ಸರ್ಕಾರಿ ಸಭೆಗಳಲ್ಲಿ ಮಾಂಸದೂಟ ಬ್ಯಾನ್ ಮಾಡಿ; ಪ್ರಧಾನಿಗೆ ಪೆಟಾ ಮನವಿ

Team Udayavani, Apr 25, 2017, 6:50 PM IST

ನವದೆಹಲಿ:ಜರ್ಮನಿಯಲ್ಲಿ ಸರ್ಕಾರಿ ಕಾರ್ಯಕ್ರಮಗಳಲ್ಲಿ ಮಾಂಸಹಾರವನ್ನು ನಿಷೇಧಿಸಿದೆ. ಅದೇ ರೀತಿ ಭಾರತದಲ್ಲಿಯೂ ಸರ್ಕಾರಿ ಸಭೆ ಮತ್ತು ಕಾರ್ಯಕ್ರಮಗಳಲ್ಲಿ ಮಾಂಸಹಾರವನ್ನು ನಿಷೇಧಿಸಬೇಕೆಂದು ಒತ್ತಾಯಿಸಿ  ಪೆಟಾ(ಪ್ರಾಣಿಗಳ ಅಭಿವೃದ್ಧಿ ಸಂಘಟನೆಯಾದ ಎಥಿಕಲ್ ಟ್ರೀಟ್ ಮೆಂಟ್ ಆಫ್ ಅನಿಮಲ್ಸ್) ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ಮನವಿ ಮಾಡಿಕೊಂಡಿದೆ.

ಜರ್ಮನಿ ಪರಿಸರ ಸಚಿವ ಇತ್ತೀಚೆಗಷ್ಟೇ ಸಚಿವಾಲಯದ ಸಭೆ ಮತ್ತು ಸಮಾರಂಭಗಳಲ್ಲಿ ಮಾಂಸಹಾರ ಬಳಸದಂತೆ ನಿಷೇಧಿಸಿದ್ದರು. ಮಾಂಸಹಾರ ನಿಷೇಧದಿಂದ ಹವಾಮಾನ ಬದಲಾವಣೆಗೆ ಹೆಚ್ಚಿನ ಕೊಡುಗೆ ನೀಡಿದಂತಾಗುತ್ತದೆ ಎಂದು ಪೆಟಾ ಮನವಿಯಲ್ಲಿ ಉಲ್ಲೇಖಿಸಿದ್ದು, ಮಾಂಸಹಾರ ಬಳಕೆಯಿಂದ ಭಾರತದಲ್ಲಿ ಜನರು ತೀವ್ರ ತರವಾದ ಬರಗಾಲ, ಬಿಸಿ ಗಾಳಿಯಿಂದ ತೊಂದರೆಗೊಳಗಾಗುತ್ತಿದ್ದಾರೆ ಎಂದು ತಿಳಿಸಿದೆ.

ಮಾಂಸ ಮಾರಾಟ ಉದ್ಯಮದಿಂದಾಗಿ ಭೂಮಿಯಿಂದ ಬಾಹ್ಯಾಕಾಶದವರೆಗೂ ಬಿಸಿ ವಾತಾವರಣ ಹೆಚ್ಚತೊಡಗಿದೆ, ಅಲ್ಲದೇ ನೈಸರ್ಗಿಕ ಸಂಪತ್ತು ಕೂಡಾ ಹಾಳಾಗತೊಡಗಿದೆ. ಆದರೆ ನಾವು ಕೂಡಾ ನಮ್ಮ ತಟ್ಟೆಯಲ್ಲಿ ಏನು ಇರಬೇಕೆಂಬುದನ್ನು ನಿರ್ಧರಿಸುವ ಮೂಲಕ ಹವಾಮಾನ ಬದಲಾವಣೆಗಾಗಿ ಹೋರಾಟ ನಡೆಸಬೇಕಾಗಿದೆ ಎಂದು ವಾದಿಸಿದೆ.