‘ನಾಚ್‌ನೇವಾಲಿ’ ದೀಪಿಕಾಗೆ ಕರಣಿ ಸೇನೆ ಜೀವ ಬೆದರಿಕೆ

Team Udayavani, Nov 16, 2017, 10:42 AM IST

ಜೈಪುರ : ಹಿಂದಿ ಚಿತ್ರ ನಿರ್ದೇಶಕ ಸಂಜಯ್‌ ಲೀಲಾ ಭನ್ಸಾಲಿ ಅವರ ಡಿ.1ರಂದು ತೆರೆ ಕಾಣಲಿರುವ ವಿವಾದಾತ್ಮಕ ಐತಿಹಾಸಿಕ ಚಿತ್ರ “ಪದ್ಮಾವತಿ’ಗೆ ಬಹಿಷ್ಕಾರ ಹಾಕಿರುವ ಶ್ರೀ ರಾಜಪೂತ ಕರಣಿ ಸೇನಾ ಇದೀಗ ಚಿತ್ರದಲ್ಲಿ ಪದ್ಮಾವತಿ ಪಾತ್ರ ನಿರ್ವಹಿಸಿರುವ “ನಾಚ್‌ನೇವಾಲಿ’ ದೀಪಿಕಾ ಪಡುಕೋಣೆಗೆ ಜೀವ ಬೆದರಿಕೆ ಹಾಕಿದೆ. 

“ಪದ್ಮಾವತಿ’ ಚಿತ್ರ ನಿರ್ಮಾಣಕ್ಕೆ ಭೂಗತ ಜಗತ್ತು ಹಣ ಹಾಕಿದೆ ಎಂದು ಅದು ಆರೋಪಿಸಿರುವ ಕರಣಿ ಸೇನಾ, ಡಿ.1ರಂದು ಭಾರತ್‌ ಬಂದ್‌ಗೆ ಕರೆ ನೀಡಿದೆ. 

ದೇಶವು ಈಗ ಹೆಚ್ಚುಚ್ಚು ವಿಗತಿಪರ ಮತ್ತು ಸಂಕುಚಿತ ವಾಗುತ್ತಿದೆ ಎಂದು ಹೇಳಿರುವ ದೀಪಿಕಾ ಪಡುಕೋಣೆಯನ್ನು ಕರಣಿ ಸೇನೆ ಟೀಕಿಸಿದೆ. 

ದೀಪಿಕಾ ನಮಗೆ ಮಗಳಿದ್ದ ಹಾಗೆ; ಆಕೆ ಇಂತಹ ಸಂಕುಚಿತ ಮಾತುಗಳನ್ನು ಆಡಬಾರದು; ಹಾಗೆಯೇ ಆಕೆ ಸಿನೇಮಾಗಳಲ್ಲಿ ಮಹಿಳೆಯರನ್ನು ಅವಮಾನಿಸಬಾರದು; ಭಾರತೀಯ ಮಹಿಳೆಯನ್ನು ಆಕೆ ತೋರಿಸುವ ರೀತಿ ಹೀಗೇ ಏನು? ಎಂದು ಕರಣಿ ಸೇನೆ ಹೇಳಿರುವುದನ್ನು ಟಿವಿ ನ್ಯೂಸ್‌ ಚ್ಯಾನಲ್‌ ವರದಿ ಮಾಡಿದೆ.