ಕೆನಡ ಪ್ರಧಾನಿ ಟ್ರೂಡಿಯೋಗೆ ಮೋದಿ ಆತ್ಮೀಯ ಅಪ್ಪುಗೆಯ ಸ್ವಾಗತ

Team Udayavani, Feb 23, 2018, 11:00 AM IST

ಹೊಸದಿಲ್ಲಿ : ಪ್ರಧಾನಿ ನರೇಂದ್ರ ಮೋದಿ ಅವರು ಇಂದು ಶುಕ್ರವಾರ ಬೆಳಗ್ಗೆ ಕೆನಡ ಪ್ರದಾನಿ ಜಸ್ಟಿನ್‌ ಟ್ರೂಡಿಯೋ ಅವರಿಗೆ ಆತ್ಮೀಯ ಅಪ್ಪುಗೆಯ ಸ್ವಾಗತ ನೀಡಿದರು.

ಟ್ರೂಡಿಯೋ ಮತ್ತು ಅವರ ಕುಟುಂಬದವರನ್ನು ಪ್ರಧಾನಿ ಮೋದಿ ರಾಷ್ಟ್ರಪತಿ ಭವನಕ್ಕೆ ಆದರದಿಂದ ಸ್ವಾಗತಿಸಿದರು. ಟ್ರೂಡಿಯೋ ಅವರಿಗೆ ರಾಷ್ಟ್ರಪತಿ ಭವನದಲಿ ಗೌರವ ವಂದನೆಯನ್ನು ನೀಡಲಾಯಿತು. 

ಟ್ರೂಡಿಯೋ ಅವರು ಪ್ರಧಾನಿ ನರೇಂದ್ರ ಮೋದಿ ಅವರೊಂದಿಗೆ ವ್ಯೂಹಾತ್ಮಕ ಮಹತ್ವದ ವಿಷಯಗಳ ಬಗ್ಗೆ ಮಾತುಕತೆ ನಡೆಸುವರು.

ಖಾಲಿಸ್ಥಾನ ಪ್ರತ್ಯೇಕತವಾದಿ ಜಸ್ಪಾಲ್‌ ಅತ್ವಾಲ್‌ಗೆ ಕೆನಡ ಪ್ರಧಾನಿ ಗೌರವಾರ್ಥ ಮುಂಬಯಿಯಲ್ಲಿನ ಭೋಜನ ಕೂಟಕ್ಕೆ ನೀಡಲಾಗಿದ್ದ ಆಹ್ವಾನವನ್ನು ಅನಂತರದಲ್ಲಿ ರಾಜತಾಂತ್ರಿಕ ಒತ್ತಡದ ಫ‌ಲವಾಗಿ ರದ್ದುಗೊಳಿಸಲಾದ ನಡುವೆ ಮೋದಿ – ಟ್ರೂಡಿಯೋ ಭೇಟಿ ನಡೆಯುತ್ತಿರುವುದು ಗಮನಾರ್ಹವಾಗಿದೆ.

ವಿವಾದದ ಹಿನ್ನೆಲೆಯಲ್ಲಿ ಟ್ರೂಡಿಯೋ ಅವರು ನಿನ್ನೆ ಗುರುವಾರ “ಅತ್ವಾಲ್‌ಗೆ ಆಹ್ವಾನ ನೀಡಬಾರದಿತ್ತು’ ಎಂದು ಹೇಳಿದ್ದರು. 

ಟ್ರೂಡಿಯೋ ಅವರಿಗೆ ಇಂದು ರಾಷ್ಟ್ರಪತಿ ಭವನದಲ್ಲಿ ವಿಧ್ಯುಕ್ತ ಸ್ವಾಗತ ನೀಡಲಾಯಿತೆಂದು ವಿದೇಶ ವ್ಯವಹಾರಗಳ ಸಚಿವಾಲಯದ ವಕ್ತಾರ ರವೀಶ್‌ ಕುಮಾರ್‌ ಟ್ವೀಟ್‌ ಮಾಡಿದ್ದಾರೆ. 

ಮೋದಿ ಅವರ ಟ್ವೀಟ್‌ಗೆ ಉತ್ತರವಾಗಿ ಟ್ರೂಡಿಯೋ ಅವರು “ಭಾರತಕ್ಕೆ ನೀಡುತ್ತಿರುವ ತನ್ನ ಈ ಭೇಟಿ ಈ ವರೆಗೆ ಅತ್ಯಂತ ಮಹೋನ್ನತವಾಗಿದೆ’ ಎಂದು ಹೇಳಿದ್ದಾರೆ.