ಯೋಧನ ಶಿಕ್ಷೆಗೆ ಮೋದಿ ತಡೆ

Team Udayavani, Mar 9, 2018, 8:15 AM IST

ನವದೆಹಲಿ: ಪ್ರಧಾನಿ ನರೇಂದ್ರ ಮೋದಿಗೆ ಅಗೌರವ ತೋರಿಸಲಾಗಿದೆ ಎಂಬ ಆರೋಪದ ಮೇರೆಗೆ ಬಿಎಸ್‌ಎಫ್ ಯೋಧರೊಬ್ಬರಿಗೆ ವಾರದ ವೇತನ ಕಡಿತ ಮಾಡುವ ಪ್ರಸ್ತಾಪಕ್ಕೆ ಖುದ್ದು ಮೋದಿಯವರೇ ಅಂಥ ಕ್ರಮ ಕೈಗೊಳ್ಳದಂತೆ ಸೂಚಿಸಿದ್ದಾರೆ. ಹೀಗಾಗಿ ಅದನ್ನು ಬಿಎಸ್‌ಎಫ್ ಹಿಂಪಡೆದಿದೆ. ಪಶ್ಚಿಮ ಬಂಗಾಳದ ನಡಿಯಾ ಜಿಲ್ಲೆಯಲ್ಲಿದ್ದ  ಬಿಎಸ್‌ಎಫ್ನ 15ನೇ ಬೆಟಾಲಿಯನ್‌ ಯೋಧ ಸಂಜೀವ್‌ ಕುಮಾರ್‌ ಫೆ.21ರಂದು ಪ್ರಧಾನಿ ಭಾಗವಹಿಸಿದ್ದ ಕಾರ್ಯಕ್ರಮದ ಬಗ್ಗೆ ಮೇಲಧಿಕಾರಿಗಳಿಗೆ ವರದಿ ಮಾಡುವ ಸಂದರ್ಭದಲ್ಲಿ “ಪ್ರಧಾನಿ ಶ್ರೀ ನರೇಂದ್ರ ಮೋದಿ’ ಎಂದು ಉಲ್ಲೇಖ ಮಾಡಿರಲಿಲ್ಲ. ಅದಕ್ಕೆ ಆಕ್ಷೇಪಿಸಿದ್ದ ಕಮಾಂಡಿಂಗ್‌ ಆಫೀಸರ್‌ (ಸಿ.ಒ) ಅನೂಪ್‌ ಲಾಲ್‌ ಭಗತ್‌, ಕುಮಾರ್‌ ವಿರುದ್ಧ  ತನಿಖೆ ನಡೆಸಿ ಏಳು ದಿನಗಳ ವೇತನ ಕಡಿತ ಶಿಕ್ಷೆಯನ್ನು ವಿಧಿಸಿದ್ದರು. ಈ ಬಗ್ಗೆ ಬಿಎಸ್‌ಎಫ್ಗೆ ಪತ್ರ ಬರೆದಿರುವ ಪ್ರಧಾನಿ ಮೋದಿ, ಯೋಧರು ಅತ್ಯಂತ ಕಠಿಣ ಪರಿಸ್ಥಿತಿಯಲ್ಲಿ ಕೆಲಸ ಮಾಡುತ್ತಾರೆ. ಸೇನೆಯಲ್ಲಿ ಅವರಿಗೆ ಕಮಾಂಡರ್‌ಗಳು ಶಿಸ್ತು ಪಾಲನೆ ಬೋಧಿಸಬೇಕು. ಆದರೆ ಶಿಕ್ಷೆಯು ತಪ್ಪಿಗೆ ಸಮಾನ ತೀವ್ರದ್ದಾಗಿರಬೇಕು ಎಂದು ಮೋದಿ ಪತ್ರದಲ್ಲಿ ವಿವರಿಸಿದ್ದಾರೆ. ಅಲ್ಲದೆ ಯೋಧನ ಹೇಳಿಕೆಯಿಂದಾಗಿ ವೇತನ ಕಡಿತ ಮಾಡುವುದು ಸರಿಯಲ್ಲ ಎಂದೂ  ಪತ್ರದಲ್ಲಿ ಆಕ್ಷೇಪಿಸಿದ್ದಾರೆ.