ಈಗ ಭಾರತ-ಸಿಂಗಾಪುರ ನಡುವೆ ಡಿಜಿಟಲ್‌ ವಹಿವಾಟು ಸಾಧ್ಯ

Team Udayavani, Feb 22, 2023, 7:15 AM IST

ನವದೆಹಲಿ:”ಭಾರತದಲ್ಲಿ ಇತ್ತೀಚೆಗೆ ಯುಪಿಐ(ಯುನಿಫೈಡ್‌ ಪೇಮೆಂಟ್‌ ಇಂಟರ್‌ಫೇಸ್‌) ವಹಿವಾಟುಗಳು ಗಣನೀಯವಾಗಿ ಹೆಚ್ಚುತ್ತಿದ್ದು, ಶೀಘ್ರದಲ್ಲೇ ನಗದು ವಹಿವಾಟನ್ನು ಡಿಜಿಟಲ್‌ ವಹಿವಾಟು ಮೀರಲಿದೆ’ ಎಂದು ಪ್ರಧಾನಿ ನರೇಂದ್ರ ಮೋದಿ ವಿಶ್ವಾಸ ವ್ಯಕ್ತಪಡಿಸಿದರು.

ಭಾರತದ ಯುಪಿಐ ಹಾಗೂ ಸಿಂಗಾಪುರದ ಪೇನೌ ನಡುವೆ ಸಂಪರ್ಕ ಕಲ್ಪಿಸುವ ಆ ಮೂಲಕ ಎರಡೂ ದೇಶಗಳ ನಡುವೆ ಡಿಜಿಟಲ್‌ ವಹಿವಾಟು ಸಾಧ್ಯವಾಗಿಸುವಂಥ ಯೋಜನೆಗೆ ಚಾಲನೆ ನೀಡಿ ಅವರು ಮಾತನಾಡಿದರು. ವರ್ಚುವಲ್‌ ಆಗಿ ನಡೆದ ಈ ಕಾರ್ಯಕ್ರಮದಲ್ಲಿ ಸಿಂಗಾಪುರ ಪ್ರಧಾನಿ ಲೀ ಸಿಯನ್‌ ಲೂಂಗ್‌ ಅವರೂ ಉಪಸ್ಥಿತರಿದ್ದರು.

2022ರಲ್ಲಿ ಭಾರತದಲ್ಲಿ 126 ಲಕ್ಷ ಕೋಟಿ ರೂ.ಗೂ ಅಧಿಕ ಮೊತ್ತದ 74 ಶತಕೋಟಿಯಷ್ಟು ವಹಿವಾಟುಗಳು ಯುಪಿಐ ಮೂಲಕ ನಡೆದಿದೆ. ಈಗ ಯುಪಿಐ-ಪೇನೌ ಲಿಂಕ್‌ ಮಾಡುವ ಮೂಲಕ ಭಾರತ-ಸಿಂಗಾಪುರ ಸಂಬಂಧದಲ್ಲಿ ಹೊಸ ಮೈಲುಗಲ್ಲು ಸ್ಥಾಪನೆಯಾದಂತಾಗಿದೆ ಎಂದು ಪ್ರಧಾನಿ ಮೋದಿ ಹೇಳಿದರು.

ಸಿಂಗಾಪುರ ಪ್ರಧಾನಿ ಲೀ ಸಿಯನ್‌ ಲೂಂಗ್‌, ಈಗ ಎರಡೂ ದೇಶಗಳ ನಾಗರಿಕರು ಅತ್ಯಂತ ವೇಗವಾಗಿ ಮತ್ತು ಕಡಿಮೆ ವೆಚ್ಚದಲ್ಲಿ ಡಿಜಿಟಲ್‌ ವಹಿವಾಟು ನಡೆಸಬಹುದು ಎಂದರು.