೆ ರಾಷ್ಟ್ರೀಯ ಕ್ರೀಡಾಕೂಟದಲ್ಲಿ ಭಾಗವಹಿಸಿದ್ದರು.

ಸ್ನೂಕರ್ ಆಟಗಾರ ಸುಲೇಮಾನ್ ಶೇಖ್ ಮತ್ತು ಅವರ ಪಾಲುದಾರ ಶಬ್ಬೀರ್ಸಾಹೇಬ್ ಶಲವಾದಿ ಅವರನ್ನು ಅವರ ಮನೆಯಿಂದ ಬಂಧಿಸಲಾಗಿದೆ. ಈತನ ಮೇಲೆ ಕಳ್ಳತನ ಮತ್ತು ವಾಹನ ಕಳ್ಳತನದ ಆರೋಪವಿದೆ. ಸುಲೈಮಾನ್ ಶೇಖ್ 2023 ರ ರಾಷ್ಟ್ರೀಯ ಕ್ರೀಡಾಕೂಟದಲ್ಲಿ ಗೋವಾವನ್ನು ಪ್ರತಿನಿಧಿಸಿದ್ದರು. ಇಬ್ಬರೂ ಕ್ಯಾಸಿನೊಗಳಿಗೆ ವ್ಯಸನಿಯಾಗಿದ್ದರು, ಆದ್ದರಿಂದ ಅವರು ಅಪರಾಧದ ಹಾದಿಯನ್ನು ಆರಿಸಿಕೊಂಡರು ಎಂದು ಪೊಲೀಸ್ ಅಧಿಕಾರಿ ಹೇಳಿದರು.

ಶಂಕಿತ ಆರೋಪಿಗಳ ವಿರುದ್ಧ ಹಲವು ಪ್ರಕರಣಗಳು ದಾಖಲಾಗಿವೆ. ಆರೋಪಿಗಳ ವಿರುದ್ಧ ಉತ್ತರ ಗೋವಾದ ಪರ್ವರಿಯಲ್ಲಿ ಎರಡು ಕಳ್ಳತನ, ಮಾಪಸಾ ಮತ್ತು ಮರ್ಡೋಲ್‍ನಲ್ಲಿ ತಲಾ ಒಂದು ಮತ್ತು ದಕ್ಷಿಣ ಗೋವಾದ ಮಡಗಾಂವ್‍ನಲ್ಲಿ ಮೋಟಾರ್‍ಸೈಕಲ್ ಕಳ್ಳತನ ಪ್ರಕರಣಗಳು ದಾಖಲಾಗಿವೆ.

17 ಲಕ್ಷ ಮೌಲ್ಯದ ಚಿನ್ನಾಭರಣ ಹಾಗೂ ಇತರೆ ವಸ್ತುಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಆರೋಪಿಗಳನ್ನು ಹಿಡಿಯಲು ಕನಿಷ್ಠ 50 ಸಿಸಿಟಿವಿ ಕ್ಯಾಮೆರಾಗಳ ದೃಶ್ಯಾವಳಿಗಳನ್ನು ಪರಿಶೀಲಿಸಲಾಗಿದ್ದು, ನಂತರ ಆರೋಪಿಗಳನ್ನು ಪತ್ತೆ ಮಾಡಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.