ವಿಶ್ವಾಸ ವೃದ್ಧಿ ಯತ್ನ: ರಾಜನಾಥ್‌ ಸಿಂಗ್‌ 4 ದಿನಗಳ ಕಾಶ್ಮೀರ ಭೇಟಿ

Team Udayavani, Sep 9, 2017, 11:16 AM IST

ಹೊಸದಿಲ್ಲಿ : ಗೃಹ ಸಚಿವ ರಾಜನಾಥ್‌ ಸಿಂಗ್‌ ಅವರು ನಾಲ್ಕು  ದಿನಗಳ ಭೇಟಿಯ ಪ್ರಯುಕ್ತ ಇಂದು ಶನಿವಾರ ಕಾಶ್ಮೀರಕ್ಕೆ ತೆರಳಿದ್ದಾರೆ. 

ಈ ಸಂದರ್ಭದಲ್ಲಿ ಅವರು ಪೌರ ಸಮಾಜದ ಸದಸ್ಯರೊಂದಿಗೆ, ರಾಜಕೀಯ ಹಾಗೂ ಸಾಮಾಜಿಕ ಸಂಘಟನೆಗಳ ನಾಯಕರೊಂದಿಗೆ ಹಾಗೂ ಉದ್ಯಮ ರಂಗದ ನಾಯಕರೊಂದಿಗೆ ಮಾತುಕತೆ ನಡೆಸಲಿದ್ದಾರೆ.

ಪ್ರಧಾನಿ ನರೇಂದ್ರ ಮೋದಿ ಅವರು ಸ್ವಾತಂತ್ರ್ಯ ದಿನಾಚರಣೆಯ ಭಾಷಣದಲ್ಲಿ ಕಾಶ್ಮೀರ ಸಮಸ್ಯೆಯನ್ನು ನಿವಾರಿಸುವ ನಿಟ್ಟಿನಲ್ಲಿ “ನ ಗಾಲೀ ಸೇ, ನ ಗೋಲೀ ಸೇ, ಸಮಸ್ಯಾ ಸುಲ್‌ಝೇಗಿ ಗಲೇ ಲಗಾನೇ ಸೇ’ ಎಂಬ ಮಾತುಗಳನ್ನು ಆಡಿದ್ದರು. 

ಇದೀಗ ಮೋದಿ ಅವರ ಆಶಯದ ಪ್ರಕಾರ ರಾಜನಾಥ್‌ ಸಿಂಗ್‌ ಅವರು ಕಾಶ್ಮೀರದಲ್ಲಿ ವಿಶ್ವಾಸ ವೃದ್ದಿ  ಯತ್ನದ ಅಂಗವಾಗಿ ಅಲ್ಲಿಗೆ ನಾಲ್ಕು ದಿನಗಳ ಭೇಟಿ ಕೈಗೊಂಡಿರುವುದು ಗಮನಾರ್ಹವಾಗಿದೆ. 

ರಾಜನಾಥ್‌ ಸಿಂಗ್‌ ಅವರ ಜತೆಗೆ ಕೇಂದ್ರ ಗೃಹ ಕಾರ್ಯದರ್ಶಿ ರಾಜೀವ್‌ ಗೌಬಾ ಮತ್ತು ಹಿರಿಯ ಸಚಿವಾಲಯ ಅಧಿಕಾರಿಗಳೂ ಕಾಶ್ಮೀರಕ್ಕೆ ಪ್ರಯಾಣ ಬೆಳೆಸಿದ್ದಾರೆ. 

ನಾಳೆ ಭಾನುವಾರ ರಾಜನಾಥ್‌ ಸಿಂಗ್‌ ಅವರು ಜಮ್ಮು ಮತ್ತು ಶ್ರೀನಗರದಲ್ಲಿ ಹಲವಾರು ನಿಯೋಗಗಳನ್ನು ಭೇಟಿಯಾಗಲಿದ್ದಾರೆ. ಮಾತ್ರವಲ್ಲದೆ ಸಿಆರ್‌ಪಿಎಫ್, ಬಿಎಸ್‌ಎಫ್ ಮತ್ತು ಪೊಲೀಸ್‌ ಜವಾನರೊಂದಿಗೆ ಮಾತುಕತೆ, ಸಂವಾದ ನಡೆಸಲಿದ್ದಾರೆ. ಶ್ರೀನಗರದಲ್ಲಿ ರಾಜನಾಥ್‌ ಸಿಂಗ್‌ ಕಾಲೇಜು ಮತ್ತು ವಿಶ್ವವಿದ್ಯಾಲಯದ ವಿದ್ಯಾರ್ಥಿಗಳ ಜತೆಗೆ ಸಂವಾದ ನಡೆಸಲಿದ್ದಾರೆ. 

ರಾಜ್ಯಪಾಲ ಎನ್‌ ಎನ್‌ ವೋರಾ ಮತ್ತು ಮುಖ್ಯಮಂತ್ರಿ ಮೆಹಬೂಬ ಮುಫ್ತಿ ಅವರನ್ನು ಕೂಡ ರಾಜನಾಥ್‌ ಸಿಂಗ್‌ ಭೇಟಿಯಾಗಲಿದ್ದಾರೆ.