ಶಿಕಾಗೊ ಹೈಟೆಕ್‌ ವೇಶ್ಯಾವಾಟಿಕೆಯಲ್ಲಿ ತೆಲುಗು ನಟಿಯರು?

Team Udayavani, Jun 16, 2018, 10:00 AM IST

ಹೈದರಾಬಾದ್‌ : ಶಿಕಾಗೋದಲ್ಲಿ ನಡೆಯುತ್ತಿತ್ತೆನ್ನಲಾದ ಹೈಟೆಕ್‌ ವೇಶ್ಯಾವಾಟಿಕೆ ಜಾಲವೊಂದನ್ನು ಅಮೆರಿಕದ FBI ಭೇದಿಸಿದ್ದು, ಇದರಲ್ಲಿ ತೆಲುಗು ಚಿತ್ರದ ನಟಿಯರೂ ಭಾಗಿಯಾಗಿದ್ದಾರೆಂದು ಹೇಳಲಾಗಿದೆ. ಪ್ರಕರಣಕ್ಕೆ ಸಂಬಂಧಪಟ್ಟಂತೆ, ತೆಲುಗು ಚಿತ್ರರಂಗದ ಪ್ರೊಡಕ್ಷನ್‌ ಮ್ಯಾನೇಜರ್‌ ಗಳಾಗಿರುವ ಕಿಶನ್‌ ಮೊದುಗು ಮುಡಿ ಅಲಿಯಾಸ್‌ ಶ್ರೀರಾಜ್‌ ಚೆನ್ನುಪತಿ, ಚಂದ್ರಕಲಾ ಪೂರ್ಣಿಮಾ ಮೊದುಗುಮುಡಿ ಅಲಿಯಾಸ್‌ ವೆಭಾ ಜಯಂ ಎಂಬ ದಂಪತಿಯನ್ನು ಮೇ 28ರಂದು 28ರಂದು ವಾಷಿಂಗ್ಟನ್‌ ಡಿ.ಸಿ.ಯಲ್ಲಿ ಬಂಧಿಸಲಾಗಿದೆ. ಬಂಧಿತರು ಹೈದರಾಬಾದ್‌ ನವರಾಗಿದ್ದು, ಅಮೆರಿಕದಲ್ಲಿ ಅಕ್ರಮವಾಗಿ ನೆಲೆಸಿರುವುದು ಪತ್ತೆಯಾಗಿದೆ.

ಅವಕಾಶಗಳಿಗಾಗಿ ಹಾತೊರೆಯುತ್ತಿರುವ ನಟಿಯನ್ನು ಅಮೆರಿಕಕ್ಕೆ ಕರೆಯಿಸಿಕೊಂಡು, ಅಮೆರಿಕದಲ್ಲಿ ನಡೆಯುವ ತೆಲುಗು ಭಾಷಿಗರ ಸಮಾರಂಭಗಳಿಗೆ ಕರೆದುಕೊಂಡು ಹೋಗಿ, ಅಲ್ಲಿಗೆ ಬರುತ್ತಿದ್ದ ಶ್ರೀಮಂತ ತೆಲುಗು ವ್ಯಕ್ತಿಗಳಿಗೆ ಈ ನಟಿಯರನ್ನು ತೋರಿಸಿ ವ್ಯಾಪಾರ ಕುದುರಿಸುತ್ತಿದ್ದರೆಂದು ಆರೋಪಿಸಲಾಗಿದೆ. 2017ರ ಮೇ 11 ರಿಂದ 2018ರ ಜ.22ರ ನಡುವಿನ ಪ್ರಕರಣ ಇದಾಗಿದೆ. ಯುಎಸ್‌ ಗಡಿ ಭದ್ರತಾ ಪಡೆಗಳ ಮಾಹಿತಿಯ ಮೇರೆಗೆ ಎಪ್ರಿಲ್‌ ನಲ್ಲಿ ಮೆರಿಟೋ ಹೊಟೆಲ್‌ ನ ಮೇಲೆ ದಾಳಿ ನಡೆಸಿದಾಗ ಕೊಠಡಿಯೊಂದರಲ್ಲಿ ಚಿಕ್ಕ ಪುಟ್ಟ ಕೈಬರಹದಲ್ಲಿ ಪ್ರಖ್ಯಾತ ತೆಲುಗು ನಟನೊಬ್ಬನ ಹೆಸರನ್ನು ಬರೆದು, ‘ರೂಂ. ನಂಬರ್‌ 2018 – ಎರಡು ಬಾರಿ’, ‘ರೂಂ. ನಂಬರ್‌ 404 – ಒಂದು ಬಾರಿ’ ಎಂದು ಬರೆದಿತ್ತು. ಇದರ ಜಾಡು ಹಿಡಿದು ಹೊರಟ ಅಧಿಕಾರಿಗಳು ಇಡೀ ಜಾಲವನ್ನೇ ಬಯಲುಗೊಳಿಸಿದ್ದಾರೆ.