ಛತ್ತೀಸ್‌ಗಢ : ನಕ್ಸಲರ ಐಇಡಿ ಬಾಂಬ್‌ ಬ್ಲಾಸ್ಟ್‌, ಪೊಲೀಸ್‌ ಜವಾನ ಜಖಂ

Team Udayavani, Jul 28, 2017, 11:00 AM IST

ಜಗದಾಳಪುರ : ಛತ್ತೀಸ್‌ಗಢದ ದಾಂತೇವಾಡ ಜಿಲ್ಲೆಯಲ್ಲಿ ನಕ್ಸಲರು ನೆಲದಡಿ ಹುಗಿದಿಟ್ಟಿದ್ದ ಸುಧಾರಿತ ಸ್ಫೋಟಕ ಉಪಕರಣ (ಐಇಡಿ) ಸ್ಫೋಟಗೊಂಡ ಪರಿಣಾಮ ಓರ್ವ ಪೊಲೀಸ್‌ ಜವಾನ ತೀವ್ರವಾಗಿ ಗಾಯಗೊಂಡ ಘಟನೆ ವರದಿಯಾಗಿದೆ. 

ಗುರುವಾರ ತಡ ರಾತ್ರಿ ಕಾತೇಕಲ್ಯಾಣ್‌ ಪ್ರದೇಶದಲ್ಲಿ ದಾಂತೇವಾಡದ ಪೊಲೀಸ್‌ ಸುಪರಿಂಟೆಂಡೆಂಟ್‌ ಕಾಮಲೋಚನ ಕಶ್ಯಪ್‌ ಅವರು ತಮ್ಮ ತಂಡದೊಂದಿಗೆ ಗಸ್ತು ನಡೆಸುತ್ತಿದ್ದಾಗ ನಕ್ಸಲರು ಹುಗಿದಿಟ್ಟಿದ್ದ ನೆಲ ಬಾಂಬ್‌ ಸ್ಫೋಟಗೊಂಡಾಗ ಪೊಲೀಸ್‌ ಜವಾನ ಲಕ್ಷ್ಮಯ್ಯ ಎಂಬವರು ತೀವ್ರವಾಗಿ ಗಾಯಗೊಂಡು ಬಳಿಕ ಆಸ್ಪತ್ರೆಗೆ ದಾಖಲಾದರೆಂದು ಹಿರಿಯ ಪೊಲೀಸ್‌ ಅಧಿಕಾರಿ ತಿಳಿಸಿದ್ದಾರೆ.

ಮಾವೋ ಉಗ್ರರು ಈ ಭಾಗದಲ್ಲಿ ಇಂದಿನಿಂದ ಆ.3ರ ವರೆಗೆ ಹುತಾತ್ಮರ ಸಪ್ತಾಹವನ್ನು ಆಚರಿಸುತ್ತಿದ್ದು ಈ ಸಂಬಂಧ ಅವರು ಹಾಕಿದ್ದ ಪೋಸ್ಟರ್‌ ಒಂದನ್ನು  ಕೀಳುವಾಗ ಅಲ್ಲೇ ಕೆಳಗಿದ್ದ ಐಇಡಿ ಸ್ಫೋಟಗೊಂಡಿತೆಂದು ಅಧಿಕಾರಿ ತಿಳಿಸಿದ್ದಾರೆ.