ರಾಹುಲ್‌ ನಮಾಜಿಗೆ ಕುಳಿತವರಂತೆ ದೇವಳದಲ್ಲಿ ಕೂರುತ್ತಾರೆ: ಯೋಗಿ

Team Udayavani, Nov 22, 2017, 11:24 AM IST

ಲಕ್ನೋ : ‘ಚುನಾವಣೆಗೆ ಪೂರ್ವಭಾವಿ ಸಿದ್ಧತೆ ಎಂಬಂತೆ ದೇವಸ್ಥಾನದಿಂದ ದೇವಸ್ಥಾನಕ್ಕೆ ಹೋಗುತ್ತಿರುವ ಕಾಂಗ್ರೆಸ್‌ ಉಪಾಧ್ಯಕ್ಷ ರಾಹುಲ್‌ ಗಾಂಧಿ ಅವರಿಗೆ “ದೇವಸ್ಥಾನದಲ್ಲಿ ಹೇಗೆ ಕುಳಿತುಕೊಳ್ಳಬೇಕು ಎಂಬುದೇ ಗೊತ್ತಿಲ್ಲ; ಆತ ಮಸೀದಿಯಲ್ಲಿ ನಮಾಜ ಮಾಡುವ ರೀತಿಯಲ್ಲಿ ದೇವಸ್ಥಾನದಲ್ಲಿ ಕುಳಿತುಕೊಳ್ಳುತ್ತಾರೆ’ ಎಂದು ಉ.ಪ್ರ. ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್‌ ಟೀಕಿಸಿದ್ದಾರೆ.

“ರಾಹುಲ್‌ ಗಾಂಧಿ ಅವರು ಈಚೆಗೆ ವಾರಾಣಸಿಯ ಕಾಶೀ ವಿಶ್ವನಾಥ ದೇವಸ್ಥಾನಕ್ಕೆ ಹೋಗಿದ್ದಾಗ ಅಲ್ಲಿ ಅವರು ಕುಳಿತ ಭಂಗಿ ಮಸೀದಿಯಲ್ಲಿ  ನಮಾಜು ಮಾಡುವ ರೀತಿಯಲ್ಲಿತ್ತು; ಇದನ್ನು ಕಂಡ ಅಲ್ಲಿನ ಅರ್ಚಕರು, “ದೇವಸ್ಥಾನದಲ್ಲಿ ನೀವು ಹೀಗೆ ಕೂರುವಂತಿಲ್ಲ; ಪಾಲ್ಟಿ ಹಾಕಿ (ಚಕ್ಕಳಮಕ್ಕಳ) ಕೂರಬೇಕು’ ಎಂದು ರಾಹುಲ್‌ ಗಾಂಧಿಗೆ ಹೇಳಿದರು’ಎಂಬುದಾಗಿ ಸಿಎಂ ಆದಿತ್ಯನಾಥ್‌ ಹೇಳಿದರು.

ಅದೇನಿದ್ದರೂ ಚುನಾವಣೆಗಾಗಿ ದೇವಸ್ಥಾನದಿಂದ ದೇವಸ್ಥಾನಕ್ಕೆ ಓಡುತ್ತಿರುವ ರಾಹುಲ್‌ ಗಾಂಧಿ ಅವರ ಮನಸ್ಸು ಈ ಕಾರಣದಿಂದಾದರೂ ಪರಿಶುದ್ಧವಾಗಲೆಂದು ಹಾರೈಸುತ್ತೇನೆ ಎಂದು ಯೋಗಿ ತಿಳಿಸಿದರು.

ರಾಹುಲ್‌ ಗಾಂಧಿ ಕೇವಲ ಮತಗಳಿಗಾಗಿ ದೇವಸ್ಥಾನಗಳಿಗೆ ಭೇಟಿ ನೀಡುತ್ತಿದ್ದಾರೆ ಎಂದು ಬಿಜೆಪಿ ಟೀಕಿಸಿದೆಯಾದರೆ, ಕಾಂಗ್ರೆಸ್‌ ರಾಹುಲ್‌ ಗಾಂಧಿಯನ್ನು ಸಮರ್ಥಿಸಿಕೊಂಡು “ದೇವರನ್ನು ಧ್ಯಾನಿಸುವ ವಿಧಾನಕ್ಕೆ ಯಾರಲ್ಲಾರದರೂ ಪೇಟೆಂಟ್‌ ಇದೆಯೇ?’ ಎಂದು ಪ್ರಶ್ನಿಸಿದೆ.