ದೀರ್ಘಾವಧಿ ರಫ್ತಿಗೆ ಯೋಜನೆಗಳನ್ನು ರೂಪಿಸಿ: ಉದ್ಯಮಿಗಳಿಗೆ ಮೋದಿ

Team Udayavani, Jun 23, 2022, 9:14 PM IST

ನವದೆಹಲಿ: ಭಾರತದ ಉದ್ದಿಮೆಗಳು, ಉದ್ಯಮಿಗಳು ವಿದೇಶಗಳಿಗೆ ದೀರ್ಘಾವಧಿಯವರೆಗೆ ರಫ್ತು ಮಾಡಲು ದಾರಿ ಕಂಡುಕೊಳ್ಳಬೇಕು. ಅದಕ್ಕೆ ಸರ್ಕಾರವೇನು ಮಾಡಬೇಕು ಎಂಬ ಸಲಹೆಗಳನ್ನೂ ದಯವಿಟ್ಟು ನೀಡಿ ಎಂದು ಪ್ರಧಾನಿ ನರೇಂದ್ರ ಮೋದಿ ಮನವಿ ಮಾಡಿದ್ದಾರೆ.

ದೆಹಲಿಯಲ್ಲಿ ಹೊಸ ವಾಣಿಜ್ಯ ಭವನ ಉದ್ಘಾಟಿಸಿದ ವೇಳೆ ಅವರು ಈ ಮಾತುಗಳನ್ನು ಆಡಿದರು. ರಫ್ತು ಹೆಚ್ಚಾಗುತ್ತ ಹೋದ ಹಾಗೆ ಒಂದು ದೇಶದ ಸ್ಥಿತಿ ಬದಲಾಗುತ್ತದೆ. ಅಭಿವೃದ್ಧಿ ಹೊಂದುತ್ತಿರುವ ರಾಷ್ಟ್ರ, ಅಭಿವೃದ್ಧಿ ಹೊಂದಿದ ರಾಷ್ಟ್ರವಾಗಿ ಬದಲಾಗುತ್ತದೆ. ಈ ಹಿನ್ನೆಲೆಯಲ್ಲಿ ಉದ್ಯಮಿಗಳು ಚಿಂತಿಸಬೇಕು ಎಂದರು.

ಇದೇ ವೇಳೆ ಭಾರತದ ರಫ್ತುಸ್ಥಿತಿಯ ಬಗ್ಗೆ ಮೋದಿ ಮೆಚ್ಚುಗೆ ವ್ಯಕ್ತಪಡಿಸಿದರು. ಇಡೀ ಜಗತ್ತಿನಲ್ಲಿ ಎಲ್ಲ ಕಡೆ ಪರಿಸ್ಥಿತಿ ಹದಗೆಟ್ಟಿದ್ದರೂ, 2021-22ರ ಸಾಲಿನಲ್ಲಿ ಭಾರತದ ಸರಕು ಮತ್ತು ಸೇವಾ ರಫ್ತುಪ್ರಮಾಣ 50 ಲಕ್ಷ ಕೋಟಿ ರೂ.ಗಳಾಗಿತ್ತು. ಬರೀ ಸರಕಿನ ರಫ್ತು ಪ್ರಮಾಣವೇ 31 ಲಕ್ಷ ಕೋಟಿ ರೂ.ಗಳಾಗಿದ್ದವು. ಇದು ನಮ್ಮ ಗುರಿಗಿಂತ ಹೆಚ್ಚಿನ ಸಾಧನೆ ಎಂದು ಮೋದಿ ಹೇಳಿದರು.