ರಾಮ್‌ಲಾಲ್‌ ಆರೆಸ್ಸೆಸ್‌ಗೆ ವಾಪಸ್‌

Team Udayavani, Jul 14, 2019, 5:00 AM IST

ಹೊಸದಿಲ್ಲಿ: ಬಿಜೆಪಿ ಪ್ರಧಾನ ಕಾರ್ಯದರ್ಶಿ ರಾಮಲಾಲ್‌ 10 ವರ್ಷಗಳ ನಂತರ ಪುನಃ ಆರೆಸ್ಸೆಸ್‌ಗೆ ವಾಪಸಾಗಿದ್ದಾರೆ. ಮೂಲಗಳ ಪ್ರಕಾರ ರಾಮಲಾಲ್‌ ಬದಲಿಗೆ ವಿ. ಸತೀಶ್‌ ಪ್ರಧಾನ ಕಾರ್ಯದರ್ಶಿಯಾಗಿ ನೇಮಕಗೊಳ್ಳಲಿದ್ದಾರೆ.

ಬಿಜೆಪಿ ಮತ್ತು ಆರೆಸ್ಸೆಸ್‌ ಮಧ್ಯೆ ಪ್ರಮುಖ ಸಂವಹನ ಕೊಂಡಿಯಾಗಿ ರಾಮಲಾಲ್‌ ಕಾರ್ಯನಿರ್ವಹಿಸುತ್ತಿದ್ದರು. ಸಂಘಟನೆಯಲ್ಲಿ ಹಲವು ವರ್ಷ ದುಡಿದವರನ್ನು ಈ ಹುದ್ದೆಗೆ ಸಾಮಾನ್ಯವಾಗಿ ನೇಮಿಸಲಾಗುತ್ತದೆ. ಈ ಹಿಂದೆ ಪ್ರಧಾನಿ ಮೋದಿ ಕೂಡ ಈ ಹುದ್ದೆಯಲ್ಲಿ ಕಾರ್ಯನಿರ್ವಹಿಸಿದ್ದರು. ರಾಮಲಾಲ್‌ ಅಡಿಯಲ್ಲಿ ಜಂಟಿ ಪ್ರಧಾನ ಕಾರ್ಯದರ್ಶಿಯಾಗಿದ್ದ ವಿ.ಸತೀಶ್‌ ಈಗ ಅವರ ಸ್ಥಾನ ತುಂಬಲಿದ್ದಾರೆ ಎನ್ನಲಾಗಿದೆ. ಸದ್ಯ ರಾಮಲಾಲ್‌ ಅಡಿಯಲ್ಲಿ ಸೌದಾನ್‌ ಸಿಂಗ್‌, ಶಿವ ಪ್ರಕಾಶ್‌ ಮತ್ತು ಬಿ.ಎಲ್‌.ಸಂತೋಶ್‌ ಜಂಟಿ ಪ್ರಧಾನ ಕಾರ್ಯದರ್ಶಿಯಾಗಿದ್ದಾರೆ.

ಹಿಂದೆ 2 ಬಾರಿ ಪಕ್ಷದ ಅಧ್ಯಕ್ಷ ಅಮಿತ್‌ ಷಾಗೆ ಪತ್ರ ಬರೆದು ತನ್ನನ್ನು ಆರೆಸ್ಸೆಸ್‌ಗೆ ಕಳುಹಿಸಿ, ಬಿಜೆಪಿ ಪ್ರಧಾನ ಕಾರ್ಯದರ್ಶಿ ಹುದ್ದೆಯಿಂದ ಬಿಡುಗಡೆಗೊಳಿಸಿ ಎಂದು ರಾಮಲಾಲ್‌ ಕೋರಿದ್ದರು. ಶನಿವಾರದ ಸಭೆಯಲ್ಲಿ ಪುನಃ ಕರೆತರುವ ನಿರ್ಧಾರಕ್ಕೆ ಆರೆಸ್ಸೆಸ್‌ ಸಮ್ಮತಿಸಿದೆ.