ಠಾಗೋರ್ ಹುಟ್ಟುಹಬ್ಬದಂದು ದೀದಿ ಕೋವಿಡ್ ಗೀತೆ ವಿವಾದ

Team Udayavani, May 8, 2020, 9:12 PM IST

ಕೋಲ್ಕತ: ದಿಗ್ಗಜ ಕವಿ ರವೀಂದ್ರನಾಥ್‌ ಠಾಗೋರ್ ಹುಟ್ಟು ಹಬ್ಬದ ದಿನದ ವಿಶೇಷ ಕಾರ್ಯಕ್ರಮದಲ್ಲಿ ಪಶ್ಚಿಮ ಬಂಗಾಳ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಬರೆದಿರುವ ಕೋವಿಡ್-19 ವೈರಸ್‌ ಕುರಿತ ಜಾಗೃತಿ ಗೀತೆಯನ್ನು ರಾಜ್ಯವ್ಯಾಪಿ ಘಟಕಗಳಲ್ಲಿ ಹಾಡುವಂತೆ ಪಶ್ಚಿಮ ಬಂಗಾಳ ಪೊಲೀಸ್‌ ಇಲಾಖೆ ಹೇಳಿದ್ದು ಈಗ ವಿವಾದಕ್ಕೆ ಕಾರಣವಾಗಿದೆ. ಮಮತಾ ಬ್ಯಾನರ್ಜಿ ಕ್ರಮವನ್ನು ಬಿಜೆಪಿ ಕಟು ಪದಗಳಿಂದ ಟೀಕಿಸಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಬಿಜೆಪಿ ಮುಖಂಡ ಮುಕುಲ್‌ ರಾಯ್‌, “ಗುರುದೇವ ಜೀವನ ಪರಂಪರೆ ಆಚರಿಸುತ್ತಿರುವುದಕ್ಕೂ, ಮಮತಾ ಬ್ಯಾನರ್ಜಿಯ ಜಾಗೃತಿ ಗೀತೆಗೂ ಏನು ಸಂಬಂಧವಿದೆ? ಎಂದು ಪ್ರಶ್ನಿಸಿದ್ದಾರೆ. ಈ ಬಗ್ಗೆ ಮಾತನಾಡಿರುವ ಹೂಗ್ಲಿಯ ಬಿಜೆಪಿ ಸಂಸದ ಚಟರ್ಜಿ, “ಪೊಲೀಸ್‌ ಆದೇಶಗಳು ಅವಮಾನಕರವಾಗಿದೆ, ಮಮತಾ ಜನಗಳ ಮೇಲೆ ಇದನ್ನು ಹೇರುವ ಪ್ರಯತ್ನ ನಡೆಸಿದ್ದಾರೆ’ ಎಂದು ಟೀಕಿಸಿದ್ದಾರೆ. ಇದಕ್ಕೆ ಉತ್ತರಿಸಿರುವ ತೃಣಮೂಲ ಕಾಂಗ್ರೆಸ್‌ ನಾಯಕ ಮದನ್‌ ಮಿತ್ರಾ. “ದೀದಿ ಇಂತಹ ಸಂದರ್ಭದಲ್ಲಿ ಕೋವಿಡ್-19 ವಿರುದ್ಧ ಜಾಗೃತಿ ಮಾಡುವ ಕೆಲಸ ಮಾಡಿದ್ದಾರೆ. ಆದರೆ ಬಿಜೆಪಿ ಇಂತಹ ವಿಚಾರದಲ್ಲಿ ರಾಜಕೀಯ ಮಾಡುತ್ತಿದೆ’ ಎಂದು ದೂರಿದ್ದಾರೆ.