ವೈದ್ಯ ಸೇವೆಯಲ್ಲಿರುವವರಿಗೆ ಶೇ.20 ಪಿ.ಜಿ. ಸೀಟು ಮೀಸಲು ನಿರ್ಧಾರ ಸರಿ

Team Udayavani, Oct 21, 2022, 6:20 AM IST

ಹೊಸದಿಲ್ಲಿ:  ವೈದ್ಯಕೀಯ ಸೇವೆಯಲ್ಲಿ ಇರುವವರಿಗೆ ವೈದ್ಯ ಸ್ನಾತಕೋತ್ತರ ಪದವಿಯಲ್ಲಿ ಶೇ. 20 ಮೀಸಲು ವ್ಯವಸ್ಥೆ ಕಲ್ಪಿಸಿರುವ ಮಹಾರಾಷ್ಟ್ರ ಸರಕಾರದ ಕ್ರಮವನ್ನು ಸುಪ್ರೀಂ ಕೋರ್ಟ್‌ ಗುರುವಾರ ಪುರಸ್ಕರಿಸಿದೆ.

ನ್ಯಾ| ಡಿ.ವೈ. ಚಂದ್ರ ಚೂಡ್‌ ಮತ್ತು ನ್ಯಾ| ಹಿಮಾ ಕೋಹ್ಲಿ ಅವರನ್ನು ಒಳಗೊಂಡ ನ್ಯಾಯಪೀಠ ಪ್ರಸಕ್ತ ಶೈಕ್ಷಣಿಕ ವರ್ಷದಿಂದಲೇ ಹೊಸ ನಿಯಮ ಜಾರಿಗೊಳಿಸು ವುದು ಬೇಡ ಎಂಬ ಅರ್ಜಿದಾರರ ವಾದ ಒಪ್ಪುವುದು ಕಷ್ಟ ಎಂದು ಹೇಳಿತು.

ಮಹಾರಾಷ್ಟ್ರ ಸರಕಾರದ ನಿರ್ಧಾರದ ಬಗ್ಗೆ ಬಾಂಬೆ ಹೈಕೋರ್ಟ್‌ ನೀಡಿದ ತೀರ್ಪು ಹಸ್ತಕ್ಷೇಪ ಎಂದು ನಾವು ಪರಿಗಣಿಸುವುದಿಲ್ಲ. ಎರಡನೇ ಹಂತದ ಬಳಿಕವೂ ನಿಗದಿತ ವೈದ್ಯ ಸ್ನಾತಕೋತ್ತರ ಪದವಿ ಸೀಟು ಕೌನ್ಸೆಲಿಂಗ್‌ ಅನಂತರ ಭರ್ತಿಯಾಗದೇ ಇದ್ದರೆ ಅದು ಸಾಮಾನ್ಯ ಕೋಟಾಕ್ಕೆ ಸೇರ್ಪಡೆಯಾಗುತ್ತದೆ ಎಂದು ನ್ಯಾಯಪೀಠ ಹೇಳಿತು.

ಅರ್ಜಿದಾರರ ಪರ ವಾದಿಸಿದ ಹಿರಿಯ ನ್ಯಾಯವಾದಿ ಆನಂದ್‌ ಗ್ರೋವರ್‌ “ಮಹಾ ರಾಷ್ಟ್ರ ಸರಕಾರಈ ನೀತಿಯನ್ನು ಜಾರಿಗೊಳಿ ಸುವುದರ ಮೊದಲು ಎಷ್ಟು ಮಂದಿ ವೈದ್ಯ ಸೇವೆಯಲ್ಲಿದ್ದಾರೆ ಎಂಬ ಬಗ್ಗೆ ಮಾಹಿತಿ ಸಂಗ್ರ ಹಿಸಿಯೇ ಇಲ್ಲ. 1,416 ವೈದ್ಯ ಸ್ನಾತಕೋತ್ತರ ಸೀಟುಗಳ ಪೈಕಿ 286ನ್ನು ಸರಕಾರದ ನಿರ್ಧಾರಕ್ಕಾಗಿ ಮೀಸಲಾಗಿ ಇರಿಸಲಾಗಿದೆ. ಆದರೆ, 69 ಮಂದಿ ಮಾತ್ರ ಪ್ರವೇಶ ಪರೀಕ್ಷೆ ಬರೆದು, 52 ಮಂದಿ ಮಾತ್ರ ಸೇರ್ಪಡೆಯಾಗಿ ದ್ದಾರೆ. ಹೀಗಾಗಿ ಶೇ.20 ಮೀಸಲು ನಿರ್ಧಾರ ಸರಿಯಲ್ಲ ಎಂದು ವಾದಿಸಿದರು.