ನೀರವ್‌ ಮೋದಿ, ಮೆಹುಲ್‌ ಚೋಕ್ಸಿ ಪಾಸ್‌ ಪೋರ್ಟ್‌ ಅಮಾನತು

Team Udayavani, Feb 16, 2018, 3:58 PM IST

ಹೊಸದಿಲ್ಲಿ : ವಿದೇಶ ವ್ಯವಹಾರಗಳ ಸಚಿವಾಲಯದಲ್ಲಿನ ಪಾಸ್‌ ಪೋರ್ಟ್‌ ಪ್ರಾಧಿಕಾರ ಇಂದು ಶುಕ್ರವಾರ, ಪಿಎನ್‌ಬಿ ಬಹುಕೋಟಿ ಹಗರಣದಲ್ಲಿ ಭಾಗಿಯಾಗಿರುವ ಬಿಲಿಯಾಧಿಪತಿ ವಜ್ರಾಭರಣ ವ್ಯಾಪಾರಿ ನೀರವ್‌ ಮೋದಿ ಮತ್ತು ಆತನ ಪಾಲುದಾರು ಮೆಹುಲ್‌ ಚೋಕ್ಸಿ ಅವರ ಪಾಸ್‌ ಪೋರ್ಟನ್ನು ತತ್‌ಕ್ಷಣಕ್ಕೆ ಜಾರಿಗೆ ಬರುವಂತೆ, ಜಾರಿ ನಿರ್ದೇಶನಾಲಯದ ಸೂಚನೆ ಪ್ರಕಾರ,  ನಾಲ್ಕು ವಾರಗಳ ಅವಧಿಗೆ ಅಮಾನತು ಮಾಡಿದೆ. ಇದೇ ವೇಳೆ ಇನ್ನೂ 50 ಔದ್ಯಮಿಕ ಸಂಸ್ಥೆಗಳ ಮೇಲೆ ದಾಳಿ ನಡೆಯುವ ಸೂಚನೆಯನ್ನು ಅದು ನೀಡಿದೆ. 

ಭಾರತೀಯ ಪಾಸ್‌ ಪೋರ್ಟ್‌ ಹೊಂದಿರುವ ನೀರವ್‌ ಮೋದಿ ಈ ವರ್ಷ ಜನವರಿ 1ರಂದೇ ವಿದೇಶಕ್ಕೆ ಪಲಾಯನ ಮಾಡಿದ್ದರು. ಆತನ  ಸಹೋದರ ನಿಶಾಲ್‌ (ಬೆಲ್ಜಿಯನ್‌ ಪ್ರಜೆ) ಕೂಡ ಅಂದೇ ದೇಶದಿಂದ ನಿರ್ಗಮಿಸಿದ್ದ. 

ನೀರವ್‌ ಮೋದಿ ಅವರ ಪತ್ನಿ ಅಮಿ (ಅಮೆರಿಕನ್‌ ಪ್ರಜೆ) ಜನವರಿ 6ರಂದು ವಿದೇಶಕ್ಕೆ ಹೋಗಿದ್ದರು. ಮತ್ತು ಆತನ ತಾಯಿಯ ಸಹೋದರ ಹಾಗೂ ಉದ್ಯಮ ಸಹವರ್ತಿ ಮೆಹುಲ್‌ ಚೋಕ್ಸಿ ಜನವರಿ 4ರಂದು ವಿದೇಶಕ್ಕೆ ಪಲಾಯನ ಮಾಡಿದ್ದರು. 

ಜಾರಿ ನಿರ್ದೇಶನಾಲಯ ಇಂದು ನೀರವ್‌ ಮೋದಿಗೆ ಸಮನ್ಸ್‌ ಜಾರಿ ಮಾಡಿದ್ದು ಒಂದು ವಾರದೊಳಗೆ ತನ್ನ ಮುಂದೆ ಹಾಜರಾಗಿ ಸಾಕ್ಷ್ಯ ನುಡಿಯಬೇಕೆಂದು ಆದೇಶಿಸಿದೆ.