World’s first; ಮಾ.1ರಂದು ಜಗತ್ತಿನ ಮೊದಲ ವೈದಿಕ ಗಡಿಯಾರ ಲೋಕಾರ್ಪಣೆ

Team Udayavani, Feb 27, 2024, 6:16 AM IST

ಉಜ್ಜಯಿನಿ: ಮಧ್ಯಪ್ರದೇಶದ ಉಜ್ಜಯಿನಿಯಲ್ಲಿ ಜಗತ್ತಿನ ಮೊದಲ ವೈದಿಕ ಗಡಿಯಾರಕ್ಕೆ ಮಾ. 1ರಂದು ಪ್ರಧಾನಿ ಮೋದಿ ಚಾಲನೆ ನೀಡಲಿದ್ದಾರೆ. ಪ್ರಾಚೀನ ಭಾರತದ ಸಾಂಪ್ರದಾಯಿಕ ಪಂಚಾಂಗ ದಂತೆ ಈ ಗಡಿಯಾರ ಸಮಯ ತೋರಿಸಲಿದೆ.

ಉಜ್ಜಯಿನಿಯ ಸರಕಾರಿ ಜಿವಾಜಿ ವೀಕ್ಷಣಾ ಲಯದಲ್ಲಿ 85 ಅಡಿ ಎತ್ತರದ ಟವರ್‌ನಲ್ಲಿ ವೈದಿಕ ಗಡಿಯಾರ ಅಳವಡಿಸಲಾಗಿದೆ. ಗಡಿಯಾರವು ವೈದಿಕ ಹಿಂದೂ ಪಂಚಾಂಗ, ಗ್ರಹಗಳ ಸ್ಥಾನಗಳು, ಮುಹೂರ್ತ, ಜೋತಿಷ ಲೆಕ್ಕಾಚಾರ, ಭವಿಷ್ಯವಾಣಿ ಇತ್ಯಾದಿ ಮಾಹಿತಿಯನ್ನು ಪ್ರದರ್ಶಿಸುತ್ತದೆ. ಜತೆಗೆ ಇದು ಭಾರತೀಯ ಪ್ರಮಾಣಿತ ಸಮಯ (ಐಎಸ್‌ಟಿ) ಮತ್ತು ಗ್ರೀನ್ವಿಚ್‌ ಸರಾಸರಿ ಸಮಯ(ಜಿಎಂಟಿ)ವನ್ನು ತೋರಿಸುತ್ತದೆ. ಒಂದು ಸೂರ್ಯೋದಯದಿಂದ ಇನ್ನೊಂದಕ್ಕೆ ಸೂರ್ಯೋದಯವನ್ನು ಆಧರಿಸಿ ಗಡಿಯಾರ ಸಮಯವನ್ನು ಲೆಕ್ಕಹಾಕುತ್ತದೆ.

“ಎರಡು ಸೂರ್ಯೋದಯಗಳ ನಡುವಿನ ಸಮಯವನ್ನು 30 ಭಾಗಗಳಾಗಿ ವಿಭಾಗಿಸಲಾಗುತ್ತದೆ. ಐಎಸ್‌ಡಿ ಪ್ರಕಾರ, ಈ 30 ಮಹೂರ್ತಗಳು ತಲಾ 48 ನಿಮಿಷಗಳದ್ದಾಗಿರುತ್ತದೆ. 300 ವರ್ಷಗಳ ಹಿಂದೆಯೇ ಉಜ್ಜಯಿನಿಯಿಂದಲೇ ಜಗತ್ತು ಕಾಲಮಾನವನ್ನು ನಿರ್ಧರಿಸುತ್ತಿತ್ತು. ಸಮಯ ತಿಳಿಯಲೆಂದೇ ಉಜ್ಜಯಿನಿಯಲ್ಲಿ ಒಂದು ಯಂತ್ರವೂ ಇತ್ತು ಎಂದು ತಜ್ಞರು ಹೇಳುತ್ತಾರೆ. ಕರ್ಕಾಟಕ ಸಂಕ್ರಾಂತಿ ವೃತ್ತವು ಉಜ್ಜಯಿನಿಯ ಮೂಲಕ ಹಾದುಹೋಗುತ್ತದೆ’ ಎಂದು ಮಹಾರಾಜ ವಿಕ್ರಮಾದಿತ್ಯ ಸಂಶೋಧನ ಕೇಂದ್ರದ ನಿರ್ದೇಶಕರಾದ ಶ್ರೀರಾಮ್‌ ತಿವಾರಿ ತಿಳಿಸಿದ್ದಾರೆ.