ಅಪಹರಿಸಲ್ಪಟ್ಟಿದ್ದ ಥಾಣೆ ಯುವಕನ ರಕ್ಷಣೆ ;ಇಬ್ಬರು ಮಹಿಳೆಯರು, ಐವರು ಪುರುಷರ ಬಂಧನ

Team Udayavani, Nov 2, 2020, 10:35 PM IST

ಥಾಣೆ: ಥಾಣೆ ಪೊಲೀಸರು ನೆರೆಯ ಪಾಲ್ಗರ್‌ ಜಿಲ್ಲೆಯಲ್ಲಿ 4 ಲಕ್ಷ ರೂ. ಗಳ ಸುಲಿಗೆಗಾಗಿ ಸೆರೆಯಾಗಿದ್ದ ಐಟಿ ವೃತ್ತಿಪರನನ್ನು ರಕ್ಷಿಸಿ, ಏಳು ಜನರನ್ನು ಬಂಧಿಸಿದ್ದಾರೆ ಎಂದು ಅಧಿಕಾರಿಯೊಬ್ಬರು ಸೋಮವಾರ ತಿಳಿಸಿದ್ದಾರೆ. ಅಭಿಷೇಕ್‌ ಗುಪ್ತಾ (20) ಅವರು ಶನಿವಾರ ಕೆಲಸದಲ್ಲಿದ್ದಾಗ ಅವರ ಸ್ನೇಹಿತೆಯರಲ್ಲಿ ಒಬ್ಬಳಾದ ನರ್ಗೀಸ್‌ ಮೊಹಮ್ಮದ್‌ ಜಾವೇದ್‌ (20) ಮಧ್ಯಾಹ್ನ ಅವರನ್ನು ವಸಾಯಿಯಲ್ಲಿರುವ ಉಪಾಹಾರ ಗೃಹಕ್ಕೆ ಕರೆದಳು. ಅವರು ಅಲ್ಲಿಗೆ ತಲುಪಿದಾಗ, ಏಳು ಜನರ ತಂಡವು ಅವರನ್ನು ಕಾರಿನಲ್ಲಿ ಅಪಹರಿಸಿ ಮೊದಲು ಮನೋರ್‌ಗೆ ಮತ್ತು ಅನಂತರ ವಿರಾರ್‌ನ ಬಲೂಚ್‌ ನಗರದ ಫ್ಲ್ಯಾಟ್‌ಗೆ ಕರೆದೊಯ್ದು ಹಲ್ಲೆ ನಡೆಸಿ 4 ಲಕ್ಷ ರೂ.ಗಳನ್ನು ಕೋರಿ ಅವರ ಸಹೋದರನಿಗೆ ಕರೆ ಮಾಡಿದರು ಎಂದು ಥಾಣೆ ಪೊಲೀಸ್‌ನ ವಾಗ್ಲೆ ಎಸ್ಟೇಟ್‌ ವಿಭಾಗದ ಎಸಿಪಿ ಜಯಂತ್‌ ಬಜ್ಬಲೆ ಹೇಳಿದ್ದಾರೆ.

ಸುಳಿವುಗಳನ್ನು ಆಧರಿಸಿ ಪೊಲೀಸ್‌ ತಂಡಗಳು ರವಿವಾರ ತಡರಾತ್ರಿಯಿಂದ ಸೋಮವಾರ ಮುಂಜಾನೆವರೆಗೆ ನಡೆದ ಕಾರ್ಯಾಚರಣೆಯಲ್ಲಿ ಗುಪ್ತಾ ಅವರನ್ನು ರಕ್ಷಿಸುವಲ್ಲಿ ಯಶಸ್ವಿಯಾಗಿವೆ ಎಂದು ಎಸಿಪಿ ತಿಳಿಸಿದ್ದಾರೆ. ಇಬ್ಬರು ಮಹಿಳೆಯರು ಸೇರಿದಂತೆ ಏಳು ಜನರನ್ನು ಪೊಲೀಸರು ಬಂಧಿಸಿದ್ದಾರೆ ಎಂದವರು ಹೇಳಿದ್ದಾರೆ.