Raj Thackeray ಮಹಾ ಫಲಿತಾಂಶದ ನಂತರ ಪ್ರಮುಖ ಪಾತ್ರ ವಹಿಸಲಿದ್ದಾರೆ: ನಂದಗಾಂವ್ಕರ್

Team Udayavani, Nov 17, 2024, 6:06 PM IST

ಮುಂಬಯಿ: ಮಹಾರಾಷ್ಟ್ರ ವಿಧಾನಸಭಾ ಚುನಾವಣೆಯ ಫಲಿತಾಂಶದ ನಂತರ ಹೊರಹೊಮ್ಮುವ ಹೊಸ ಶಕ್ತಿ ಸಮೀಕರಣಗಳಲ್ಲಿ ಮಹಾರಾಷ್ಟ್ರ ನವನಿರ್ಮಾಣ ಸೇನೆ (MNS) ಅಧ್ಯಕ್ಷ ರಾಜ್ ಠಾಕ್ರೆ ಪ್ರಮುಖ ಪಾತ್ರ ವಹಿಸಬಹುದು ಎಂದು ಎಂಎನ್‌ಎಸ್ ಅಭ್ಯರ್ಥಿ, ಹಿರಿಯ ನಾಯಕ ಬಾಳಾ ನಂದಗಾಂವ್ಕರ್ ಹೇಳಿದ್ದಾರೆ.

ನಂದಗಾಂವ್ಕರ್ ಅವರು ಪಿಟಿಐಗೆ ನೀಡಿದ ಸಂದರ್ಶನದಲ್ಲಿ ‘ಮುಂಬೈನ ಸೀಮಿತ ಭೂಮಿ ಮತ್ತು ಹೆಚ್ಚಿನ ಜನಸಾಂದ್ರತೆಯನ್ನು ಗಮನಿಸಿ ತಮ್ಮ ಪಕ್ಷದ ನಿಲುವು ಉತ್ತರ ಪ್ರದೇಶ, ಬಿಹಾರ ಅಥವಾ ಇತರ ರಾಜ್ಯಗಳ ಜನರ ವಿರುದ್ಧವಾಗಿಲ್ಲ ಮತ್ತು ಅವರ ಹಿಂದಿನ ಆಂದೋಲನವು ಶಿವಡಿ ಕ್ಷೇತ್ರದಲ್ಲಿ ಯಾರಿಗೂ ಹಾನಿಯನ್ನುಂಟುಮಾಡಲಿಲ್ಲ. ಎಂಎನ್‌ಎಸ್ ಮತ್ತು ರಾಜ್ ಠಾಕ್ರೆ ಇಬ್ಬರೂ ಮುಂದಿನ ದಿನಗಳಲ್ಲಿ ರಾಜಕೀಯವಾಗಿ ಹೆಚ್ಚು ಎತ್ತರಕ್ಕೆ ಏರುತ್ತಾರೆ’ ಎಂದು ಪ್ರತಿಪಾದಿಸಿದ್ದಾರೆ.

“ಈ ಚುನಾವಣೆಯಲ್ಲಿಯೇ ಹಲವಾರು ನಾಯಕರು ಮನೆಯಲ್ಲಿ ಕುಳಿತುಕೊಳ್ಳುವುದನ್ನು ನೀವು ನೋಡುತ್ತೀರಿ. ಒಳ್ಳೆಯ ಜನರು ರಾಜಕೀಯಕ್ಕೆ ಬರುತ್ತಾರೆ. ಅಲ್ಲದೆ, ಈ ವಿಧಾನಸಭಾ ಚುನಾವಣೆಯ ನಂತರ ರಾಜ್ ಠಾಕ್ರೆ ಹೊಸ ಶಕ್ತಿ ಸಮೀಕರಣಗಳಲ್ಲಿ ಪ್ರಮುಖ ಪಾತ್ರ ವಹಿಸಬಹುದು ಎಂದು ಮಾಜಿ ನಾಲ್ಕು ಅವಧಿಯ ಶಾಸಕ ನಂದಗಾಂವ್ಕರ್ ಮಧ್ಯ ಮುಂಬೈನ ಲಾಲ್‌ಬಾಗ್‌ನಲ್ಲಿರುವ ಎಂಎನ್‌ಎಸ್ ಕಚೇರಿಯಲ್ಲಿ ಪಿಟಿಐಗೆ ಹೇಳಿಕೆ ನೀಡಿದ್ದಾರೆ.

ನಂದಗಾಂವ್ಕರ್ ಅವರು ಶಿವಸೇನಾ (ಯುಬಿಟಿ) ಅಭ್ಯರ್ಥಿ ಮತ್ತು ಮೂರನೇ ಅವಧಿಗೆ ಸ್ಪರ್ಧಿಸುತ್ತಿರುವ ಹಾಲಿ ಶಾಸಕ ಅಜಯ್ ಚೌಧರಿ ವಿರುದ್ಧ ಕಣಕ್ಕಿಳಿದಿದ್ದಾರೆ.ಚೌಧರಿ ಅವರು 2014 ರ ವಿಧಾನಸಭಾ ಚುನಾವಣೆಯಲ್ಲಿ ನಂದಗಾಂವ್ಕರ್ ಅವರನ್ನು ಸೋಲಿಸಿದ್ದರು. ಕಾಲು ಮುರಿತದಿಂದ ಗಾಲಿಕುರ್ಚಿಯಲ್ಲಿ ಕುಳಿತು ಪ್ರಚಾರ ನಡೆಸಿರುವ ನಂದಗಾಂವಕರ್ ಅವರು ಮನೆ ಮನೆಗೆ ಭೇಟಿ ನೀಡುವ ಮೂಲಕ ಕ್ಷೇತ್ರದ ಶೇ.70 ರಷ್ಟು ಪ್ರಚಾರ ಕಾರ್ಯ ನಿರ್ವಹಿಸಿದ್ದಾರೆ. ಅವರ ಪುತ್ರಿ ಸೃಷ್ಟಿ ಅವರು ಮನೆ-ಮನೆಗೆ ತೆರಳಿ ಮತಯಾಚನೆಯನ್ನು ಮುಂದುವರೆಸಿದ್ದು, ಸ್ಪೀಕರ್ ಬಳಸಿ ಕಟ್ಟಡಗಳಲ್ಲಿ ಕೆಳ ಮಹಡಿಯಿಂದ ಮತದಾರರಿಗೆ ಮನವಿ ಮಾಡುತ್ತಿದ್ದಾರೆ.

‘ಅಜಾನ್’ ಧ್ವನಿವರ್ಧಕಗಳ ವಿರುದ್ಧ ಒಂದೆರಡು ವರ್ಷಗಳ ಹಿಂದೆ ಎಂಎನ್‌ಎಸ್ ಪ್ರತಿಭಟನೆ ಮತ್ತು ಪಕ್ಷದ ಹಿಂದುತ್ವದ ಪರವಾದ ನಿಲುವನ್ನು ಪರಿಗಣಿಸಿ ಮುಸ್ಲಿಮರು ಅವರಿಗೆ ಮತ ಹಾಕುತ್ತಾರೆಯೇ ಎಂಬ ಪ್ರಶ್ನೆಗೆ,ಉತ್ತರಿಸಿದ ನಂದಗಾಂವ್ಕರ್ ಇದು ಪಕ್ಷದ ಮಟ್ಟದಲ್ಲಿನ ಸಮಸ್ಯೆಯಾಗಿದೆ ಮತ್ತು ಕ್ಷೇತ್ರದ ಅಂಶವಲ್ಲ ಎಂದು ಹೇಳಿದರು.

1995 ರಲ್ಲಿ ಇಲ್ಲಿನ ಮಜಗಾಂವ್ ವಿಧಾನಸಭಾ ಕ್ಷೇತ್ರದಿಂದ ಶಿವಸೇನಾ ಅಭ್ಯರ್ಥಿಯಾಗಿ ಮೊದಲ ಬಾರಿಗೆ ಸ್ಪರ್ಧಿಸಿದ್ದಾಗ ಪ್ರಬಲ ನಾಯಕ ಛಗನ್ ಭುಜಬಲ್ ಅವರನ್ನು ಸೋಲಿಸಿದಾಗ ನಂದಗಾಂವ್ಕರ್ ‘ದೈತ್ಯ ಸಂಹಾರಿ’ ಎಂಬ ಖ್ಯಾತಿಯನ್ನು ಗಳಿಸಿದ್ದರು.ಅವರು ಈಗ ಆರನೇ ವಿಧಾನಸಭಾ ಚುನಾವಣೆಯಲ್ಲಿ ಮತ್ತು ಮೂರನೇ ಬಾರಿಗೆ ಶಿವಡಿಯಿಂದ ಸ್ಪರ್ಧಿಸುತ್ತಿದ್ದಾರೆ, ಅವರು 2009 ರಲ್ಲಿ ಗೆದ್ದಿದ್ದರು ಆದರೆ 2014 ರಲ್ಲಿ ಸೋಲು ಕಂಡಿದ್ದರು.

MNS ಪಕ್ಷವು ಅಸ್ತಿತ್ವಕ್ಕೆ ಬಂದ ನಂತರ ಅದರ ಮೊದಲ ರಾಜ್ಯ ಚುನಾವಣೆ 2009 ರಲ್ಲಿ 288 ರಲ್ಲಿ 13 ವಿಧಾನಸಭಾ ಸ್ಥಾನಗಳನ್ನು ಗೆದ್ದುಕೊಂಡಿತ್ತು ಆದರೆ 2019ರಲ್ಲಿ ಕೇವಲ 1 ಸ್ಥಾನ ಪಡೆದಿತ್ತು. MNS ಲೋಕಸಭೆ ಚುನಾವಣೆಯಲ್ಲಿ ಆಡಳಿತಾರೂಢ ಮಹಾಯುತಿಯನ್ನು ಬೆಂಬಲಿಸಿತ್ತಾದರೂ ಈಗ ವಿಧಾನಸಭಾ ಚುನಾವಣೆಯಲ್ಲಿ ಸ್ವತಂತ್ರವಾಗಿ ಸ್ಪರ್ಧಿಸುತ್ತಿದೆ.