Rajasthan ಸಂಪುಟ: 22 ಸಚಿವರಿಂದ ಶಪಥ, ಪೈಕಿ 17 ಹೊಸಮುಖ!

Team Udayavani, Dec 31, 2023, 12:52 AM IST

ಜೈಪುರ: ರಾಜಸ್ಥಾನ ಮುಖ್ಯಮಂತ್ರಿ ಭಜನ್‌ ಲಾಲ್‌ ಶರ್ಮಾ ಅವರು ತಮ್ಮ ಸಂಪುಟವನ್ನು ವಿಸ್ತರಿಸಿದ್ದಾರೆ. ಕೇಂದ್ರ ಮಾಜಿ ಸಚಿವ ರಾಜ್ಯವರ್ಧನ್‌ ರಾಥೋಡ್‌, ಹಿರಿಯ ನಾಯಕ ಕಿರೋಡಿ ಲಾಲ್‌ ಮೀನಾ ಸಹಿ ತ 22 ಶಾಸಕರು ಶನಿವಾರ ನೂತನ ಸಂಪುಟಕ್ಕೆ ಸೇರ್ಪಡೆಯಾಗಿದ್ದಾರೆ. ವಿಶೇಷ ವೆಂದರೆ ಈ ಪೈಕಿ 17 ಮಂದಿ ಮೊದಲ ಬಾರಿಗೆ ಸಚಿವರಾಗಿದ್ದಾರೆ.

ಮುಖ್ಯವಾಗಿ ಸಂಪುಟದಲ್ಲಿ ಜಾತಿ ಸಮೀಕರಣ ಮತ್ತು ಪ್ರದೇಶಿಕ ಸಮಾನತೆಗೆ ಒತ್ತು ನೀಡಲಾಗಿದೆ. ನೂತನ ಸಂಪುಟದಲ್ಲಿ ಬ್ರಾಹ್ಮಣ ಸಮುದಾಯದ ಇಬ್ಬರು ನಾಯಕರು, ನಾಲ್ವರು ಜಾಟರು, ಮೂವರು ರಜಪುತ್‌ ಸಮುದಾಯದವರು, ಎಸ್‌ಸಿ/ಎಸ್‌ಟಿ ಸಮುದಾಯಕ್ಕೆ ಸೇರಿದ ಮೂವರು ಹಾಗೂ ಉಳಿದ 10 ಮಂದಿ ಇತರೆ ಸಮುದಾಯಗಳಿಗೆ ಸೇರಿದವರಾಗಿದ್ದಾರೆ.

ರಾಥೋಡ್‌, ಕಿರೋಡಿ ಸಹಿತ 12 ಮಂದಿ ಸಂಪುಟ ದರ್ಜೆ ಸಚಿವರಾಗಿ, ಉಳಿದಂತೆ 10 ಮಂದಿ ರಾಜ್ಯ ಸಚಿವರಾಗಿ ಪ್ರಮಾಣ ವಚನ ಸ್ವೀಕರಿಸಿದ್ದಾರೆ. ರಾಜ್ಯಪಾಲ ಕಾಲ್‌ರಾಜ್‌ ಮಿಶ್ರಾ ಅವರು 22 ಮಂದಿ ಸಚಿವರಿಗೆ ಪ್ರಮಾಣವಚನ ಬೋಧಿಸಿದರು. ಪ್ರಸ್ತುತ ಸಿಎಂ ಭಜನ್‌ ಲಾಲ್‌, ಇಬ್ಬರು ಡಿಸಿಎಂಗಳು ಸೇರಿದಂತೆ ಒಟ್ಟು 25 ಸಚಿವರು ಸಂಪುಟದಲ್ಲಿದ್ದಾರೆ.