ಆಧಾರ್‌ ಜೋಡಿಸದಿದ್ದರೂ ಪಡಿತರ

Team Udayavani, May 13, 2020, 9:33 AM IST

ಸಾಂದರ್ಭಿಕ ಚಿತ್ರ

ಹೊಸದಿಲ್ಲಿ: ನಿಮ್ಮ ಪಡಿತರ ಚೀಟಿಗೆ ಆಧಾರ್‌ ಕಾರ್ಡ್‌ ಲಿಂಕ್‌ ಮಾಡಿಲ್ಲವೇ? ಹಾಗಿದ್ದರೆ, 2020ರ ಸೆ. 30ರೊಳಗೆ ಲಿಂಕ್‌ ಮಾಡಿಬಿಡಿ. ಆದರೆ, ಲಿಂಕ್‌ ಮಾಡಿಲ್ಲ ಎಂಬ ಕಾರಣಕ್ಕೆ ನಿಮಗೆ ಪಡಿತರ ಸಿಗುವುದಿಲ್ಲ ಎಂಬ ಭೀತಿ ಬೇಡ. ಸಾರ್ವಜನಿಕ ವಿತರಣ ವ್ಯವಸ್ಥೆಯಡಿ ನಿಮಗೆ ಸಿಗಬೇಕಾದ ಪಡಿತರ ಸಿಕ್ಕೇ ಸಿಗುತ್ತದೆ.

– ಇದು ಪಡಿತರ ಚೀಟಿದಾರರಿಗೆ ಕೇಂದ್ರ ಸರಕಾರ‌ ನೀಡಿರುವ ಹೊಸ ಸೂಚನೆ. ಆಧಾರ್‌ ಕಾರ್ಡ್‌ಗೆ ಲಿಂಕ್‌ ಆಗದ ಪಡಿತರ ಚೀಟಿಗಳನ್ನು ರದ್ದುಗೊಳಿಸಲಾಗುತ್ತದೆ ಅಥವಾ ಪಡಿತರ ಚೀಟಿಯಲ್ಲಿನ ಫ‌ಲಾನುಭವಿಗಳ ಹೆಸರುಗಳನ್ನು ಡಿಲೀಟ್‌ ಮಾಡಲಾಗುತ್ತದೆ. ಇನ್ನು, ಆಧಾರ್‌ಗೆ ಲಿಂಕ್‌ ಆಗದ ಪಡಿತರ ಚೀಟಿಗಳನ್ನು ಹೊಂದಿರುವವರಿಗೆ ನ್ಯಾಯಬೆಲೆ ಅಂಗಡಿಗಳಿಂದ ಯಾವುದೇ ಪಡಿತರ ನೀಡಲಾಗುವುದಿಲ್ಲ ಎಂಬಿತ್ಯಾದಿ ವದಂತಿಗಳು ಸಾರ್ವಜನಿಕರನ್ನು ಕಂಗೆಡಿಸಿದ ಹಿನ್ನೆಲೆಯಲ್ಲಿ ಕೇಂದ್ರ ಆಹಾರ ಮತ್ತು ನಾಗರಿಕ ಸರಬರಾಜು ಇಲಾಖೆಯು ಈ ರೀತಿಯ ಸ್ಪಷ್ಟನೆಯನ್ನು ರವಾನಿಸಿದೆ.