ಬುರಾರಿ ಮನೆಗೆ ಬಾಡಿಗೆಗೆ ಬಂದ ಪೆಥಾಲಜಿಸ್ಟ್‌

Team Udayavani, Dec 29, 2019, 12:28 AM IST

ಹೊಸದಿಲ್ಲಿ: 2018ರ ಜುಲೈನಲ್ಲಿ ದಿಲ್ಲಿಯ ಬುರಾರಿ ಪ್ರಾಂತ್ಯದಲ್ಲಿ ಒಂದೇ ಕುಟುಂಬದ 11 ಸದಸ್ಯರು ಸಾಮೂಹಿಕವಾಗಿ ಆತ್ಮಹತ್ಯೆ ಮಾಡಿಕೊಂಡಿದ್ದ ಮನೆಗೆ, ರೋಗಶಾಸ್ತ್ರಜ್ಞರಾದ ಮೋಹನ್‌ ಸಿಂಗ್‌ ಕಶ್ಯಪ್‌ ಎಂಬವರು ಬಾಡಿಗೆದಾರರರಾಗಿ ಕಾಲಿಡುತ್ತಿದ್ದಾರೆ. ರವಿವಾರ ಆ ಮನೆಯಲ್ಲಿ ಹೋಮ- ಹವನಗಳನ್ನು ಮಾಡಿ ಗೃಹ ಪ್ರವೇಶ ಮಾಡುವುದಾಗಿ ಅವರು ತಿಳಿಸಿದ್ದಾರೆ. 2018ರಲ್ಲಿ ಈ ಮನೆಯ 11 ಸದಸ್ಯರು ಮೋಕ್ಷಕ್ಕಾಗಿ ಸಾಮೂಹಿಕ ಆತ್ಮಹತ್ಯೆ ಮಾಡಿಕೊಂಡಿದ್ದು ದೇಶಾ ದ್ಯಂತ ಸುದ್ದಿಯಾಗಿತ್ತು.

ಆ ಪ್ರಕರಣ ಬೆಳಕಿಗೆ ಬಂದ ಅನಂತರ ಮನೆ ಯನ್ನು ಚಂದಾವತ್‌ ಕುಟುಂಬದ ಹತ್ತಿರದ ಸಂಬಂಧಿ ದಿನೇಶ್‌ ಚಂದಾವತ್‌ ಎಂಬವರು ಸುಪರ್ದಿಗೆ ಪಡೆದಿದ್ದರು. ಆದರೆ, ಆಗಿನಿಂದ ಈ ಮನೆಗೆ ಯಾರೂ ಬಾಡಿಗೆಗೆ ಬಂದಿರಲಿಲ್ಲ. ಈಗ ದಿನೇಶ್‌ ಅವರಿಂದಲೇ ಆ ಮನೆಯ ನೆಲ ಅಂತಸ್ತು ಹಾಗೂ ಮೊದಲ ಮಹಡಿಯನ್ನು ಕಶ್ಯಪ್‌ ಬಾಡಿಗೆ ಪಡೆದಿದ್ದಾರೆ. ನೆಲ ಅಂತಸ್ತಿನಲ್ಲಿ ಪೆಥಾಲಜಿ ಲ್ಯಾಬ್‌ ಮಾಡಿ, ಮೊದಲ ಅಂತಸ್ತಿನಲ್ಲಿ ತಮ್ಮ ಕುಟುಂಬದೊಂದಿಗೆ ವಾಸವಾಗಿರಲು ನಿರ್ಧರಿಸಿದ್ದಾರೆ.