Rajasthan:ಪೊಲೀಸ್‌ ಭದ್ರತೆಗೆ ಆದ 9 ಲಕ್ಷ ರೂ.ಬಿಲ್‌ ಪಾವತಿಸಿ: ರಾಜಸ್ಥಾನ ರೈತನಿಗೆ ನೋಟಿಸ್‌

Team Udayavani, Dec 24, 2024, 8:09 PM IST

ಜೈಪುರ:ಆತ್ಮಹತ್ಯೆ ಮಾಡಿಕೊಳ್ಳುವುದಾಗಿ ಬೆದರಿಕೆ ಹಾಕಿದ್ದ ರೈತನಿಗೆ ಈಗ ಪೊಲೀಸರೇ ಶಾಕ್‌ ನೀಡಿದ ಘಟನೆ ರಾಜಸ್ಥಾನದ ಜೈಪುರದಲ್ಲಿ ನಡೆದಿದೆ.

ವಿದ್ಯಾಧರ್‌ ಯಾದವ್‌ ಎಂಬವರ ಭೂಮಿಯನ್ನು ಸಿಮೆಂಟ್‌ ಘಟಕವೊಂದರ ನಿರ್ಮಾಣಕ್ಕಾಗಿ ಸ್ವಾಧೀನ ಪಡಿಸಿಕೊಳ್ಳಲಾಗಿತ್ತು. ಭೂಮಿಗೆ ನೀಡಲಾಗುವ ಪರಿಹಾರ ಮೊತ್ತದ ವಿಚಾರದಲ್ಲಿ ವಿವಾದ ಉಂಟಾಗಿತ್ತು. ಅದನ್ನು ಬೇಗ ಇತ್ಯರ್ಥಗೊಳಿಸಿ, ಇಲ್ಲವೇ ನನಗೆ ದಯಾಮರಣಕ್ಕೆ ಅವಕಾಶ ಕೊಡಿ ಎಂದು ಯಾದವ್‌ ಕೋರಿಕೊಂಡಿದ್ದರು. ಈ ಹಿನ್ನೆಲೆಯಲ್ಲಿ ಹಿರಿಯ ಅಧಿಕಾರಿಗಳು ಸೇರಿದಂತೆ 97 ಮಂದಿ ಪೊಲೀಸರು ಯಾದವ್‌ ಮನೆಗೆ ಧಾವಿಸಿ, ಭದ್ರತೆ ಒದಗಿಸಿದ್ದರು.

ಈಗ ಭದ್ರತೆಗೆ ಬರೋಬ್ಬರಿ 9.91 ಲಕ್ಷ ರೂ. ವೆಚ್ಚವಾಗಿದ್ದು, ಅದನ್ನು ಭರಿಸುವಂತೆ ಸೂಚಿಸಿ ಯಾದವ್‌ಗೆ ಪೊಲೀಸರು ನೋಟಿಸ್‌ ಜಾರಿ ಮಾಡಿದ್ದಾರೆ. ಇದಕ್ಕೆ ಪ್ರತಿಕ್ರಿಯಿಸಿದ ಯಾದ್‌, “ನಾನೇನೂ ಪೊಲೀಸ್‌ ರಕ್ಷಣೆಗೆ ಮನವಿ ಮಾಡಿಕೊಂಡಿರಲಿಲ್ಲ. ಅವರೇ ಬಂದು ಭದ್ರತೆ ಒದಗಿಸಿದ್ದಕ್ಕೆ ನಾನೇನು ಮಾಡಲಿ’ ಎಂದು ಪ್ರಶ್ನಿಸಿದ್ದಾರೆ.