ಶೇ. 87ರಷ್ಟು ಬ್ಯಾಂಕ್‌ ಖಾತೆಗಳು ಆಧಾರ್‌ಗೆ ಲಿಂಕ್‌: ಯುಐಡಿಎಐ

Team Udayavani, Mar 5, 2018, 10:55 AM IST

ಹೊಸದಿಲ್ಲಿ: ಬ್ಯಾಂಕ್‌ ಖಾತೆ ಹಾಗೂ ಮೊಬೈಲ್‌ಗೆ ಆಧಾರ್‌ ಅನ್ನು ಲಿಂಕ್‌ ಮಾಡುವ ಗಡುವು ಇದೇ ತಿಂಗಳ ಅಂತ್ಯಕ್ಕೆ ಮುಕ್ತಾಯವಾಗಲಿದೆ. ಅದಕ್ಕೆ ಪೂರಕವಾಗಿ ಭಾರತೀಯ ವಿಶಿಷ್ಟ ಗುರುತಿನ ಚೀಟಿ ಪ್ರಾಧಿಕಾರದ (ಯುಐಡಿಎಐ)  ಹಿರಿಯ ಅಧಿಕಾರಿಯೊಬ್ಬರು ನೀಡಿದ ಮಾಹಿತಿಯಂತೆ, ದೇಶದ 109.9 ಕೋಟಿ ಬ್ಯಾಂಕ್‌ ಖಾತೆಗಳ ಪೈಕಿ ಶೇ.87ರಷ್ಟು ಖಾತೆಗಳು ಆಧಾರ್‌ ಜತೆ ಲಿಂಕ್‌ ಆಗಿವೆ. ಈ ಪೈಕಿ 58 ಕೋಟಿ ಖಾತೆಗಳ ಪರಿಶೀಲನೆ ನಡೆಸಲಾಗಿದ್ದು, ಉಳಿದವುಗಳ ಪರಿಶೀಲನಾ ಪ್ರಕ್ರಿಯೆ ನಡೆಯುತ್ತಿದೆ ಎಂದಿದ್ದಾರೆ.

ಮೊಬೈಲ್‌ ಸಂಪರ್ಕಗಳ ಪೈಕಿ ಶೇ.60ರಷ್ಟು ಸಂಪರ್ಕಗಳು ಆಧಾರ್‌ಗೆ ಲಿಂಕ್‌ ಆಗಿವೆೆ. 142.9 ಕೋಟಿ ಮೊಬೈಲ್‌ ಸಂಪರ್ಕಗಳ ಪೈಕಿ 85.7 ಕೋಟಿ ಸಂಪರ್ಕಗಳನ್ನು ಆಧಾರ್‌ ಜತೆಗೆ ಲಿಂಕ್‌ ಮಾಡಲಾಗಿದೆ ಎಂದೂ ತಿಳಿಸಿದ್ದಾರೆ. ಈ ಅಂಶಗಳನ್ನು ದೃಢೀಕರಿಸಿದ ಯುಐಡಿಎಐ ಸಿಇಒ ಅಜಯ ಭೂಷಣ ಪಾಂಡೆ ಶೇ.80ರಷ್ಟು ಖಾತೆಗಳು ಲಿಂಕ್‌ ಆಗಿವೆ ಎಂದಿದ್ದಾರೆ.

ನಾಳೆಯಿಂದ ಮತ್ತೆ ಶುರು: ಈ ನಡುವೆ ಮಂಗಳವಾರದಿಂದ ಸರಕಾರಿ ಸೇವೆ ಪಡೆಯಲು ಮತ್ತು ಮೊಬೈಲ್‌ ಸಂಪರ್ಕಕ್ಕಾಗಿ ಆಧಾರ್‌ ಲಿಂಕ್‌ ಮಾಡಬೇಕು ಎಂಬ ಕೇಂದ್ರದ ಆದೇಶ ಪ್ರಶ್ನಿಸಿ ಸಲ್ಲಿಸಲಾಗಿರುವ ಅರ್ಜಿಗಳ ವಿಚಾರಣೆಯನ್ನು  ಮುಖ್ಯ ನ್ಯಾಯಮೂರ್ತಿ ದೀಪಕ್‌ ಮಿಶ್ರಾ ನೇತೃತ್ವದ ಸಾಂವಿಧಾನಿಕ ಪೀಠದಲ್ಲಿ ಶುರುವಾಗಲಿದೆ.