ಪುತ್ರ ಶೋಕ : ಕೇಶೂಭಾಯ್‌ ನಿವಾಸಕ್ಕೆ ಭೇಟಿ ನೀಡಿ ಮೋದಿ ಸಂತಾಪ

Team Udayavani, Sep 14, 2017, 3:45 PM IST

ಗಾಂಧಿನಗರ : ವಿಶೇಷ ಸದ್ಭಾವನೆಯ ದ್ಯೋತಕವಾಗಿ ಪ್ರದಾನಿ ನರೇಂದ್ರ ಮೋದಿ ಅವರು ಇಂದು ಗುರುವಾರ ಮಾಜಿ ಗುಜರಾತ್‌ ಮುಖ್ಯಮಂತ್ರಿ ಕೇಶೂಭಾಯ್‌ ಪಟೇಲ್‌ ಅವರ ಇಲ್ಲಿನ ನಿವಾಸಕ್ಕೆ ತೆರಳಿ, ಪಟೇಲ್‌ ಅವರ ಪುತ್ರ ಪ್ರವೀಣ್‌ (60) ಅವರ ನಿಧನಕ್ಕೆ ಸಂತಾಪ ವ್ಯಕ್ತಪಡಿಸಿ ಸಾಂತ್ವನ ಹೇಳಿದರು.

ಕೇಶೂಭಾಯ್‌ ಅವರ ಪುತ್ರ ಪ್ರವೀಣ್‌ ಅವರ ಅಮೆರಿಕದಲ್ಲಿ ಹೃದಯಾಘಾತದಿಂದ ಹಠಾತ್‌ ನಿಧನ ಹೊಂದಿರುವುದಾಗಿ ಬಿಜೆಪಿ ನಾಯಕರನ್ನು ಉಲ್ಲೇಖೀಸಿ ಪಿಟಿಐ ವರದಿ ಮಾಡಿದೆ. 

ಇಂದು ಗುರುವಾರ ಕೇಂದ್ರ ಸರಕಾರದ ಅತ್ಯಂತ ಮಹತ್ವಾಕಾಂಕ್ಷೀ ಅಹ್ಮದಾಬಾದ್‌ – ಮುಂಬಯಿ ಹೈ ಸ್ಪೀಡ್‌ ರೈಲು (ಬುಲಟ್‌ ಟ್ರೈನ್‌) ಯೋಜನೆಗೆ ಚಾಲನೆ ನೀಡಲು ಜಪಾನ್‌ ಪ್ರಧಾನಿ ಶಿಂಜೋ ಅಬೆ ಜತೆಗೆ ಅಹ್ಮದಾಬಾದ್‌ಗೆ ಬಂದಿದ್ದ ಮೋದಿ ಅವರು ಬಿಡುವಿರದ ಕಾರ್ಯಕ್ರಮದ ನಡುವೆಯೂ ಸ್ವಲ್ಪ ಹೊತ್ತನ್ನು ಬಳಸಿಕೊಂಡು ಕೇಶೂಭಾಯ್‌ ನಿವಾಸಕ್ಕೆ ತೆರಳಿದರು. 

ಪ್ರಧಾನಿ ಮೋದಿ ಜತೆಗೆ ಶಿಂಜೋ ಅಬೆ ಕೂಡ ಕೇಶೂಭಾಯ್‌ ನಿವಾಸಕ್ಕೆ ತೆರಳಿ ಪುಷ್ಪ ಗುಚ್ಚ ನೀಡಿ ಸಂತಾಪ ವ್ಯಕ್ತಪಡಿಸಿದರು.