ಪ್ರಧಾನಿ ಮೋದಿ ಬಳಸುವ ಮೊಬೈಲ್‌ ಮೇಡ್‌ ಇನ್‌ ಚೈನಾ: ರಾಹುಲ್‌ ಟೀಕೆ

Team Udayavani, Jun 6, 2018, 3:26 PM IST

ಮಾಂಡ್‌ಸೋರ್‌, ಮಧ್ಯ ಪ್ರದೇಶ : ”ಪ್ರಧಾನಿ ನರೇಂದ್ರ ಮೋದಿ ಅವರು ಮೇಕ್‌ ಇನ್‌ ಇಂಡಿಯಾ ಬಗ್ಗೆ ದೊಡ್ಡ ದೊಡ್ಡ ಮಾತುಗಳನ್ನು ಆಡುತ್ತಾರೆ; ಆದರೆ ಅವರ ಕಿಸೆಯಲ್ಲಿರುವ ಮೊಬೈಲ್‌ ಫೋನ್‌ ಚೀನ ನಿರ್ಮಿತವಾಗಿದೆ ಎಂದು ರಾಹುಲ್‌ ಗಾಂಧಿ ಅವರು ಮೋದಿ ವಿರುದ್ಧ ಮತ್ತೆ ವಾಕ್‌ ದಾಳಿ ಆರಂಬಿಸಿದ್ದಾರೆ.

ಈ ತಿಂಗಳಾಂತ್ಯ ರಾಜ್ಯ ವಿಧಾನಸಭಾ ಚುನಾವಣೆಯನ್ನು ಕಾಣಲಿರುವ ಮಧ್ಯಪ್ರದೇಶದಲ್ಲಿನ ಶಿವರಾಜ್‌ ಚೌಹಾಣ್‌ ಅವರ ಬಿಜೆಪಿ ಸರಕಾರ ರೈತರ ಆತ್ಮಹತ್ಯೆಗಳನ್ನು ತಡೆಯುವಲ್ಲಿ ವಿಫ‌ಲವಾಗಿದೆ. ಸಿಎಂ ಚೌಹಾಣ್‌ ಅವರು ಸಿರಿವಂತ ಕೈಗಾರಿಕೋದ್ಯಮಿಗಳೊಂದಿಗೆ ಮಾತುಕತೆಯಲ್ಲಿ ವ್ಯಸ್ತರಾಗಿದ್ದು ಜನಸಾಮಾನ್ಯರಿಗೆ ಅದರಿಂದೇನೂ ಪ್ರಯೋಜನವಾಗುತ್ತಿಲ್ಲ ಎಂದು ರಾಹುಲ್‌ ದೂರಿದರು. 

ಪ್ರಧಾನಿ ಮೋದಿ ಅವರು ದೇಶದ ಯುವ ಜನರಿಗೆ ಉದ್ಯೋಗಾವಕಾಶಗಳ ಬಗ್ಗೆ ನೀಡಿದ್ದ ಭರವಸೆಯನ್ನು ಈಡೇರಿಸಿಲ್ಲ;ಅವರ ಮೇಕ್‌ ಇನ್‌ ಇಂಡಿಯಾ ಯೋಜನೆಯಿಂದ ಯಾವುದೇ ಪ್ರಯೋಜನವಾಗಿಲ್ಲ ಎಂದು ಹೇಳಿದ ರಾಹುಲ್‌, ರಾಜ್ಯದಲ್ಲಿ ಕಾಂಗ್ರೆಸ್‌ ಸರಕಾರ ಅಧಿಕಾರಕ್ಕೆ ಬಂದರೆ ಯುವ ಜನರಿಗೆ ಉದ್ಯೋಗ ಮತ್ತು ಕೃಷಿ ವಲಯಕ್ಕೆ ಭದ್ರತೆ ನೀಡಲಾಗುವುದು ಎಂಬ ಭರವಸೆ ನೀಡಿದರು. 

ರಾಜ್ಯದಲ್ಲಿ ಕಾಂಗ್ರೆಸ್‌ ಸರಕಾರ ಅಧಿಕಾರಕ್ಕೆ ಬಂದರೆ ಕೇವಲ 10 ದಿನಗಳಲ್ಲಿ ರೈತರ ಕೃಷಿ ಸಾಲ ಮನ್ನಾ ಮಾಡಲಾಗುವುದು ಎಂದ ರಾಹುಲ್‌, ಪ್ರಧಾನಿಯವರ ಮನ್‌ ಕೀ ಬಾತ್‌ ಕ್ಕಿಂತ ಜನರ ಮನ್‌ ಕೀ ಬಾತ್‌ ನಲ್ಲಿ ಕಾಂಗ್ರೆಸ್‌ ನಂಬಿಕೆ ಇರಿಸಿಕೊಂಡಿದೆ ಎಂದು ಹೇಳಿದರು.